موڭعولياداعى ءىرى قىسقى فەستيۆالدا قوبدا قازاقتارى انمەن شاشۋ شاشتى - شەتەلدەگى قازاق باسپا ءسوزى

None
استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تاشكەنتتە وزبەكستان مەن قازاقستان س ءى م باسشىلارى كەزدەستى - «ءو ز ا»

وزبەكستان سىرتقى ىستەر ءمينيسترىنىڭ مىندەتىن اتقارۋشى باحتيەر سايدوۆ ەكونوميكالىق ىنتىماقتاستىق ۇيىمى سىرتقى ىستەر مينيسترلەرى كەڭەسىنىڭ وتىرىسىنا قاتىسۋ ءۇشىن تاشكەنت قالاسىنا كەلگەن قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردىمەن كەزدەستى.

بۇل تۋرالى وسى اپتادا وزبەكستاندىق «ءو ز ا» اقپاراتتىق اگەنتتىگى حابارلادى.

اتالعان ب ا ق- تىڭ مالىمەتىنشە، سىرتقى ساياسات ۆەدومستۆولارىنىڭ باسشىلارى وزبەكستان مەن قازاقستان اراسىنداعى تاتۋ كورشىلىك جانە ستراتەگيالىق سەرىكتەستىك قاتىناستارىنىڭ ءتۇرلى اسپەكتىلەرى بويىنشا پىكىر الماسقان.

«ەكىجاقتى جانە كوپجاقتى كۇن ءتارتىبىنىڭ وزەكتى ماسەلەلەرى بويىنشا بەلسەندى ديالوگتى جالعاستىرۋدىڭ ماڭىزدىلىعى اتاپ ءوتىلدى. ەكونوميكالىق ىنتىماقتاستىق ۇيىمى اياسىنداعى ىنتىماقتاستىقتى دامىتۋعا ەرەكشە نازار اۋدارىلدى»، - دەپ تۇيىندەيدى وزبەكستاندىق باسىلىم.

تۇركى رەسپۋبليكالارىنداعى باستى وقيعالار - TRT

وسى اپتانىڭ باسىندا «تۇركيا راديو تەلەۆيزيا» پورتالىندا تۇركى رەسپۋبليكالارىندا وتكەن اپتادا باستى، ماڭىزدى ورىنعا شىققان وقيعالارعا توقتالامىز، دەپ باستالعان شاعىن ماقالا جارىق كوردى.

اتالعان ب ا ق- تىڭ كەلتىرگەن دەرەكتەرىنە سۇيەنسەك، 2023-جىلى 12-13- قاڭتار كۇندەرى تۇرىك مەملەكەتتەر ۇيىمىنىڭ باس حاتشىسى قۋانىشبەك ومىراليەۆ ۆەنگرياعا ساپارمەن بارعان. باس حاتشى بۋداپەشتتە ۆەنگريا پرەمەر-ءمينيسترى ۆيكتور وربانمەن كەزدەسكەن. ق. ومىراليەۆ پەن پرەمەر-مينيستر ۆ. وربان قاتىناس پەن ەنەرگيا، اۋىل شارۋاشىلىعى مەن تابيعي بايلىقتاردى باسقارۋ سياقتى سالالارداعى ادىستەمەلى ىنتىماقتاستىقتى دامىتۋ جايلى پىكىر الماستىرعان.

سونىمەن قاتار، تۇرىكمەنستان ەلىندە ەكى قاناتتى ءماجىلىستى بىرلەستىرۋ كۇن ءتارتىبى قارالدى. 11- قاڭتاردا تۇرىكمەنستان پارلامەنتىنىڭ ۇستىڭگى قاناتى حالىق ءماجىلىسى مەن استىڭعى قاناتى تۇرىكمەنستان ۇلتتىق ءماجىلىسىنىڭ وكىلدەرى جينالىس وتكىزىپ، 2023-جىلى 26- ناۋرىزدا تۇرىكمەنستاندا جالپى جانە جەرگىلىكتى سايلاۋ وتكىزىلەتىنى تىلگە تيەك ەتىلگەن.

تۇركيالىق باسىلىم، قازاقستاندا 14- قاڭتاردا سەنات سايلاۋى وتكەنىن دە وقىرماندار نازارىنا ۇسىنعان. قازاقستاندا سەناتورلاردى جەرگىلىكتى ءماجىلىس مۇشەلەرى سايلايتىنىن جانە قازاقستان سەناتىنا سايلانعان 20 سەناتور التى جىل مىندەت اتقاراتىنىن جازعان.

سونداي-اق، 1990 -جىلدىڭ باسىندا ەلىنىڭ تاۋەلسىزدىگى ءۇشىن ەڭبەك ەتكەن باشقۇرتستان رەسپۋبليكاسىنىڭ تۇڭعىش پرەزيدەنتى مۇرتازا راحيموۆ 11- قاڭتاردا قايتىس بولعانى تۋرالى جازدى. «TRT» - نىڭ دەرەگىنشە، باشقۇرتستاندى راحيموۆ 20 جىل باسقارعان ەكەن.

شاعىن ماقالا سوڭىندا 9-10- قاڭتار اراسىندا 13- ازيا پارلامەنتتىك اسسابلەياسىنىڭ جالپى كەڭەسى «وزگەرگەن حالىقارالىق ديناميكادا كوپجاقتىلىقتى ىلگەرلەتۋ» تاقىرىبىمەن انتاليادا وتكەنى تۋرالى جازىلعان. اتالعان جينالىسقا 27 ەلدىڭ پارلامەنت وكىلدەرى قاتىسقان.

قوبدا قازاقتارى انمەن ءشاشۋ شاشتى - «Kaznews»


موڭعولياداعى ەڭ ءىرى قىسقى فەستيۆال حوۆد ايماعىندا ءوتتى، دەپ حابارلايدى موڭعوليانىڭ «Kaznews» اقپاراتتىق پورتالى.

اتالعان ب ا ق- تىڭ مالىمەتىنشە، اتالمىش ءىس-شاراعا قوبدا قازاقتارى دا قاتىسىپ، بيلىك وكىلدەرىنە انمەن ءشاشۋ شاشقان.

قىتاي مادەنيەتىندە قويان - ۇزاق ءومىر ءسۇرۋدىڭ سيمۆولى سانالادى - People.cn

2023-جىل - قىتايدىڭ كونە جىل ساناۋى بويىنشا دا قويان جىلى بولىپ ەسەپتەلەدى. ءداستۇرلى قىتاي مادەنيەتىندە قويان قۇت- بەرەكەنىڭ بەلگىسى عانا ەمەس، سونىمەن بىرگە ۇزاق ءومىر ءسۇرۋدىڭ سيمۆولى بولىپ تابىلادى. سونداي-اق، «قوياننىڭ ماڭگىلىك ءومىر ءدارىسىن جاساۋى» دەگەن بەلگىلى اڭىزدا بار. بۇلار قىتايدىڭ حالىقتىق مادەنيەتىندە قويان بەينەسىنىڭ ماڭىزدىلىعىن كورسەتەدى، دەپ حابارلايدى قىتايدىڭ «People.cn» اقپاراتتىق پورتالى.

«قويانمەن بايلانىستى ەجەلگى داۋىردەن بەرى كەلە جاتقان كوپتەگەن مادەني جادىگەرلەر بار. وسى «كونە مۇرالار» ارقىلى قويان جىلىنىڭ مادەني استارى مەن قۇتتى قادامىن بىرگە سەزىنەيىك!» ، دەپ جازادى قىتايلىق باسىلىم.

قازاقستاندىقتاردىڭ جازعى دەمالىستا ەڭ كوپ تاڭداعان ەلى تۇركيا بولدى- TRT

قازاقستان قوناقۇيلەر مەن مەيرامحانالارى قاۋىمداستىعىنىڭ مالىمەتتەرى بويىنشا، تۇركيا 2022-جىلدىڭ جازىندا قازاقستاندىق تۋريستەردىڭ سۇيىكتى دەمالىس ورنى بولدى.

بۇل تۋرالى وسى اپتادا تۇركيا راديو تەلەۆيزيا پورتالى حابارلاعان بولاتىن.

جازعى دەمالىس ءۇشىن ەڭ تانىمال تۋريستىك باعىتتاردىڭ تىزىمىندە بىرىككەن اراب امىرلىكتەرى، مالديۆ ارالدارى، قىرعىزستاننىڭ ىستىقكولى مەن گرۋزيا دا بار.

تۇركيالىق ب ا ق- تىڭ دەرەگىنشە، 2022-جىلى قازاقستاننان گرەكيا، يتاليا، كاتار جانە ۆەتنامعا تىكەلەي اۋە رەيستەرىنىڭ باستالۋىمەن بارۋعا بولاتىن تۋريستىك ورىنداردىڭ كارتاسى كەڭەيگەن.

ايتا كەتەيىك، 2021-جىلى قازاقستاننان شەتەلگە ساپار شەگۋشىلەر سانى 3501000 بولسا، 2022-جىلى 5557000 عا جەتتى. قازاقستان ازاماتتارى قىسقى دەمالىس ءۇشىن تايلاند، ەگيپەت، دومينيكانا، ماۆريكي، سەيشەل، كاتار، شري-لانكا جانە يتاليانى تاڭدايدى.

يران قازاقستانمەن ەكىجاقتى ارىپتەستىكتى دامىتۋعا دايىن - «Parstoday»

يراننىڭ اۋىل شارۋاشىلىعى ءمينيسترى تەھران ۇكىمەتىنىڭ قازاقستانمەن اۋىل شارۋاشىلىعى سالاسىندا ەكىجاقتى ارىپتەستىكتى دامىتۋعا دايىن ەكەنىن مالىمدەدى، دەپ حابارلايدى «Parstoday» اقپارات اگەنتتىگى.

يراندىق باسىلىم كەلتىرگەن دەرەككە سۇيەنسەك، سارسەنبى كۇنى يران-قازاقستان ورتاق ەكونوميكالىق كوميسسياسىنىڭ 18-وتىرىسىنا قاتىسۋ ءۇشىن استانا قالاسىنا بارعان سەيىت دجاۆاد ساداتينەجاد قازاقستاننىڭ اۋىل شارۋاشىلىعى مينيسترىمەن كەزدەسىپ، يراننىڭ ينجەنەرلىك كومپانيالارىنىڭ تاماق ونەركاسىبى سالاسىندا ورتاق جوبالاردى ورىنداۋعا جاقسى تاجىريبەگە يە ەكەنىن ايتقان.

ونىڭ ايتۋىنشا، يراندىق كومپانيالار قازاقستاندا كومباين مەن تراكتور جاساۋ جانە ورتاق زاۋىت سالۋ سالاسىندا جۇمىس ىستەۋگە دايىن.

«ەگەر قازاقستاندىق كومپانيالار دايىن بولسا، الداعى اپتالاردا بۇل ەلدەن يرانعا 2-3 مىڭ توننا جاڭا سويىلعان قويدىڭ ەتىن يمپورتتاۋدى باستايمىز»، - دەيدى س. ساداتينەجاد اتالعان باسقوسۋدا.

ي ي ر- نىڭ اۋىل شارۋاشىلىعى ءمينيسترى، يراننىڭ مەملەكەتتىك ساۋدا كومپانيالارى ەلدە ەگىن ەگۋ ماۋسىمى باستالعاننان وسى كۇنگە دەيىن 1 ميلليون 400 مىڭ گەكتار ەگىس القابىنان ءبيداي الۋعا كەلىسىم جاسادى. قازاقستاندىق كومپانيامەن وسى ەلدە كەلىسىمشارت بويىنشا تاپسىرىسپەن ەگىن ەگۋ سالاسىندا ارىپتەستىك جاساي الاتىنىن تىلگە تيەك ەتكەن.

سونداي-اق، وسى اپتادا «Parstoday» اقپارات اگەنتتىگىندە «قازاقستاندا ورتالىق ازيا ءوڭىرىنىڭ ءبىرىنشى پارلامەنتارالىق كونفەرەنتسياسى وتەدى» دەگەن تاقىرىپتاعى اقپارات جارىق كورگەن بولاتىن.

يراندىق اقپارات اگەنتتىگىنىڭ جۇما كۇنگى مالىمەتىنشە، ورتالىق ازيا ەلدەرىنىڭ بۇل پارلامەنتارالىق كونفەرەنتسياسى اعىمداعى جىلدىڭ 9-10- اقپان كۇندەرى قازاقستاننىڭ تۇركىستان قالاسىندا ورتالىق ازيا ەلدەرى پارلامەنتشىلەرىنىڭ قاتىسۋىمەن وتپەك. ايماق ەلدەرى پارلامەنتتەرى وكىلدەرىنىڭ ءبىرىنشى كونفەرەنتسياسىنا قاتىسۋشىلار ورتاق تاريحي-مادەني مۇرا نەگىزىندە ىنتىماقتاستىقتى كەڭەيتۋ ماسەلەلەرىن تالقىلاپ، پىكىر الماسادى دەلىنگەن.

سونىمەن قاتار، وسى اپتادا يراندىق باسىلىمدا «جاقىندا يران-قازاقستان بىرلەسكەن پالاتاسىنىڭ كوممەرتسيالىق كەڭسەسى اشىلادى» دەگەن تاقىرىپتاعى ەكى ەلدىڭ ەكونوميكالىق ىنتىماقتاستىعى جونىندەگى اقپارات جاريالاندى.

يران-قازاقستان ورتاق پالاتاسىنىڭ باسشىسى امير ابەدي الماتىدا يران-قازاقستان ورتاق پالاتاسىنىڭ كوممەرتسيالىق كەڭسەسىنىڭ اشىلاتىنىن حابارلادى.

«Parstoday» اقپارات اگەنتتىگىنىڭ مالىمەتىنشە، امير ابەدي بەيسەنبى كۇنى 18- يران-قازاقستان ەكونوميكالىق ىنتىماقتاستىق باسقوسۋ قۇجات جوباسىنىڭ ساراپشىلىق وتىرىسىندا ونىڭ جۇمىس توبىنىڭ جەتەكشىسى رەتىندە يران مەن قازاقستان اراسىنداعى ىنتىماقتاستىقتىڭ دامۋ مۇمكىندىكتەرىنە توقتالا وتىرىپ، بۇل ەلدىڭ نارىعىن يران ءۇشىن ستراتەگيالىق باعىت رەتىندە اتاپ، جاقىندا الماتىدا يران-قازاقستان بىرلەسكەن ساۋدا پالاتاسىنىڭ كوممەرتسيالىق كەڭسەسى اشىلاتىنىن اتاپ وتكەن.

سونداي-اق، يران پالاتاسىنىڭ جەكە سەكتور كومپانيالارىنىڭ ءبىرقاتارى يران مەن قازاقستاننىڭ ورتاق پالاتاسىمەن ىنتىماقتاستىقتا وتكەن بۇل وتىرىستا ىسكەرلىك كونفەرەنسيا مەن بەتپە-بەت ىسكەرلىك كەلىسسوزدەر جۇرگىزىلگەن.

اۆتور بەيسەن سۇلتان

سوڭعى جاڭالىقتار