ەلەكتروندىق تەمەكى قاراپايىم تەمەكىدەن اناعۇرلىم زياندى ءارى قاۋىپتى - پۋلمونولوگ-دارىگەر

الماتى. قازاقپارات - ەلەكتروندىق تەمەكى، ۆەيپتەردى ادام نەعۇرلىم كوپ تارتسا، سوعۇرلىم تىنىس الۋ جولىنا كەرى اسەرىن تيگىزەدى.

باسقاشا ايتقاندا، ادامدا «وكپە داعى» تۋىندايدى. بۇل تۋرالى الماتى قالاسى ەمحانالارىنىڭ مەديتسينا قىزمەتكەرلەرى وقۋشى جانە ستۋدەنتتەرمەن كەزدەسۋ بارىسىندا ايتتى، دەپ حابارلايدى قازاقپارات ءتىلشىسى.

«ەلەكتروندىق تەمەكى نەمەسە ۆەيپ، ەلەكتروندىق تاسىمالداعىش تۇرىندە مۋندشتۋك، باتارەيا جانە قىزدىرۋشى بولشەكتەن، ارنايى تولتىرعىش - سۇيىقتىقتان تۇراتىن اتومايزەردەن قۇرالعان. سۇيىقتىق حوش يىستەندىرگىش قوسىندىلاردان جانە نيكوتيننەن تۇرادى. جەكە تۇردە - كاننابينويد قۇرامىنا كىرەتىن، تەتراگيدروكاننابينولدان جاسالعان. بۇل قوندىرعىلار گليتسەرين جانە پروپيلەنگليكول نەگىزىندەگى سۇيىقتىقتى قىزدىرادى، سودان تەمەكىنىڭ ءتۇتىنى ەمەس، بۋ پايدا بولادى. بۇل زاتتار وكپەنىڭ ىشىنە تۇنىپ تۇرىپ، فيبروزعا اكەلەدى. ونى نەعۇرلىم كوپ تارتسا، سوعۇرلىم تىنىس الۋ جولىنا كەرى اسەرىن تيگىزەدى. باسقاشا ايتقاندا، «وكپە داعى» تۋىندايدى»، - دەدى س. اسفەندياروۆ اتىنداعى قازۇمۋ كافەدراسىنىڭ دوتسەنتى، الماتى قالالىق 36№ ەمحانانىڭ پۋلمونولوگ-دارىگەرى دامە سايلانوۆا.

ماماننىڭ ايتۋىنشا، ەلەكتروندىق تەمەكى قاراپايىم تەمەكىدەن اناعۇرلىم زياندى ءارى قاۋىپتى. سەبەبى مۇندا نيكوتين بۋلانىپ، اۋىز قۋىسىنىڭ شىرىشتى قاباتىن كۇيدىرەدى، بۇل ونكولوگيالىق اۋرۋلارعا اكەلەدى، تىنىس الۋ جۇيەسىن زاقىمدايدى. باس ميى تامىرلارىنىڭ اتەروسكلەروزىنا اپارادى، سەبەبى، ونى تارتقان كەزدە نيكوتين قانعا وتە جىلدام ەنەدى. سودان كەيىن بۇيرەك بەزىمەن ادرەنالين شىعىپ، ارتەريالدىق قان قىسىمى جوعارىلاپ، جۇرەك ىرعاعى قىسقارادى. بۇل جۇرەككە قاتتى جۇكتەمە ءتۇسىرىپ، سالدارىنان جۇرەك-قانتامىر اۋرۋشاڭدىعى داميدى. ادام ۇيقىسى ناشارلاپ، تەز اشۋلانادى جانە نازار اۋدارۋ قابىلەتى تومەندەيدى.

پسيحيكالىق دەنساۋلىق ورتالىعىنىڭ پسيحولوگى ەلەنا مانجيكوۆانىڭ ايتۋىنشا، ەگەر جاس وسپىرىمدەر ەلەكتروندىق تەمەكىنى ەرتە جاستان تۇتىنا باستاسا، سوعۇرلىم ولاردى تاۋەلدىلىكتەن قۇتقارۋ اۋىر بولاتىنىن جەتكىزدى.

«ەگەر جاس ءوسپىرىم ەلەكتروندىق تەمەكىنى، ماسەلەن، 13 جاستا تارتا باستاسا جانە ونى بەس جىلدان اسا تارتسا، كەيىن ونى تاستاۋ وتە قيىن. مۇندا پسيحوتەراپيانى، اككۋپۋنتۋرالىق تەراپيانى، ءتىپتى گيپنوزدى قولدانۋعا تۋرا كەلەدى. ەڭ الدىمەن، پاتسيەنتتىڭ ءوز قالاۋى بولۋى كەرەك جانە بالامەن بىرگە ونىڭ اتا-اناسىمەن جۇمىس ىستەيتىن ناركولوگ-پسيحياتر دارىگەرگە ۋاقىتىندا جۇگىنۋ قاجەت. ەمدەۋ بارىسىندا اتا-انالارى ءوز بالالارىن قولداپ، سول تاۋەلدىلىكتەن ارىلۋىنا كومەكتەسۋى كەرەك. سەبەبى، بۇل جاعدايعا بالالارىنا دۇرىس قاراماعان اتا-انالار دا كىنالى. بالاعا سونداي-اق، جۇرگەن ورتاسى اسەر ەتۋى مۇمكىن»، - دەدى ەلەنا مانجيكوۆا.

دارىگەرلەر اتا-انالارعا ەگەر بالالارى جامان ادەتتى تاستاي الماعان جاعدايدا، ماقاتايەۆ كوشەسى، 10 مەكەنجايىندا ورنالاسقان پسيحيكالىق دەنساۋلىق ورتالىعى جانىنداعى ەمحاناعا بارۋعا شاقىردى. مۇندا ماماندار ۋاقىتىندا جانە تەگىن تۇردە كونسۋلتاتيۆتىك، مەديتسينالىق، پسيحولوگيالىق كومەك كورسەتەدى. سونداي-اق، دارىگەرلەر 87017333359 نومەرى بويىنشا سەنىم تەلەفونىنا (تاۋلىك بويى) قوڭىراۋ شالۋعا نەمەسە https://cpzalmaty.kz سىلتەمەسى ارقىلى پسيحيكالىق دەنساۋلىق ورتالىعىنىڭ سايتىنا جازۋعا بولاتىنىن مالىمدەدى.