ازيا چەمپيوندارى مەن جۇلدەگەرلەرى ەلگە ورالدى
بۇل تۋرالى قازاقپارات سپورتتى دامىتۋ ديرەكتسياسىنا سىلتەمە جاساپ حابارلايدى.
سارى قۇرلىق باسەكەسىنىڭ جۇلدەگەرلەرىن اۋەجايدان قازاقستان بوكس فەدەراتسياسىنىڭ وكىلدەرى، تۋىستارى، دوستارى، جۋرناليستەر مەن جانكۇيەرلەر ءسان-سالتاناتىمەن كۇتىپ الدى.
«بۇگىن ەلدەگى جانكۇيەرلەر ادەتتەگىدەي وتە جاقسى قارسى الدى. ۇزاق ۋاقىت جولدا بولىپ، جارىستان شارشاعان بوكسشىلاردىڭ كوڭىل كۇيى كوتەرىلىپ قالدى. ءبىز حالىقتىڭ بوكستى ءالى دە جاقسى كورەتىنىن سەزدىك. مۇنىمەن توقتاپ قالمايمىز، الدا ءالى كوپ جۇمىس بار. اۋەلى حالىقتىڭ، سوسىن مەملەكەت پەن فەدەراتسيا قولداۋىنىڭ ارقاسىندا وتانداسىمىزدى تاعى قۋانتامىز، دەپ سەنەمىن»، - دەدى قازاقستان بوكس فەدەراتسياسىنىڭ باسپا ءسوز قىزمەتىنە بەرگەن سۇحباتىندا ەرلەر قۇراماسىنىڭ باس باپكەرى مىرزاعالي ايتجانوۆ.
«ءبىزدى قولداعان بارلىق جانكۇيەرگە زور العىس ايتامىن. ءبىز ءۇشىن ۋايىمداپ، جەڭىس تىلەگەندەرىڭىزدى جاقسى بىلەمىز. بانگكوكتاعى دوداعا كەلەتىن بولساق، مەن ول جەردە 57 كەلىگە دەيىنگى سالماقتا سىنعا ءتۇستىم. بۇل وليمپيادا باعدارلاماسىنا كىرەتىن سالماق. ەندى اۋىسقاندىقتان قيىنداۋ بولدى. سوعان قاراماستان، جاقسى ناتيجە كورسەتتىم دەپ ويلايمىن. ماقسات باياعىداي - وليمپيادا التىنىن جەڭىپ الۋ»، - دەدى ۇلتتىق قۇراما كوشباسشىسىنىڭ ءبىرى ماحمۇد سابىرحان.
ەسكە سالساق، بوكستان ازيا چەمپيوناتىنىڭ مەدالدار كەستەسىندە قازاقستان 2-ورىن الدى.
قۇراما ساپىنان سانجار تاشكەنباي (48 كەلى)، نۇرسۇلتان التىنبەك (54 كەلى)، ماحمۋد سابىرجان (57 كەلى) چەمپيون اتاندى.
ال، ابزال سەرىك (67 كەلى)، سابىرجان اققالىكوۆ (71 كەلى)، دياس مولجىگىتوۆ (75 كەلى) كۇمىس مەدال الدى.
ەل قۇراماسىنان تالعات سىرىمبەتوۆ (60 كەلى)، مۇحاممەدسابىر بازارباي ۇلى (63,5 كەلى)، ەراسىل جاكپەكوۆ (80 كەلى)، ەرحات بەكزات (92 كەلى)، امانات سابىرعالي (92 كەلىدەن جوعارى) قولا جۇلدەنى قاناعات تۇتتى.
ازيا چەمپيونى اتانعان قازاقستاندىق بوكسشىلار جارىس تۋرالى پىكىر ءبىلدىردى.