قازاقستاندا پاندەميادان كەيىنگى تۋريزم قالاي دامىپ جاتىر

None
بۋراباي. قازاقپارات - مادەنيەت جانە سپورت مينيسترلىگى بۋراباي كۋرورتىندا كوشپەلى وتىرىس وتكىزىپ، وتاندىق تۋريزمدى دامىتۋدىڭ وزەكتى ماسەلەلەرىن تالقىلادى، دەپ حابارلايدى قازاقپارات ءتىلشىسى.

8 ميلليون قازاقستاندىق ەل ىشىندە ساياحاتتاعان

مادەنيەت جانە سپورت ۆيتسە-ءمينيسترى ەرجان ەركىنبايەۆتىڭ ايتۋىنشا، تۋريزم يندۋسترياسى پاندەميادان كەيىن قالپىنا كەلە باستادى.

«كەيىنگى 9 ايدا قازاقستاندىق ىشكى تۋريستەر سانى 6,5 ميلليون بولدى. 2022-جىلدىڭ قورىتىندىسى 8 ميلليون شاماسىندا بولادى دەپ وتىرمىز. بۇل - ءبىزدىڭ 2025-جىلعا قويعان كورسەتكىش ەدى. ەلىمىزدەگى تۋريست سانى كوبەيدى، سوعان سايكەس جاتىن ورىن سانى دا ارتتى. جىل باسىنان بەرى 11 مىڭ جاتىن ورىن نەمەسە 5 مىڭ قوناق ءۇي ءنومىرى جاڭادان پايدالانۋعا بەرىلدى»، - دەدى مادەنيەت جانە سپورت ۆيتسە-ءمينيسترى ەرجان ەركىنبايەۆ.

سپيكەردىڭ ايتۋىنشا، قازاقستاننىڭ بارلىق ايماعىندا تۋريزم كورسەتكىشتەرى وسكەن. اتىراۋ وبلىسىندا وتكەن جىلى تۋريستەر سانى 3 ەسەگە ارتتى، بۇل وڭىردەگى بيزنەس تۋريزمنىڭ قالپىنا كەلگەنىن، دامىپ جاتقانىن بىلدىرەدى.

«ەلدەگى ءاربىر ءتورتىنشى تۋريستىڭ ۇلتتىق پاركتەرگە بارعانى قۋانتادى. وزدەرىڭىز بىلەسىزدەر، رەسپۋبليكامىزدا 14 ۇلتتىق پارك تىركەلگەن، وندا ورمان، مۇزدىقتار، كول مەن قۇم سەكىلدى پلانەتانىڭ بارلىق ەكوجۇيەسى بار. وتكەن جىلى ۇلتتىق پاركتەرگە 2 ميلليون تۋريست بارعان، بۇل - ابسوليۋتتىك رەكورد»، - دەدى ە. ەركىنبايەۆ.

سونىمەن بىرگە، وتكەن جىلدىڭ توعىز ايىندا ەلىمىزگە 610 مىڭ شەتەلدىك تۋريست كەلگەن. مادەنيەت مينيسترلىگى ەلگە كەلەتىن شەتەلدىك تۋريستەر سانىن 4 ميلليونعا جەتكىزۋدى جوسپارلاپ وتىر. بۇل ەكونوميكانىڭ بارلىق سالالارىنىڭ دامۋىنا زور سەرپىن بەرەدى.

قازاقستان تۋريزمدى دامىتۋ بويىنشا 66-ورىندا تۇر

قازاقستان الەمنىڭ باسقا ەلدەرى سياقتى تۋريزم يندۋسترياسىن باعالاۋ ءۇشىن دۇنيەجۇزىلىك ەكونوميكالىق فورۋمنىڭ ساياحات پەن تۋريزمدى دامىتۋدىڭ جاھاندىق يندەكسىنە باعدارلانادى.

مىسالى، 2021-جىلى قازاقستان ءوز پوزيتسياسىن جاقسارتىپ، 117 ەل اراسىندا 66-ورىنعا يە بولدى، 2019-جىلى - 140 ەل ىشىندە 80-ورىندا ەدى. ەلىمىز «باعالىق باسەكەگە قابىلەت» (1-ورىن)، «تۋريزمنىڭ ماۋسىمدىلىعى» (26-ورىن)، «تابيعي رەسۋرستار» (33-ورىن)، «يۋنەسكونىڭ بۇكىلالەمدىك مادەني مۇرا وبەكتىلەرىنىڭ سانى» (42-ورىن) كورسەتكىشتەرى بويىنشا جوعارى باعا العان.

سونىمەن قاتار، ەلىمىزدىڭ ءتۋريزمىن باعالاۋ بويىنشا باسقا دا بەدەلدى الاڭدار بار، وندا دا قازاقستان جىل سايىن جوعارى ورىنداردان كورىنەدى.

«بيىل قازاقستان ءبىرقاتار بەدەلدى ۇيىمدارعا ءتوراعالىق ەتەدى. ش ى ۇ، ت م د، و ت گ، تۇركسوي قامقورلىعىمەن رەسمي كەزدەسۋلەر مەن يميدجدىك ءىس-شارالار وتكىزۋ جوسپارلانعان. سونىمەن قاتار، جىل سوڭىنا دەيىن «Tourism Awards» سىيلىعىن جاڭا فورماتتا ۇيىمداستىرۋ جانە سالانىڭ ۇزدىك وكىلدەرىن ماراپاتتاۋ ءداستۇرىن جاڭعىرتامىز»، - دەدى ە. ەركىنبايەۆ.

تۋريزم جوبالارىن سۋبسيديالاۋ 10 جىلعا دەيىن ۇزارادى

«تۋريزمدەگى ينۆەستيتسيالىق الەۋەتتى دامىتۋعا باسا ءمان بەرىلەدى. ءبىزدىڭ مينيسترلىك «قازاقتۋريزم» كومپانياسىمەن بىرلەسىپ، ينۆەستيتسيالىق جوبالار پۋلىن قالىپتاستىردى. وتكەن جىلدىڭ قورىتىندىسى بويىنشا 40 ميلليارد تەڭگەگە 138 جوبا ىسكە اسىرىلدى. بيىل 288 ميلليارد تەڭگەگە 115 جوبانى ىسكە اسىرۋ جوسپارلانىپ وتىر»، - دەدى ۆيتسە-مينيستر.

سونىمەن بىرگە، سپيكەر مينيسترلىككە قوناق ءۇي باسشىلارىنان وتىنىشتەر كەلىپ تۇسەتىنىن ايتتى. قازىرگى جەڭىلدەتىلگەن نەسيەلەۋ مەحانيزمى بەلگىلەنگەن مەرزىمدە شىعىندى اقتاۋعا مۇمكىندىك بەرمەيدى. ورتا ەسەپپەن قوناق ءۇي قۇنى 10 جىلدا وتەلەدى.

«وسىعان بايلانىستى تۋريزم جوبالارىن سۋبسيديالاۋ مەرزىمدەرىن 5 جىلدان 10 جىلعا دەيىن ۇزارتۋ، سونداي-اق قارجىلاندىرۋ ليميتتەرىن 5 ميلليارد تەڭگەگە دەيىن ۇلعايتۋ قاجەت. ءتيىستى ۇسىنىستى ۇلتتىق ەكونوميكا مينيسترلىگىنە جىبەردىك»، - دەدى ۆيتسە-مينيستر.

ۆيزيت ورتالىقتاردى سالۋ دا وتە وزەكتى ماسەلە بولىپ وتىر. مۇنداي ورتالىقتار تۋريستەر ءۇشىن ايالداما جانە دەمالىس ورنى رەتىندە ماڭىزدى ورىن بولادى. ولار ۇيىمداسقان تۋريزم مادەنيەتىن ارتتىرۋدا ۇلكەن ءرول اتقارادى. سوڭعى 3 جىلدا ەلىمىزدە جەكە ينۆەستيتسيالار ەسەبىنەن 7 ۆيزيت-ورتالىق سالىندى. جاقىن ارادا وسىنداي ورتالىقتار «التىن ەمەل»، «شارىن» ۇلتتىق پاركتەرىندە، سونداي-اق «تۇرگەن» جانە «بۋتاكوۆكا» شاتقالدارىندا اشىلماق.

فەرمەرلەرگە گلەمپينگ سالۋعا رۇقسات بەرىلەدى

ميينسترلىكتىڭ حابارلاۋىنشا، اگروتۋريزم نىساندارى فرانسيادا، گەرمانيادا، اۆستريادا، ارگەنتينادا، بەلارۋستە تۋريستەر اراسىندا وتە تانىمال. ال، قازاقستاندا اۋىلدىق جەرلەردە كەمپينگتەر مەن قوناق ۇيلەر قۇرۋ بويىنشا زاڭنامالىق شەكتەۋلەر بار.

«ستاتيستيكا بويىنشا ەلىمىزدە 219 مىڭ فەرمەرلىك شارۋا قوجالىقتارى بار. وسى ورايدا، فەرمەرلەرگە اۋىل شارۋاشىلىعى جەرلەرىنىڭ %10 دان اسپايتىن كولەمىن تۋريستەرگە قىزمەت كورسەتۋ ءۇشىن قوناق ۇيلەر مەن گلەمپينگتەر سالۋعا رۇقسات بەرۋدى ۇسىنامىز»، - دەدى ەرجان ەركىنبايەۆ.

مينيسترلىكتىڭ بولجاۋىنشا، فەرمەرلىك شارۋاشىلىقتاردىڭ كەم دەگەندە %1 تۋريستەردى ورنالاستىرۋمەن اينالىسسا، كەم دەگەندە 2 ادامدى جۇمىسقا السا، جىل سايىن 6,6 مىڭ ادام جۇمىس ورنىمەن قامتىلادى.

وتكەن جىلى ەلىمىزدىڭ 8 وڭىرىندە (الماتى، اقمولا، اقتوبە، ماڭعىستاۋ، پاۆلودار، تۇركىستان وبلىستارى جانە الماتى، شىمكەنت قالالارى) 28 گلەمپينگ كەشەنى اشىلعان.

جاقىن ارادا وسىنداي كەشەندەر «التىن ەمەل» ۇلتتىق پاركىندە، قارقارالى اۋدانىندا پايدا بولادى. سونداي-اق، اقتوبە، جامبىل، سولتۇستىك قازاقستان وبلىستارىندا وسىنداي نىسانداردىڭ قۇرىلىسى جوسپارلانعان.

Kids Go Free ارقىلى 2-3 مىڭ بالاعا تەگىن اۆيابيلەت بەرىلەدى

وتكەن جىلى Kids Go Free باعدارلاماسىن 700 وتباسى پايدالاندى، 1,5 مىڭ بالا ۇشاقپەن تەگىن ۇشتى. 421 شەتەلدىك ساياحاتشىعا تۋريستىك پاكەت قۇرامىندا سۋبسيديا تولەندى. ساتىپ الىنعان 2 تۋراۆتوبۋس بويىنشا بيزنەس شىعىندارىنىڭ ءبىر بولىگىن وتەۋ ماقۇلداندى. سونداي-اق، زەرەندى اۋدانىنداعى «پارۋس» بالالار ساۋىقتىرۋ ورتالىعى بويىنشا وتەماقى الۋ ءوتىنىمى ماقۇلدانعان.

وعان قوسا، مينيسترلىك قولداۋ شارالارىنىڭ تيىمدىلىگىن ارتتىرۋ ءۇشىن تالاپتار مەن تەتىكتەردى وڭايلاتۋ جۇمىستارىن جالعاستىرىپ كەلەدى. اكىمدىكتەر وتەۋ تۋرالى وتىنىمدەردى بيىلعى 1- ناۋرىزعا دەيىن جولداۋى قاجەت.

بۇل رەتتە مينيستر اسحات ورالوۆ Kids Go Free بويىنشا مىڭ جارىم بالانىڭ وتە از ەكەنىن ايتتى.

«كەم دەگەندە 2-3 مىڭ بالا بۇل جەڭىلدىكتى پايدالانۋى كەرەك. ماركەتينگ پەن جارنامانى كوبەيتۋ كەرەك، ويتكەنى كوپتەگەن ادامدار بۇل باعدارلاما تۋرالى بىلمەيدى. ەل ىشىندە رەسمي وپەراتورلار ارقىلى تۋر ساتىپ العان وتباسىلاردىڭ بالالارىنا تەگىن اۆيابيلەت بەرىلەدى. مۇندا بارلىق زاڭ تالاپتارى ساقتالۋى كەرەك. تولەم مەرزىمىن 6 ايدان 6 جۇمىس كۇنىنە قىسقارتۋ قاجەت. بۇل ەل ىشىندەگى وتباسىلىق دەمالىس مۇمكىندىكتەرىن كەڭەيتەدى»، - دەدى اسحات ورالوۆ.

قازاقستاندا تاۋ شاڭعىسى تۋريزمى ءۇشىن جاڭا نىساندار سالۋ كەرەك

كەيىنگى جىلدارى ەلىمىزدە تاۋ شاڭعىسى كۋرورتتارىنىڭ جۇمىسىندا وڭ ديناميكا بايقالادى. «وي-قاراعاي»، «Ak Bulak» جانە «شىمبۇلاق» كۋرورتتارىنا بارۋشىلار سانى جىل سايىن %20 ءوسىپ كەلەدى. جالپى، وسى ماۋسىمدا تۋريستەردىڭ جالپى سانى 1,5 ميلليون ادامعا جەتەدى. بۇل شاڭعى تۋريستەرىنىڭ سانى جاعاجاي تۋريستەرىنىڭ سانىمەن تەڭەستىرىلگەنىن راستايدى.

مادەنيەت مينيسترلىگىنىڭ ايتۋىنشا، ءتۋريزمنىڭ بۇل ءتۇرى مول ەكونوميكالىق تيىمدىلىك پەن تابىس اكەلەدى. جاعاجاي تۋريسىنە قاراعاندا تاۋشاڭعى ءتۋريسى ورتا ەسەپپەن 5 ەسە كوپ قارجى جۇمسايدى، بۇل - كۇنىنە 250 ا ق ش دوللارى.

«الايدا، قازىر جۇمىس ىستەپ تۇرعان كۋرورتتارعا ۇلكەن جۇكتەمە ءتۇسىپ وتىر. مىسالى، كۇنىنە 6 مىڭ ادامدى قابىلداي الاتىن «شىمبۇلاق» كۋرورتىنا مەرەكە جانە دەمالىس كۇندەرى 12,5 مىڭ ادام بارادى. كورشى ەلدەردە دە وسى سەگمەنت بەلسەندى دامىپ كەلەدى. مىسالى، سوڭعى 10 جىلدا گرۋزيادا 5 تاۋ شاڭعىسى كۋرورتى سالىندى. 2019-جىلى وزبەكستاندا جاڭا تاۋ شاڭعىسى كۋرورتى پايدا بولدى. وسىعان بايلانىستى، قازاقستاندا تاۋ شاڭعىسى ءتۋريزمى ءۇشىن جاڭا نىساندار سالۋ كەرەك»، - دەدى ۆيتسە-مينيستر ە. ەركىنبايەۆ.

سوڭعى جاڭالىقتار