سىيلىققا كولىك ۇتتىڭىز: استانالىقتاردى الداعان الاياقتار ۇستالدى

استانا. قازاقپارات - استانا قالاسى سارىارقا اۋداندىق پ ب كريمينالدىق پوليتسيا ءبولىمىنىڭ قىزمەتكەرلەرى 23 جانە 24 جاستاعى ەكى كۇدىكتىنى انىقتادى، دەپ حابارلايدى قازاقپارات polisia.kz تەلەگرام كانالىنا سىلتەمە جاساپ.

ەر ادامدار ينتەرنەت-دۇكەننىڭ تۇتىنۋشىلار بازاسىنا قول جەتكىزگەن. ءسويتىپ، تۇتىنۋشىلارعا تەلەفون سوعىپ، وزدەرىن دۇكەن قىزمەتكەرى رەتىندە تانىستىرادى دا، اۆتوكولىك ۇتىپ العاندارىن حابارلايدى. ءبىراق، «جۇلدەنى الۋ ءۇشىن تىركەۋ، كەدەندىك راسىمدەۋ جانە تەحنيكالىق تەكسەرۋدەن ءوتۋ ءۇشىن بەلگىلى ءبىر سومانى تولەۋ كەرەك» دەپ الداعان.

زارداپ شەككەندەر 500 مىڭنان 14 ميلليون تەڭگەگە دەيىنگى قاراجات جىبەرگەن. قازىرگى ۋاقىتتا ۇستالعاندار قاماۋدا وتىر. ولار ينتەرنەت-الاياقتىقتىڭ 16 فاكتىسى بويىنشا كۇدىككە ءىلىندى. قازاقستان رەسپۋبليكاسى ق ك 190-بابىنىڭ 2-بولىگىنە سايكەس تەرگەۋ امالدارى جۇرگىزىلىپ جاتىر. سونىمەن قاتار، ولاردىڭ ەلوردا اۋماعىندا وسىعان ۇقساس قىلمىستارعا قاتىستىلىعى تەكسەرىلەدى.