ەلىمىزگە قاي مەملەكەتتەردەن تۋريستەر اعىلۋى مۇمكىن

None
استانا. قازاقپارات - قالاداعى ءتۋريزمدى دامىتۋ ورتالىعى قاۋىمداستىعىنىڭ ديرەكتورى تاتيانا ۆەرنيتسكايا قازاقستانعا قاي ەلدەردىڭ تۋريستەرى كوپتەپ كەلۋى مۇمكىن ەكەنىن ايتتى، دەپ حابارلايدى قازاقپارات ءتىلشىسى.

«ەلىمىزگە قازاقستاننىڭ سولتۇستىك بولىگىمەن شەكتەسەتىن، ياعني رەسەي اۋماعىنان كەلەتىن تۋريستەر اعىنىن ەسكەرۋ كەرەك. ەكاتەرينبور، ومبى، تۇمەن، قورعان، نوۆوسىبىر وبلىستارىندا 32 ميلليون رەسەيلىك تۇرادى. سوندىقتان ولاردى ەلىمىزگە كەلەتىن تۋريست رەتىندە قاراستىرۋعا بولادى»، - دەدى ت. ۆەرنيتسكايا اگەنتتىك ءتىلشىسىنىڭ سۇراعىنا جاۋاپ بەرە وتىرىپ.

وسى ورايدا ساراپشى بۇل باعىتتا بىزگە كىمدەر باسەكەلەس بولىپ تۇرعانىن ايتتى.

«ءبىراق ولار استانانى قازان قالاسىمەن سالىستىراتىنىن ءتۇسىنۋىمىز كەرەك. قازان قالاسى دا ادامداردى وزىنە كوپتەپ تارتىپ جاتىر. بۇل شاھارداعى قوناقۇيلەردىڭ سانى بىزدەگىدەن كەم ەمەس. الايدا بىزدە تۋريستەرگە دەگەن كوزقاراس مۇلدەم باسقا. ويتكەنى قازان قالاسى ەكسكۋرسيالىق باعدارلاما جاعىنان بىزدەن الدا كەلە جاتىر. كوپشىلىك ولاردىڭ تاريحىنا قىزىعىپ جاتادى، ءبىراق ءبىزدىڭ دە باي تاريحىمىز، قۇندىلىقتارىمىز، مۇرامىز بار. سوندىقتان ءبىز دە وسى تۋريستەردى كوپتەپ تارتا الامىز»، - دەدى ول.

ت. ۆەرنيتسكايانىڭ پايىمىنشا، بۇل سالادا يران جاعىنان دا تۋريستەردى شاقىرۋعا بولادى.

«بۇل سالاداعى اۋقىمدى نارىق رەتىندە يراندى دا ەسكەرگەن ءجون. وسى ورايدا ۇشاق رەيستەرىن رەتكە كەلتىرۋ كەرەك. قىتايلىقتار ەلىمىزگە تۋريست رەتىندە كەلە باستادى، ال يراندىقتار تەك اقتاۋعا بارىپ جاتىر. ولاردىڭ قارجىسى ەلىمىزدىڭ باسقا وڭىرلەرىنە دە جەتكەنىن قالايمىز»، - دەدى ساراپشى.

سوڭعى جاڭالىقتار