يرانداعى ازەربايجان ەلشىلىگىنە جاسالعان شابۋىل لاڭكەستىك ارەكەت ەمەس - يران س ءى م باسشىسى

استانا. قازاقپارات - يراننىڭ ارنايى قىزمەتى مەن قاۋىپسىزدىك قىزمەتى جۇما كۇنى يرانداعى ازەربايجان ەلشىلىگىندە بولعان اتىس «تەررورلىق ارەكەت نەمەسە ۇيىمداسقان قىلمىس ەمەس»، جەكە ادام تاراپىنان جاسالعان قاستاندىق، دەگەن قورىتىندىعا كەلدى، دەپ مالىمدەدى يراننىڭ سىرتقى ىستەر ءمينيسترى حوسەين امير ابدوللاحيان، دەپ حابارلايدى قازاقپارات شينحۋا اگەنتتىگىنە سىلتەمە جاساپ.

ابدوللاحيان يرانداعى ازەربايجان ەلشىسىمەن بىرلەسىپ باسپا ءسوز جيىنىن وتكىزىپ، يران پرەزيدەنتى ەبراحيم رايسي وقيعانى تەرگەپ، كىنالىلەردى جاۋاپقا تارتۋدى بۇيىرعانىن اتاپ ءوتتى.

سول كۇنى يران س ءى م باسشىسى ازەربايجاننىڭ سىرتقى ىستەر ءمينيسترى دجەيحۋن بايراموۆپەن تەلەفون ارقىلى تىلدەسىپ، بۇل وقيعا ەكى ەلدىڭ قارىم-قاتىناسىنا سىزات تۇسىرمەۋى كەرەگىن اتاپ ءوتتى. سونداي-اق ول ەكى ەلدىڭ قاۋىپسىزدىك قىزمەتىنە وقيعانى بىرلەسە تەرگەۋدى ۇسىندى.

يرانداعى ازەربايجان ەلشىلىگىندە 27- قاڭتار تاڭەرتەڭ اتىس بولىپ، ديپلوماتيا وكىلدىگىنىڭ كۇزەت باسشىسى قازا تاپتى، ال ونىڭ ەكى ارىپتەسى جاراقات الدى. يران پوليتسياسى، شابۋىل جاساعان ادامنىڭ ءسوزىن نەگىزگە الا وتىرىپ، شابۋىل جەكە ادامعا قاتىستى جاسالعان قاستاندىق، دەپ مالىمدەدى. ازەربايجاننىڭ سىرتقى ىستەر ءمينيسترى ەلشىلىك قىزمەتكەرلەرى مەن ولاردىڭ وتباسى مۇشەلەرىن ەۆاكۋاتسيالاۋ ءۇشىن قاجەت شارالاردى جاساۋدى جوسپارلاپ وتىرعانىن جەتكىزدى. ازەربايجان پرەزيدەنتى يلحام اليەۆ الەۋمەتتىك جەلىدە اتىستى «تەراكت» دەپ ويلايتىنىن جانە تەز ارادا كىنالىلەردى جازالاۋدى تالاپ ەتەتىنىن جازدى.

ايتا كەتەيىك، كەشە قازاقستاننىڭ سىرتقى ىستەر مينيسترلىگى يرانداعى ازەربايجان ەلشىلىگىنە جاسالعان شابۋىلدى قاتاڭ ايىپتادى.