ۇلتتىق كەڭەسكە نوبەل لاۋرەاتتارى مەن شەتەلگە كەتكەن قازاق عالىمدارى شاقىرتىلدى

None
استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك عىلىم جونىندەگى ۇلتتىق كەڭەسكە نوبەل لاۋرەاتتارى مەن شەتەلگە كەتكەن قازاق عالىمداردى شاقىرعان.

بۇل تۋرالى ول Jibek Joly تەلەارناسىنا بەرگەن سۇحباتىندا https://youtu.be/qdEyzF4dGIA ايتتى، دەپ حابارلايدى قازاقپارات ءتىلشىسى.

«عىلىم جانە تەحنولوگيالار جونىندەگى ۇلتتىق كەڭەستىڭ قۇرامىندا اتاقتى فيزيكتەر، نوبەل سىيلىعىنىڭ لاۋرەاتتارى دا كىردى. دجوردج سمۋت دەگەن اتاقتى فيزيك بار. 2006-جىلى فيزيكا سالاسىنداعى نوبەل سىيلىعىن العان. سول كىسىلەر ەندى دۇنيەجۇزىندە بولىپ جاتقان جەتىستىكتەردى تىكەلەي پرەزيدەنتكە بايانداپ تۇرادى»، - دەيدى مينيستر.

ونىڭ ايتۋىنشا، 1930-جىلى قۇرىلعان وسىنداي ۇلتتىق كەڭەستىڭ ارقاسىندا ا ق ش اتوم بومباسىنا قول جەتكىزگەن.

«وسى كەڭەستىڭ جەتەگىمەن Apollo ميسسياسى ادامداردى ايعا اپاردى. ا ق ش- تىڭ كەيىنگى 50-70-جىلداعى تەحنولوگيا مەن عىلىم سالاسىنداعى ۇستەمدىگىن وسى كەڭەس قامتاماسىز ەتتى»، - دەيدى ساياسات نۇربەك.

مينيستر بۇل كەڭەستىڭ قۇرامىنا تانىمال شەتەلدىك عالىمدارمەن بىرگە وتاندىق ماماندار جانە قانداس عالىمدار كىرەتىنىن ايتادى.

«كەڭەستىڭ قۇرامى ۇزاق مەرزىمگە قۇرىلمايدى. ءار ءۇش جىل سايىن جاڭارىپ وتىرادى. ونىڭ قۇرامىنا ءوزىمىزدىڭ وتاندىق عالىمدار دا كىرەدى. سونداي-اق، قازاقتىڭ ىشىنەن شىققان، ءبىراق شەتەلدە مىقتى لابوراتوريالاردى باسقارىپ وتىرعان عالىمدار بار. مىسالى، مارات ساپاربايەۆ دەگەن وتانداسىمىز توقسانىنشى جىلدارى ءال-فارابي اتىنداعى ۇلتتىق ۋنيۆەرسيتەتتەن تۇلەپ ۇشقان. قازىر پاريجدە فرانسيانىڭ جەتەكشى بيولوگيا جانە بيوتەحنولوگيا لابوراتورياسىن باسقارىپ وتىر نەمەسە جانىبەك الپىشيەۆ دەگەن سەمەي قالاسىنىڭ تۋماسى بار. قازىر اۋستريا عىلىم جانە تەحنولوگيا ينستيتۋتىنىڭ جەتەكشى سۋپەركوندەنساتورلار لابوراتورياسىن باسقارادى. وسىنداي مىقتى-مىقتى ازاماتتارىمىزدى دا ءبىزدىڭ كەڭەستىڭ قۇرامىنا شاقىرىپ وتىرمىز»، - دەدى ۆەدومستۆو باسشىسى.

سوڭعى جاڭالىقتار