ساياسات نۇربەك بيزنەستىڭ بەتىن عىلىمعا قالاي بۇراتىنىن ايتتى
سۇحبات بارىسىندا ول عالىمداردى الەۋمەتتىك تۇرعىدا قولداۋ شارالارى قالاي ىسكە اسىپ جاتقانىن باياندادى.
«عىلىم جانە جوعارى ءبىلىم مينيسترلىگى قۇرىلماي تۇرىپ، التى اي بۇرىن عالىمداردىڭ الەۋمەتتىك پاكەتىن وتە جاقسى كۇشەيتتىك. عالىمداردىڭ ەل بويىنشا ورتاشا ايلىعى ەكى ەسە ءوستى - 152 مىڭ تەڭگەدەن 272 مىڭ تەڭگەگە دەيىن ارتتى. مۇنىڭ ءوزى جامان ەمەس. بىلتىرعى قىركۇيەكتەن بەرى ەلدەگى ىرگەلى عىلىممەن اينالىساتىن 11 عىلىمي ينستيتۋتتاعى 1200 جەتەكشى عالىمنىڭ ايلىعىن بازالىق قارجىلاندىرۋدان تىكەلەي قارجىلاندىرۋعا اۋىستىردىق. الداعى ءۇش جىلدا عىلىمدى دامىتۋعا بولىنەتىن قاراجات 3,5 ارتتىرىلدى. بۇعان دەيىن ءۇش جىلدا ءبىر رەت نەمەسە اراكىدىك ءبولىنىپ كەلگەن گرانتتار جىل سايىن تولىعىمەن جاڭارىپ وتىرادى. 1114 جاس عالىمعا جەكە كوڭىل ءبولىنىپ، جەكە گرانتتار بەرىلدى. بىلتىردان بەرى عىلىمي زەرتتەۋلەردى جالعاستىرۋ ءۇشىن «جاس عالىم» گرانتىن بەرىپ باستادىق. ونىڭ مولشەرىن ايىنا 500 مىڭ تەڭگە دەپ بەلگىلەدىك. ويتكەنى، جاس عالىمدار قالاي تىرشىلىك ەتەم دەپ، نەسيەنى قالاي تولەيمىن دەپ ويلاماي، عىلىممەن عانا شۇعىلدانۋى كەرەك»، - دەدى مينيستر.
سونداي-اق، ول بيىل «عىلىم جانە تەحنولوگيالىق ساياسات تۋرالى» جاڭا زاڭ قابىلداناتىنىن ەسكە سالدى.
«ءبىز العاش رەت سالىق كودەكسى مەن بيۋجەت كودەكسىنە، ينۆەستيتسيالىق كودەكسكە كىرىپ وتىرمىز. ونداعى ويىمىز وتە قاراپايىم. بۇل حالىقارالىق تاجىريبەدە، جىلدام دامىپ كەلە جاتقان ەلدەردىڭ بارىندە باياعىدان قولدانىلىپ كەلەدى. بۇل - سالىق جۇيەسىندەگى «سۋپەر شەگەرىمدەر» تەتىگى. بيزنەسكە، كومپانيالارعا، ونەركاسىپكە عىلىمي ازىرلەمەلەرمەن اينالىسۋ ءتيىمدى بولاتىنداي، عىلىمي مازمۇنى باسىم ءونىم شىعارۋ ءتيىمدى بولاتىنداي، قوسىلعان قۇن تىزبەگىنە ەنۋ ءتيىمدى بولاتىنداي جاعداي جاسالادى دەگەن ءسوز. بۇل «عىلىم جانە تەحنولوگيالىق ساياسات تۋرالى» جاڭا زاڭنىڭ سۇلباسىندا ءقازىردىڭ وزىندە توسەلگەن. بيىل وسى زاڭدى قابىلداۋىمىز كەرەك. سول زاڭدا بيزنەستىڭ بەتىن عىلىمعا بۇرۋ مىندەتى، عىلىمدى بيزنەستىڭ سۇرانىسىنا ساي بولاتىنداي ەتىپ دايىنداۋ مىندەتى، ونى جەتكىلىكتى قارجىمەن، تەحنولوگيالىق قۇرالدارمەن قارۋلاندىرۋ مىندەتى جۇكتەلىپ وتىر. سوندىقتان، بىزدەگى تەحنولوگيالىق زەرتحانالاردىڭ ءبارىن قايتا جابدىقتاۋدى باستاپ، ۇلتتىق سالالىق ۇجىمدىق زەرتحانالاردى قالىپتاستىرۋ تسيكلىن اياقتاپ جاتىرمىز»، - دەدى ساياسات نۇربەك.