اقمولا تۇرعىنى تاعامعا قوساتىن كوكناردەن ەسىرتكى جاساعان

استانا. قازاقپارات - پوليتسيا اقمولا تۇرعىنىنان اسا ءىرى مولشەردە ەكستراكتسيالىق اپيىن تاركىلەدى، دەپ حابارلايدى قازاقپارات polisia.kz تەلەگرام كانالىنا سىلتەمە جاساپ.

بۋراباي اۋدانى پ ب ەسىرتكى قىلمىسىنا قارسى ءىس-قيمىل بولىمشەسىنىڭ قىزمەتكەرلەرى 25- قاڭتار كۇنى بۇرىن سوتتالعان شۋچينسك قالاسىنىڭ 38 جاستاعى تۇرعىنىن ۇستادى. ول جۇمىس ورنىندا تاعامعا قوساتىن كوكناردەن ەكستراكتسيالىق اپيىن جاساپ، ونى ءوزى پايدالانعان.

كۇدىكتى قوناق ۇيلەردىڭ بىرىندە اعاش ۇستاسى بولىپ جۇمىس ىستەگەن. ءتارتىپ ساقشىلارى ەسىرتكى جاساۋعا ارنالعان ىدىستاردى، دايىندالعان اپيىن سالىنعان پوليمەرلى بوتەلكەلەردى، سونداي-اق ينەلەردى تاركىلەدى. ساراپتاما تاعايىندالىپ، ەكستراكتسيالىق اپيىننىڭ كولەمى 2,5 ليتردەن اساتىنى انىقتالدى.

ۇستالعان ادامعا قاتىستى ق ر ق ك 296-بابى 3-بولىگى بويىنشا سوتقا دەيىنگى ءىس جۇرگىزۋ باستالدى (ەسىرتكى قۇرالدارىن ءىرى مولشەردە زاڭسىز ساقتاۋ).