ق ر سىرتقى ىستەر مينيسترلىگى يرانداعى ازەربايجان ەلشىلىگىنە جاسالعان شابۋىلدى قاتاڭ ايىپتادى
قازاقستان رەسپۋبليكاسىنىڭ سىرتقى ىستەر مينيسترلىگى 27- قاڭتاردا ازەربايجان رەسپۋبليكاسىنىڭ تەگەرانداعى ەلشىلىگىنە جاسالعان قارۋلى شابۋىلدى قاتاڭ ايىپتايدى. بۇل شابۋىلدان ديپلوماتيالىق وكىلدىك قىزمەتكەرلەرى جارالاندى جانە قازا تاپتى.
«قازاقستان ديپلوماتيالىق ميسسيالار مەن ونىڭ وكىلدەرىنە قاتىستى زورلىق-زومبىلىق پەن اگرەسسيا اكتىلەرىنىڭ كەز كەلگەن كورىنىسى قابىلدانبايدى دەپ سانايدى. مۇنداي شابۋىلدار حالىقارالىق قۇقىقتىڭ نەگىزدەرى مەن نورمالارىن بۇزادى جانە جالپىعا بىردەي ايىپتالۋعا جاتادى دەپ سانايمىز. ازەربايجاننىڭ باۋىرلاس حالقىنا، سونداي-اق قازا تاپقان ازەربايجان رەسپۋبليكاسىنىڭ ازاماتى ورحان اسكەروۆتىڭ تۋىستارى مەن جاقىندارىنا قايعىرا كوڭىل ايتامىز. زارداپ شەككەن ادامداردىڭ تەزىرەك ساۋىعىپ كەتۋىن تىلەيمىز» دەلىنگەن س ءى م حابارلاماسىندا.
سىرتقى ساياسي ۆەدومستۆو يران يسلام رەسپۋبليكاسىنىڭ بيلىگى بۇل وقيعانى مۇقيات تەرگەپ، كىنالىلەردى جازالاۋ ءۇشىن ءتيىستى شارالار قولداناتىنىنا سەنىم ءبىلدىردى.