استانادا ءتورت كۇندە قانشا شەتەلدىك كولىك زاڭداستىرىلدى
شارا باستالعالى ەلوردادا 218 شەتەلدىك كولىك رەسمي تىركەۋدەن ءوتتى، دەپ حابارلايدى قازاقپارات ءتىلشىسى.
«اكسيا باستالعالى ەلوردادا 218 شەتەلدىك اۆتوكولىك زاڭداستىرىلىپ، ءنومىر بەرىلدى. شامامەن 445 شەتەلدىك كولىكتى تىركەۋگە رۇقسات بەرىلدى. ءتورت كۇن ىشىندە 2,5 مىڭعا جۋىق ازاماتقا پوليتسيا قىزمەتكەرلەرىنىڭ كەڭەسى ۇسىنىلدى. سونداي-اق، مامانداندىرىلعان ح ق و قىزمەتكەرلەرى «ەلەكتروندى ۇكىمەت پورتالى» ارقىلى كەلىپ تۇسكەن 2800 دەن استام ءوتىنىشتى قارادى»، - دەگەن اقپارات تاراتتى ەلوردا پوليتسياسىنىڭ باسپا ءسوز قىزمەتى.
كولىكتى زاڭداستىرۋ ءوتىنىشىن «ەلەكتروندىق ۇكىمەت» پورتالى ارقىلى بەرۋگە بولادى.
ەرەجەگە سايكەس اۆتوموبيل قازاقستان اۋماعىنا 2022-جىلدىڭ 1- قىركۇيەگىنە دەيىن اكەلىنۋى ءتيىس. سوڭعى تىركەلگەن جەردەگى ەسەپتەن شىعارىلۋى جانە ىزدەۋدە بولماۋى كەرەك. ودان بولەك، شەتەلدىك اۆتوكولىكتى كەدەندىك تەكسەرىستەن وتكىزۋ مىندەتتى.
اۆتوكولىكتى زاڭداستىرۋ تولەمىنە كەلسەك، 200 مىڭ تەڭگە مەملەكەتتىك الىم، 4313 تەڭگە پاسپورت باجى جانە مەملەكەتتىك ءنومىر ءۇشىن 9660 تەڭگە تولەۋ قاجەت.
ايتا كەتەيىك، شەتەلدىك اۆتوكولىكتەردى زاڭداستىرۋ بيىل 1- شىلدەگە دەيىن جالعاسادى.
شەتەلدىك كولىك يەلەرى ۋتيل الىمنان بوساتىلادى.
سونداي-اق، شەتەلدىك كولىكتەردى زاڭداستىرۋعا كومەك كورسەتەتىن Call-ورتالىقتار ىسكە قوسىلدى. بارلىق ءوڭىر بويىنشا تەلەفوندى وسى جەردەن الۋعا بولادى.
Call-ورتالىقتان بولەك، شەتەلدىك كولىكتى زاڭداستىرۋ بويىنشا حالىققا قىزمەت كورسەتۋ ورتالىقتارىندا ماماندار كەڭەسى ۇسىنىلادى.
شەتەلدەن اكەلىنگەن قانداي كولىك ءتۇرى زاڭداستىرۋعا جاتپايتىنى تۋرالى تولىق اقپاراتتان وقۋعا بولادى.
سونىمەن قاتار، شەتەلدىك كولىكتى زاڭداستىرماعان جاعدايدا قانداي جازا قولدانىلاتىنى ايتىلدى.