مينيسترلىك كيىك اتۋعا رۇقسات بەرۋدىڭ جاي-جاپسارىن ءتۇسىندىردى

استانا. قازاقپارات - ەكولوگيا جانە تابيعي رەسۋرستار مينيسترلىگى عىلىمي ماقساتتا كيىكتەردى اتۋعا رۇقسات بەرۋدىڭ ءمان-جايىن ءتۇسىندىرىپ ءوتتى، دەپ حابارلايدى قازاقپارات ءتىلشىسى.

«ەلىمىزدە كيىك اتۋعا تىيىم سالىنعالى زەرتتەۋلەر جۇرگىزىلگەن جوق. ولاردى قورعاۋ جانە ءوسىمىن مولايتۋ ماقساتىندا كەشەندى عىلىمي زەرتتەۋلەر جۇرگىزۋ قاجەتتىلىگى تۋىنداپ وتىر. وسىعان وراي، بيىل ورمان شارۋاشىلىعى جانە جانۋارلار دۇنيەسى كوميتەتى عىلىمي ۇيىمدارمەن بىرلەسىپ، كيىكتەردىڭ پوپۋلياتسياسىنا عىلىمي زەرتتەۋ جۇرگىزۋدى جوسپارلادى. زەرتتەۋ بارىسىندا اتالعان جانۋاردىڭ كوبەيۋىنە بولجام جاسالىپ، مەكەندەۋ، تارالۋ جانە كوشى-قون اۋماعى ناقتىلانادى. سونىمەن قاتار، كيىكتەردىڭ قورەكتەنۋ بازاسى زەردەلەنىپ، اۋىل شارۋاشىلىعىنا زالال كەلتىرمەۋىنە قاتىستى ۇسىنىستار ازىرلەنەدى»، - دەلىنگەن مينيسترلىكتىڭ رەسمي حابارلاماسىندا.

وسىلايشا، بيىل مينيسترلىك زوولوگيا ينستيتۋتىمەن بىرلەسىپ كيىك اتۋعا كۆوتا ءبولىپ وتىر.

«كيىكتەردىڭ پوپۋلياتسياسى، جىنىستىق جانە جاس ەرەكشەلىكتەرى، ءولىم-ءجىتىم كورسەتكىشى جانە جانۋارلاردىڭ تىرشىلىگىنە كەدەرگى كەلتىرەتىن فاكتورلارعا مونيتورينگ جاسالىپ، زەرتتەۋلەر جۇرەدى. سول ارقىلى كيىكتەر سانى كوبەيۋىنىڭ بيولوگيالىق جانە تەحنولوگيالىق نەگىزدەرى ازىرلەنەدى. سونداي-اق، زەرتتەۋ جۇرگىزۋ ماقساتىندا كيىكتەردىڭ ءتولىن تىرىلەي الۋ كوزدەلىپ وتىر»، - دەيدى ۆەدومستۆودان.

كيىك اتۋعا رۇقسات بەرەتىن كۆوتا كولەمى زوولوگيا ينستيتۋتى، جاڭگىرحان اتىنداعى ب ق و اگروتەحنيكالىق ۋنيۆەرسيتەتى جانە ۆەتەريناريا جونىندەگى ۇلتتىق رەفەرەنتتىك ورتالىق سياقتى عىلىمي ۇيىمداردىڭ وتىنىمىنە قاراي بەلگىلەنەدى. كۆوتا بويىنشا شەكتەۋ بار.

مينيسترلىكتىڭ حابارلاۋىنشا، ب ق و- دا كيىكتەردى ساقتاۋ جانە ولاردىڭ ءوسىمىن ارتتىرۋ باعىتىندا ورتالىق (پيتومنيك) جۇمىس ىستەيدى.

ەسكە سالايىق، بيىل 15- اقپاننان باستاپ ءبىر جىل بويى عىلىمي-زەرتتەۋ جۇمىستارى ءۇشىن كيىكتەردى اتۋعا رۇقسات بەرىلۋى مۇمكىن ەكەنىن حابارلاعان ەدىك. عىلىمي ماقساتتا قازاقستاننىڭ 4 وبلىسى اۋماعىندا 1815 كيىكتى اتۋعا رۇقسات بەرىلمەك.