ەڭبەك زاڭناماسىنا ايلىقتى يندەكستەپ وتىرۋدى مىندەتتەيتىن وزگەرىس ەنگىزىلۋى مۇمكىن
بۇل تۋرالى ۇيىمنىڭ ءتوراعاسى ساتىبالدى داۋلەتالين ايتتى، دەپ حابارلايدى قازاقپارات ءتىلشىسى.
«سونىمەن بىرگە كاسىپوداقتار فەدەراتسياسى ەڭبەكاقى تولەۋ ماسەلەسىن رەتتەۋ باعىتىندا ەڭبەك زاڭناماسىندا جالاقىنى مىندەتتى يندەكستەۋ تۋرالى نورمالاردى بەكىتۋ، جالاقى مولشەرىنىڭ نەگىزسىز ديسپروپورتسياسىن جويۋ، سالالار بوينىشا ەڭبەكاقىنى ارتتىرۋ كوەففيتسيەنتتەرىن بەلگىلەيتىن ادىستەمەنى ازىرلەۋگە مەملەكەتتىڭ قاتىسۋى جانە ەڭبەكاقى كەشىككەن جاعدايدا جۇمىسشىلاردىڭ ءوندىرىستى توقتاتا تۇرۋ قۇقىعىن بەلگىلەۋ شارالارىن ۇسىنادى»، - دەدى ساتىبالدى داۋلەتالين.
بۇعان دەيىن ول ەڭبەك كودەكسىندەگى ەڭبەكاقىنى بەلگىلەۋ تارتىبىنە وزگەرىس ەنگىزۋدى ۇسىنعان بولاتىن.
«ءبىز ۇكىمەتكە دە ءبىرقاتار ۇسىنىستار بەردىك. مىسالى، جۇمىس بەرۋشى مەن جۇمىسشى اراسىنداعى كىرىستى ءبولۋدىڭ ادىلەتسىز جۇيەسىن تۇزەتۋ قاجەت. بۇل قىزمەتكەرلەردى ءىس جۇزىندە قارجىلىق تاۋەلدىلىككە اكەلەدى. ونىڭ سالدارىنان قۇقىقتىق ەنجارلىق پايدا بولادى. سوندىقتان جالاقى جۇيەسىن تۇبەگەيلى وزگەرتۋ كەرەك. وكىنىشكە قاراي، قازىر ەڭبەكاقى تولەۋ جۇيەسىن جۇمىس بەرۋشى بەلگىلەيدى. ءبىز ەڭبەك كودەكسىنە ەڭبەكاقى تولەۋ جۇيەسى ەڭ اۋەلى جۇمىسشىلار وكىلىنىڭ ماقۇلداۋى ارقىلى بەلگىلەنۋى ءتيىس دەگەن باعىتتا وزگەرىستەر ەنگىزۋدى تالاپ ەتىپ، ۇسىنىپ وتىرمىز»، - دەيدى ساتىبالدى داۋلەتالين.