ءبيبىسارا اساۋبايەۆا حالىقارالىق ءتۋرنيردىڭ باستى فاۆوريتىن جەڭدى

استانا. قازاقپارات - ماسكەۋدە ءوتىپ جاتقان «شاحمات جۇلدىزدارى» اتتى حالىقارالىق تۋرنيردە سەنساتسيا بولدى.

بليتس شاحماتتان ەكى دۇركىن الەم چەمپيونى ءبيبىسارا اساۋبايەۆا راپيدتە باسەكەنىڭ باستى فاۆوريتى سەرگەي كارياكيندى جەڭدى، دەپ حابارلايدى سپورتتى دامىتۋ ديرەكتسياسىنىڭ باسپا ءسوز قىزمەتى.

رەسەيلىك شاحماتشى الەمدەگى ەڭ مىقتى گروسسمەيستەردىڭ ءبىرى. قازىرگى ۋاقىتتا ونىڭ 2739 ۇپايى بار.

تۋرنير كوممەنتاتورلارىنىڭ ايتۋىنشا، ءبيبىسارانىڭ بليتستە الەم چەمپيونى بولعانى بەكەر ەمەس. ول ءوزىنىڭ سالقىنقاندىلىعىمەن سەرگەيدىڭ مىقتى قورعانىسىنا توتەپ بەرىپ، جەڭىسكە جەتتى.

ەكى مىقتىنىڭ ويىنى مازمۇنى جاعىنان دا، ناتيجەسى جاعىنان دا تۋردىڭ ءسانىن كەلتىردى. ءبيبىسارا بۇعان دەيىن سۇحباتتارىندا وسى تۋرنيردە سەرگەي كارياكين جانە تەيمۋر رادجابوۆپەن ويناعىسى كەلەتىنىن بىرنەشە رەت ايتقان.

ءوز كەزەگىندە رەسەيلىك گروسسمەيستەر مۇنداعى جالعىز جەڭىلىسىنەن ۇيالمايتىنىن مالىمدەدى.

«مەن وتە جاقسى وينايتىن الەم چەمپيونىنان ۇتىلدىم»، - دەپ ايتتى كارياكين ويىننان كەيىن.

ايتا كەتەيىك، بۇل جارىستىڭ جۇلدە قورى 15 ميلليون رۋبل. قازىر مۇندا الەمدەگى ەڭ مىقتى شاحماتشىلار شەبەرلىك بايقاسىپ جاتىر. ولاردىڭ قاتارىندا ءبيبىسارا اساۋبايەۆا، سەرگەي كارياكين، الەكساندر گريشۋك، تەيمۋر رادجابوۆ، راۋناكۋ سادۆاني، فرانسيسكو ۆالەحو، ۆلاديسلاۆ ارتەميەۆ، ەكاتەرينا لاگنو جانە باسقالارى بار.

ءبىر قىزىعى، قازاقستاندىق گروسسمەيستەر تۋرنيرگە قاتىساتىنىن جارىس باستالاردان ەكى كۇن بۇرىن بىلگەن. بيبيسارا الەم چەمپيونى ۆلاديمير كرامنيكتىڭ ورنىن باسقان.

راپيد باسەكەسى 24-26 قاڭتاردا ءوتتى. ەندى بليتس تۇرىندە (28-جانە 30-قاڭتار) بيبيسارا اساۋبايەۆا ءالى دە ءوز شەبەرلىگىن كورسەتەدى دەپ سەنەمىز.