استانانىڭ قاي اۋداندارىندا ينتەرنەت ساپاسى ناشار

استانا. قازاقپارات – ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتىنىڭ ءتوراعاسى ەرجان مەيراموۆ ەلورداداعى ينتەرنەتتىڭ ساپاسى تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«ءبىز زاڭناما دەڭگەيىندە بەكىتىلگەن بايلانىس ساپاسىنىڭ سايكەستىگىن تەكسەرەمىز جانە قازىر ناقتى پروبلەمالىق اۋماقتاردى بىلەمىز. استانا بويىنشا بۇل - حانشاتىردىڭ ارتى، «مانحەتتەن» ت ك، بارىس ارەنا جانە سپورت كلاستەرلەرىنىڭ اينالاسى. بۇل جەردەگى ۇلكەن پروبلەما - راديوفوبيا بولىپ وتىر. وندا ءبىز اكىمدىكپەن بىرلەسىپ، جۇيەلى شەشىم تابۋعا تىرىسامىز. ەگەر بازالىق ستانتسيانى قانداي دا ءبىر ناقتى ۇيگە ورناتۋ مۇمكىندىگى بولماسا، جەر ۋچاسكەسىن نەمەسە تۇرعىن ءۇي كەشەنىنىڭ اراسىنا ورناتۋ مۇمكىندىگىن ىزدەيمىز نەمەسە وعان دەيىن بازالىق ستانتسيالاردى ورنالاستىراتىن انتەننا- دىڭگەك ورناتۋ مۇمكىندىگىن قاراستىرامىز»، - دەدى ەرجان مەيراموۆ ۆەدومستۆو القاسىنىڭ كەڭەيتىلگەن وتىرىسىندا.

سپيكەردىڭ ايتۋىنشا، مۇندا زاڭنامالىق ماسەلە دە بار.

«وكىنىشكە قاراي، بىزدە زاڭناما ماسەلەسى بار. تۇرعىن ۇيدە كەم دەگەندە ءبىر راديوفوب بولسا دا ونىڭ پىكىرى ەسكەرىلەدى. بىزگە زاڭنامانى وزگەرتۋ قاجەت، وندا ءبىر ادامنىڭ پىكىرىنە بايلانىستى حالىقتىڭ قالعان بولىگى زارداپ شەكپەۋى كەرەك دەگەن تۇزەتۋلەر بولادى. سوندىقتان دەپۋتاتتار ارقىلى تۇزەتۋلەردى ۇسىندىق»، - دەپ اتاپ ءوتتى ە. مەيراموۆ.

ايتا كەتەيىك، ەلوردادا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ كەڭەيتىلگەن القا وتىرىسى ءوتتى، وندا مينيسترلىك جەتەكشىلىك ەتەتىن باعىتتارداعى جۇمىستىڭ قورىتىندىلارى مەن باسىمدىقتارى تالقىلاندى.