وتاندىق پارلامەنتاريزم تاريحىندا جاڭا كەزەڭ باستالماق - سەنات ءتوراعاسى ءماجىلىس پەن ءماسليحات سايلاۋى تۋرالى

استانا. قازاقپارات - بۇگىن ق ر پارلامەنتى سەناتىنىڭ ءتوراعاسى لاۋازىمىنا قايتا سايلانعان ماۋلەن اشىمبايەۆ ءوزىنىڭ قىزمەتى، الداعى بولاتىن ءماجىلىس پەن ءماسليحات دەپۋتاتتارىنىڭ سايلاۋىنا قاتىستى Facebook الەۋمەتتىك جەلىسىندە پىكىر ءبىلدىردى، دەپ حابارلايدى قازاقپارات.

«بۇگىن مەملەكەت باسشىسى قاسىم-جومارت كەمەل ۇلى توقايەۆ سەنات وتىرىسىنا قاتىستى. كونستيتۋتسياعا سايكەس پرەزيدەنتىمىز پالاتا ءتوراعاسى قىزمەتىنە كانديداتۋرانى ۇسىنىپ، ماعان زور سەنىم ءبىلدىردى. بۇل - مەن ءۇشىن ۇلكەن جاۋاپكەرشىلىك. ارىپتەستەرىم مەملەكەت باسشىسىنىڭ ۇسىنىسىن قولداپ، داۋىس بەردى. الداعى ۋاقىتتا پرەزيدەنتىمىزدىڭ جانە حالىقتىڭ سەنىمىن اقتاۋ ءۇشىن بار كۇش-جىگەرىمدى جۇمسايمىن»، - دەپ جازدى سەنات ءتوراعاسى.

سونىمەن قاتار ول مەملەكەت باسشىسى جۋىردا پالاتا دەپۋتاتتارىنىڭ ءبىر بولىگى سايلانعانىن جانە بىرنەشە سەناتوردىڭ تاعايىندالعانىن ايتىپ، وسىمەن سەنات قۇرامىن جاڭعىرتۋ ۇدەرىسى اياقتالعانىن اتاپ ءوتتى. بۇل - ەلىمىزدە جۇرگىزىلىپ جاتقان اۋقىمدى ساياسي رەفورمالاردىڭ ناقتى ناتيجەلەرىنىڭ ءبىرى.

قاسىم-جومارت كەمەل ۇلى سەناتتىڭ مەملەكەتتىك باسقارۋ سالاسىنداعى ءرولى ايرىقشا ەكەنىن دە تىلگە تيەك ەتتى. مەملەكەت باسشىسى بۇگىندە پالاتا ءوز جۇمىسىن ابىرويمەن اتقارىپ كەلە جاتقانىن جانە سەناتورلار بارلىق رەفورمانى جۇزەگە اسىرۋعا بەلسەنە اتسالىسقانىن ايتتى. مۇنداي باعا ءبىزدى ودان ءارى ىنتالاندىرىپ، جۇمىسىمىزعا تىڭ سەرپىن بەرەدى.

وتىرىس بارىسىندا پرەزيدەنتىمىز سەناتتىڭ الدىندا تۇرعان نەگىزگى ماقساتتاردى ايقىنداپ بەردى. كۇن تارتىبىندەگى وزەكتى ماسەلەلەرگە قاتىستى ناقتى مىندەتتەر جۇكتەدى. بۇل رەتتە قولعا الىنعان جاڭا باستامالاردى زاڭنامالىق تۇرعىدان ۋاقتىلى ءارى ساپالى تۇردە قامتاماسىز ەتۋدىڭ ماڭىزى زور.

مەملەكەت باسشىسى الداعى ءماجىلىس جانە ءماسليحاتتار سايلاۋىنا دا توقتالىپ، اتالعان ساياسي ناۋقان نەگىزگى مەملەكەتتىك ينستيتۋتتاردى كەشەندى تۇردە جاڭعىرتۋدىڭ ماڭىزدى ساتىسى بولاتىنىن اتاپ ءوتتى. وسىلايشا، وتاندىق پارلامەنتاريزم تاريحىندا جاڭا كەزەڭ باستالماق.

پرەزيدەنتىمىز مۇنىمەن توقتاپ قالمايتىنىمىزدى، الدا ءالى اۋقىمدى جۇمىس بار ەكەنىن ايتا كەلە: «ەلىمىزدە «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداتى ورنىعا ءتۇستى. بۇل رەفورمالار بيلىك ينستيتۋتتارى جۇيەسىنىڭ تەپە-تەڭدىگىن قالىپتاستىرادى. ەلدەگى ساياسي ۇدەرىسكە ازاماتتاردىڭ قاتىسۋىنا جول اشادى. سونداي-اق مەملەكەتتىك باسقارۋ جۇيەسىنىڭ تيىمدىلىگىن ارتتىرا تۇسەدى»، - دەدى.

«جالپى، مەملەكەت باسشىسى اتاپ وتكەندەي، قوعامدا وركەنيەتتى ساياسي ءداستۇردى ورنىقتىرۋ - نەگىزگى ماقساتتاردىڭ ءبىرى. ول ءۇشىن جوعارى ساياسي جاۋاپكەرشىلىك مادەنيەتىن قالىپتاستىرۋ قاجەت. مۇنىڭ ءبارى - قازاقستاندى تۇعىرى بەرىك، ەكونوميكاسى قۋاتتى، رۋحى اسقاق، بىرلىگى بەكەم مەملەكەت رەتىندە ۇرپاققا تابىستاۋ جولىنداعى ماڭىزدى قادامدار. سوندىقتان پارلامەنت سەناتى الداعى ۋاقىتتا وسى باعىتتاعى باسىمدىقتارعا باسا ءمان بەرىپ، ادىلەتتى قازاقستان قۇرۋ باعىتىنداعى بەلسەندى جۇمىسىن جالعاستىرا بەرەدى»، - دەدى ماۋلەن اشىمبايەۆ.