مەملەكەتتىك ورگانداردىڭ جۇمىس تيىمدىلىگى ونىڭ ناتيجەسىنەن كورىنەدى - ءاليحان سمايىلوۆ

استانا. قازاقپارات – ق ر پرەمەر-ءمينيسترى ءاليحان سمايىلوۆ سيفرلىق تەحنولوگيالاردى ەل ومىرىنە ەنگىزۋگە قاتىستى جۇكتەلگەن پرەزيدەنت تاپسىرمالارىن تاعى ءبىر ەسكە سالدى، دەپ حابارلايدى قازاقپارات ءتىلشىسى.

«بۇگىندە IT ەكونوميكانىڭ بارلىق سالاسىنداعى باسىم مىندەتتەردىڭ ءبىرى. مەملەكەت باسشىسى 2029-جىلعا قاراي سيفرلىق تەحنولوگيالاردىڭ ەكونوميكاداعى ۇلەسىن 2 ەسە ارتتىرۋ تۋرالى تاپسىرما بەردى. سول سياقتى اقپاراتتىق تەحنولوگيالار پايداسىنىڭ جالپى ىشكى ونىمدەگى ۇلەسىن 1 پايىزعا جەتكىزۋ كەرەك. سوندىقتان دا پرەزيدەنت جۇكتەگەن مىندەت بارلىق مەملەكەتتىك ورگان جانە سالالىق ۆەدومستۆولاردىڭ دامۋ جوسپارىندا ايقىن كورىنىس تابۋى ءتيىس»، - دەدى ءاليحان سمايىلوۆ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ كەڭەيتىلگەن القا وتىرىسىندا.

سونداي-اق، ۇكىمەت باسشىسى ۆيتسە-مينيسترلەردىڭ جەكە جاۋاپكەرشىلىگىن ارتتىرىپ، ءونىمدى جۇمىس ىستەۋدى تاپسىردى.

«مينيستر مەن قوسا ونىڭ ورىنباسارلارى سيفرلاندىرۋ بويىنشا بارلىق ىسكە بەلسەندى قاتىسىپ، ماسەلەنى باقىلاۋدا ۇستاۋ كەرەك. مەملەكەتتىك ورگاندار قىزمەتىنىڭ اشىقتىعى، ۋاقىتىلى شەشىم قابىلداۋى مەن تيىمدىلىگى جۇمىس ناتيجەسىنەن كورىنەدى»، - دەيدى ول.

بۇعان دەيىن ءاليحان سمايىلوۆ قازاقستاندىقتاردىڭ جەكە مالىمەتى قاۋىپسىزدىگىن قامتۋعا ەرەكشە ءمان بەرۋ كەرەكتىگىن ەسكەرتكەن ەدى.

ودان بولەك، قاۋىپسىزدىك بويىنشا پرەمەر-مينيستر قوزعاعان تاعى ءبىر ماسەلە - مەملەكەتتىك ورگانداردىڭ اقپاراتتىق جۇيەسى. بىلتىر ولار 500 رەت ىستەن شىققان.