نياز ءبي، سارقىراما، كوكتوعاي: استانا ماڭىنداعى لەسنايا پوليانا اتاۋى وزگەرۋى مۇمكىن

استانا. قازاقپارات - اقمولا وبلىسى، قوسشى قالاسىنا قاراستى «لەسنايا پوليانا» شاعىناۋدانىنىڭ اتاۋىن قازاقشالاۋعا بايلانىستى اتالعان اۋداندا قوسشى قالاسىنىڭ اكىمىنىڭ ورىنباسارى بەرگەن جۇمكەي ۇلىنىڭ باسقارۋمەن حالىقتىق تىڭداۋ ءوتتى، دەپ حابارلايدى قازاقپارات ءتىلشىسى.

جيىندا قوسشى تۇرعىندارى «سارقىراما»، «نياز ءبي» جانە «كوكتوعاي» قاتارلى بىرنەشە اتاۋ ۇسىندى.

بۇل تۋرالى اتالعان تالقىلاۋعا قاتىسقان قوسشى قالاسىنىڭ تۇرعىنى جازۋشى، جۋرناليست باقىتبەك قادىردىڭ ايتۋىنشا، كەز-كەلگەن ەلدىمەكەنگە جاڭا اتاۋ ۇسىنعاندا تاريحي توپوميندەرگە نەگىزدەلەدى. وسىنداي ونوماستيكانىڭ مەحانيزمدەرى بار. وسى رەتتە «لەسنايا پوليانا» شاعىناۋدانى جەكە ەلدىمەكەن ەمەس. بۇل قوسشى قالاسىنا قاراستى شاعىناۋدان. وعان تاريحي اتاۋ بەرۋدىڭ كەرەگى جوق. ەكىنشى شاعىناۋدان اتاۋلارىنا ادام ەسىمىن بەرۋ - وتكەن داۋىردەن قالعان نارسە. جاڭا جەرگە جاڭا اتاۋ كەرەك. لەسنايا پوليانا - ورماندى القاپ دەگەن ءسوز. دۇرىستاپ قازاقشاعا اۋدارساق كوكتوعاي دەۋگە بولادى. مۇنداي قازاقتا جەر-سۋ اتاۋلارى تاجىريبەدە بار. ماسەلەن، كوكبەكتى، كوكجىرا نەمەسە اقتوعاي، سارتوعاي ت. ب.

«سوندىقتان مەن وسى شاعىناۋداننىڭ اتاۋى «كوكتوعاي» بولعانىن ءجون كورەمىن. مەنىمەن بىرگە وسىندا تۇراتىن ءبىر توپ زيالى ازاماتتار دا مەن ايتقان اتاۋدى ۇسىنىپ وتىر. ونوماستيكا كوميسسياسى جەرگىلىكتى تۇرعىنداردىڭ ءۋاجىن ەسكەرەدى دەپ ەسەپتەيمىن»، دەيدى باقىتبەك قادىر.

ايتا كەتەيىك، قوعامدىق تالقىلاۋدىڭ سوڭىندا جيىنعا كەلگەن بارلىق قاتىسۋشىلار وزدەرىنىڭ ۇسىنعان اتاۋلارىن اكىمشىلىكتىڭ بەرگەن ءوتىنىش قاعازىنا جازىپ قالدىردى. ۇيىمداسترۋشىلار وسى ۇسىنىلعان اتاۋلاردى قورتىندىلاپ، ونى وبلىستىق ونوماستيكالىق كوميسسياعا تاپسىراتىنىن ايتتى.

اۆتور بەيسەن سۇلتان