تيك-توك-تا قاسىم-جومارت توقايەۆتىڭ ديپفەيكى پايدا بولدى

استانا. قازاقپارات - ەلدەگى TikTok قولدانۋشىلارى پرەزيدەنت قاسىم-جومارت توقايەۆتىڭ ديپفەيكىن قىزۋ تالقىلاپ جاتىر.

بۇل تۋرالى قازاقپارات Tengrinews اگەنتتىگىنە سىلتەمە جاساپ حابارلايدى.

@unreal_tokaev (ناعىز توقايەۆ ەمەس دەگەن ماعىنادا) اككاۋنتىمەن تىركەلگەن ديپفەيكتىڭ ازىرگە التى ۆيدەوسى شىقتى.

بىرىندە @unreal_tokaev بيلەسە، بىرىندە TikTok قولدانۋشىلارىنا الەمدىك شوكولاد برەندتەرىن تاڭداعانشا، «قازاقستان» شوكولادىن تاڭدا دەگەن ماندەگى يشارات جولدايدى.

قولدانۋشىلاردىڭ ءبىرى مۇنى كىم جاساسا دا، كرەاتيۆتى قادام بولعانىن ايتسا، ەندى ءبىرى مۇنداي «ەركىن شىعارماشىلىق» ءۇشىن جاۋاپكەرشىلىك ارقالاۋعا بولاتىنىن ەسكەرتكەن.

ال زاڭگەر نادەجدا گەلدت Tengri Lifestyle-كە بەرگەن پىكىرىندە قازاقستان زاڭناماسىندا ديپفەيك ماسەلەسىن رەتتەۋدىڭ ناقتى تەتىكتەرى جوق ەكەنىن ايتادى.

دەگەنمەن، قولدانىستاعى زاڭناما اياسىندا ونداي ديپفەيك قۇرۋ كەزىندە ەسكەرۋ كەرەك تۇستاردى اتاعان.

«ديپفەيك جاساۋ ءۇشىن اۆتورى بار فوتو نەمەسە ۆيدەوماتەريالدار قولدانىلادى. ەگەر ماتەريال اۆتورىنىڭ رۇقساتىن الماساڭىز، ديپفەيك جاساعان ارەكەتىڭىز زاڭعا قايشى دەپ تانىلۋى مۇمكىن»، - دەيدى زاڭگەر.