ساراپشى سەناتتىڭ جاڭارعان قۇرامىنا قاتىستى پىكىر ءبىلدىردى

استانا. قازاقپارات — سەناتتىڭ جاڭارعان قۇرامىن ءساتتى جاساقتاۋ ساياسي ينستيتۋتتار تۇراقتىلىعىن بىلدىرەدى.

مۇنداي پىكىردى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ساياسي زەرتتەۋلەر ءبولىمىنىڭ جەتەكشىسى ەرمەك توقتاروۆ ايتتى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، سەنات دەپۋتاتتىق كورپۋسىنىڭ ءبىر بولىگىن سايلاۋ كونستيتۋتسيالىق مەرزىمدە ءوتتى.

«وسى تۇرعىدان العاندا پارلامەنتتىڭ جوعارى پالاتاسى ءماجىلىستىڭ جاڭا شاقىرىلىمى جاساقتالاتىن كەزەڭدەگى زاڭنامالىق ءداستۇردىڭ ساباقتاستىعىن قامتاماسىز ەتەتىن تۇراقتى ساياسي ينستيتۋت رەتىندە بولادى. رەفەرەندۋم قورىتىندىسىندا سەناتتىڭ وكىلەتتىك قىزمەتى كۇشەيتىلدى. سەناتورلاردىڭ سانى ارتىپ، جاڭا وڭىرلەردىڭ، اباي، ۇلىتاۋ جانە جەتىسۋ وبلىستارىنىڭ وكىلدەرى كىردى. سونىمەن قاتار قازاقستان حالقى اسسامبلەياسىنىڭ دەپۋتاتتىق كۆوتاسى ماجىلىستەن سەناتقا بەرىلدى»، - دەدى ساراپشى.

ەرمەك توقتاروۆ سەنات ادام قۇقىقتارى جونىندەگى ۋاكىلدى سايلاۋ، پرەزيدەنتتىڭ كونستيتۋتسيالىق سوت، ۇلتتىق بانك، جوعارعى سوت كەڭەسى ءتوراعالارىن، باس پروكۋروردى جانە ۇلتتىق قاۋىپسىزدىك كوميتەتىنىڭ ءتوراعاسىن تاعايىنداۋىنا كەلىسىمىن بەرۋ ارقىلى مەملەكەتتىك باسقارۋ جۇيەسىن قالىپتاستىرۋداعى ءوز ىقپالىن ساقتاپ قالعانىن ايتادى.

«سەنات قازاقستاننىڭ ساياسي جۇيەسىنىڭ ماڭىزدى ەلەمەنتى سانالادى. جوعارى پالاتانىڭ جاڭارعان قۇرامىن ءساتتى قالىپاستىرۋ ساياسي ينستيتۋتتار تۇراقتىلىعىن، ولاردى قالىپتاستىرۋ پروتسەدۋرالارىنىڭ تىڭعىلىقتىلىعىن كورسەتەدى. ءماجىلىس بولمايتىن كەزەڭدە سەنات پارلامەنتتىڭ بۇكىل زاڭنامالىق قىزمەتىن ورىندايدى. بۇل الداعى سايلاۋدى ەلدەگى ورتالىق بيلىك وكىلدىگىن ساقتاي وتىرىپ وتكىزۋگە مۇمكىندىك بەرەدى»، - دەدى ول.