ءاليحان سمايىلوۆ جەكە مالىمەتتەر تۋرالى: قاۋىپ-قاتەردىڭ الدىن الۋ ماڭىزدى

استانا. قازاقپارات - ۇكىمەت باسشىسى قازاقستاندىقتاردىڭ جەكە مالىمەتىنە ساق بولۋ كەرەكتىگىن ەسكەرتتى، دەپ حابارلايدى قازاقپارات ءتىلشىسى.

پرەمەر-مينيستر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ كەڭەيتىلگەن القا وتىرىسىندا قازاقستاندىقتاردىڭ جەكە مالىمەتتەرى قاۋىپسىزدىگىن قامتۋعا ەرەكشە ءمان بەرۋدى اتاپ ءوتتى.

«تەحنولوگيانىڭ جىلدام دامۋىن ەسكەرە وتىرىپ، اقپارات جانە دەرەكتەر قاۋىپسىزدىگى ماسەلەسىن ەستەن شىعارماۋ كەرەك. ونىڭ ىشىندە جەكە مالىمەتتەر قاۋىپسىزدىگى دە بار. ءقاۋىپ- قاتەردىڭ الدىن الۋ - وتە ماڭىزدى. وسى ورايدا، مينيسترلىك ورتالىق جانە جەرگىلىكتى اتقارۋشى ورگاندارمەن بىرلەسىپ، اقپاراتتىق جۇيەلەردىڭ %100 قورعالۋىن قامتاماسىز ەتۋ جونىندە كەشەندى شارالار قابىلداۋى كەرەك. سونداي-اق، استانا حابتىڭ قىزمەتىن كەڭەيتىپ، تاجىريبەسىن جوعارى وقۋ ورىندارى بازاسىندا جانە وڭىرلىك دەڭگەيدە دامىتۋ قاجەت»، - دەدى ءاليحان سمايىلوۆ جيىن بارىسىندا.

پرەمەر-مينيستر وڭىرلەردەگى دارىندى جاستارعا قولداۋ كورسەتىپ، جاعداي جاساۋ كەرەكتىگىن ايتتى. ءوڭىر جاستارىنا IT مادەنيەت، يننوۆاتسيالىق يدەيالار مەن ۇزدىك تاجىريبەنى ۇيرەنىپ، حالىقارالىق نارىققا شىعۋدا تەڭ مۇمكىندىك جاسالۋى كەرەك.

«تەحنولوگيالىق كاسىپكەرلىكتى دامىتىپ، باسەكەگە قابىلەتتى IT باعدارلامالارمەن جۇمىس ىستەۋ ماڭىزدى. مينيسترلىك بۇل مىندەتتى ىسكە اسىرۋ ءۇشىن بارلىق وڭىردە «استانا حاب» ۇلگىسى بويىنشا تەحنولوگيالىق ورتالىقتار اشۋى قاجەت. بۇل ماسەلەنى جەرگىلىكتى اكىمدىكتەرمەن پىسىقتاعان ءجون»، - دەيدى ۇكىمەت باسشىسى.

بۇعان دەيىن ءا. سمايىلوۆ ەلىمىزدە 5G ەنگىزۋدى 2027-جىلعا دەيىن اياقتاۋدى جۇكتەگەن ەدى.