قازاقستاندىقتاردىڭ ءومىر جاعدايىنا تالداۋ جاسالادى

استانا. قازاقپارات - پرەمەر-مينيستر ءاليحان سمايىلوۆ ازاماتتاردىڭ الەۋمەتتىك جاعدايىنا تالداۋ جۇرگىزۋدى تاپسىردى، دەپ حابارلايدى قازاقپارات ءتىلشىسى.

«وتىنىشتەر مەن راستايتىن قۇجاتتاردى جيناۋ تاجىريبەسىنەن باس تارتۋ ماڭىزدى. ول مالىمەتتەر بازادا بار. «ynvisible Government» جوباسى شەڭبەرىندە مەملەكەتتىك ورگاندار قىزمەتىن پرواكتيۆتى تاسىلگە اۋىستىرۋ قاجەت. سونىمەن قاتار، «Smart Data Ukimet» پلاتفورماسىندا ىسكە اسىرىلىپ جاتقان جوبانىڭ ءبىرى - «وتباسىنىڭ سيفرلىق كارتاسى». اتالعان جوبا ناقتى كريتەريلەر نەگىزىندە الەۋمەتتىك وسال وتباسىلاردىڭ ناقتى بەينەسىن كورسەتىپ، ولارعا كومەك كورسەتۋگە مۇمكىندىك بەرەدى. وسى ورايدا، مينيسترلىك بيىل 1- توقساننىڭ سوڭىنا دەيىن ازاماتتاردىڭ تۋعانىنان باستاپ زەينەتكە شىعۋىنا دەيىنگى ءومىر جاعدايىنا تالداۋ جۇرگىزۋ قاجەت»، - ءاليحان سمايىلوۆ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ كەڭەيتىلگەن القا وتىرىسىندا.

ۇكىمەت باسشىسى مەملەكەتتىك ورگانداردىڭ اقپاراتتىق جۇيەسىنە قاتىستى ءسوز قوزعادى.

«دەرەكتەردى پايدالانۋدىڭ اشىقتىعى مەن جىلدامدىعىن قامتاماسىز ەتۋ ءۇشىن «Smart Data Ukimet» 77 اقپاراتتىق جۇيەنى بىرىكتىردى. وسىعان بايلانىستى، مينيسترلىك بيىل جىل سوڭىنا دەيىن قالعان 19 مەملەكەتتىك ورگاننىڭ اقپاراتتىق جۇيەسىن ينتەگراتسيالاۋ جونىندەگى جۇمىستى اياقتاۋى ءتيىس»، - دەدى ءا. سمايىلوۆ.

ەسكە سالايىق، ەلىمىزدە ءار وتباسىنىڭ جەكە سيفرلىق كارتاسى بولاتىنى تۋرالى حابارلاعان ەدىك.