دونالد ترامپتىڭ الەۋمەتتىك جەلىلەردەگى پاراقشالارى قالپىنا كەلتىرىلەدى

استانا. قازاقپارات - Meta-نىڭ جاھان ماسەلەلەرى بويىنشا پرەزيدەنتى نيك كلەگگ ارنايى مالىمدەمەسىندە دونالد ترامپتىڭ پاراقشالارى الداعى اپتالاردا قالپىنا كەلتىرىلەتىنىن جانە قوعامنىڭ «ساياساتكەرلەردىڭ نە ايتىپ جاتقانىن ەستيتىن مۇمكىندىگى بولۋى كەرەك» دەپ ەسەپتەيتىنىن ايتتى، دەپ حابارلايدى قازاقپارات BBC گە سىلتەمە جاساپ.

2021 -جىلدىڭ 6- قاڭتارىندا كاپيتولييدە بولعان تارتىپسىزدىكتەردەن كەيىن سول كەزدە قىزمەتىن بوساتىپ جاتقان پرەزيدەنت دونالد ترامپتىڭ Facebook پەن Instagram جەلىلەرىندەگى پاراقشاسى بەلگىسىز مەرزىمگە بۇعاتتالعان بولاتىن.

كلەگتىڭ ايتۋىنشا، Facebook وسىلايشا ترامپتىڭ ا ق ش پارلامەنتىندە تارتىپسىزدىككە جول بەرگەن جاقتاستارىن قولداۋىنا جاۋاپ بەردى.

«اككاۋنتتاردى ۋاقىتشا جابۋ توتەنشە جاعدايلار كەزىندە جەدەل قابىلدانعان شەشىم بولاتىن»، - دەدى كلەگگ.

ونىڭ سوزىنشە، كومپانيا قازىرگى ۋاقىتتا ترامپتىڭ پاراقشالارى قوعام ءۇشىن قاۋىپ توندىرمەيدى دەپ شەشكەن. دەگەنمەن وسى الەۋمەتتىك جەلىلەردىڭ ەرەجەسى قايتادان بۇزىلسا، ترامپتى ودان دا قاتاڭ جازا كۇتىپ تۇر.

ترامپ Facebook قا ورالا ما - بەلگىسىز. 2021 -جىلى ول Truth Social دەپ اتالاتىن جەكە الەۋمەتتىك جەلىسىن اشتى. ونى رەسمي قولداناتىندار سانى بار بولعانى بەس ميلليون ادام بولسا، Facebook پايدالاناتىندار سانى - ءۇش ميلليارد.