پرەزيدەنت سەنات وتىرىسىنا قاتىسىپ جاتىر

استانا. قازاقپارات - مەملەكەت باسشىسى قاسىم- جومارت توقايەۆ پارلامەنت سەناتىنىڭ وتىرىسىنا قاتىسىپ جاتىر، دەپ حابارلايدى قازاقپارات اقوردانىڭ تەلەگرام- ارناداعى رەسمي پاراقشاسىنا سىلتەمە جاساپ.

وندا مەملەكەت باسشىسى ەلىمىز دامۋدىڭ جاڭا كەزەڭىنە قادام باسقانىن ايتتى. بىلتىر كونستيتۋتسيالىق رەفورمانىڭ قولعا الىنعانىن ەسكە سالدى.

«اتا زاڭعا اسا ماڭىزدى وزگەرىستەر ەنگىزدىك. قاراشا ايىندا پرەزيدەنت سايلاۋى ءوتتى. جۋىردا سەنات دەپۋتاتتارىنىڭ ءبىر بولىگى سايلاندى. سونىمەن قاتار، مەنىڭ جارلىعىممەن بىرنەشە سەناتور تاعايىندالدى. وسىمەن سەناتتىڭ قۇرامىن جاڭعىرتۋ ۇدەرىسى اياقتالدى.

دەپۋتاتتاردىڭ جارتىسىنا جۋىعى جاڭاردى. مۇندا ءار ايماقتىڭ، سونىڭ ىشىندە جاڭادان قۇرىلعان وبلىستاردىڭ وكىلدەرى بار. قازاقستان حالقى اسسامبلەياسىنىڭ مۇشەلەرىنە ارنايى كۆوتا بەرىلدى. وسىلايشا، سەناتتا ءتۇرلى ساناتتاعى قوعام وكىلدەرى بارىنشا قامتىلدى. جالپى، بۇل پالاتا مەملەكەتتىك باسقارۋ سالاسىندا ايرىقشا ءرول اتقارادى. وعان كونستيتۋتسياعا سايكەس ماڭىزدى مىندەتتەر جۇكتەلگەن. زاڭ شىعارۋ قىزمەتىن ساپالى اتقارۋ ءۇشىن بارلىق جاعداي جاسالعان»، - دەدى پرەزيدەنت.

ونىڭ پايىمىنشا، پالاتا ءوز جۇمىسىن ابىرويمەن اتقارىپ كەلە جاتىر. سەناتورلار اۋقىمدى رەفورمالاردى جۇزەگە اسىرۋعا بەلسەنە اتسالىستى.

«وسى ورايدا، بارشاڭىزعا شىنايى ريزاشىلىعىمدى بىلدىرەمىن. جاڭا دەپۋتاتتار سەناتتىڭ قىزمەتىنە تىڭ سەرپىن بەرەدى دەپ سەنەمىن»، - دەپ اتاپ ءوتتى قاسىم- جومارت توقايەۆ.

فوتو: t.me/aqorda_resmi

رەداكتور

اسحات رايقۇل