اسحات ورالوۆ: «ارت سپورت» باعدارلاماسى جالعاسىن تابادى

استانا. قازاقپارات - جارتتى ميلليونعا جۋىق بالا سپورتتىق جانە شىعارماشىلىق ۇيرمەلەلەرگە تەگىن قاتىسا الادى. بۇل جونىندە مادەنيەت جانە سپورت ءمينيسترى اسحات ورالوۆ مالىمدەدى.

ۆەدموستۆونىڭ كەڭەيتىلگەن القا وتىرىسىندا ول «ارت سپورت» باعدارلاماسى جالعاساتىنىن جانە وسى ماقساتتا 87 ميلليارد تەڭگە قاراستىرىلعانىن جەتكىزدى. كورسەتكىش وتكەن جىلمەن سالىستىرعاندا ارتتى. سايكەسىنشە سەكسياعا كەلەتىن بالالاردىڭ دا سانى 160 مىڭعا وسەدى. ەندى بولىنگەن قارجىنى ءتيىمدى جۇمساۋ ءۇشىن مەملەكەتتىك تاپسىرىستى الۋشىلارعا قاتىستى تالاپتار كۇشەيە تۇسەتىنىن العا تارتتى سپورتقا جاۋاپتى مينيستر.

اسحات ورالوۆ، ق ر مادەنيەت جانە سپورت ءمينيسترى:

- ورتاق جاۋاپكەرشىلىك رەتىندە ءبىز ورتالىق مەملەكەتتىك مەكەمەلەرمەن، جەرگىلىكتى اتقارۋشى بيلىكتىڭ جانە دە ۇكىمەتتىك ەمەس ۇيىمداردىڭ وكىلدەرىمەن ، جالپى سپورت جاناشىرلارىمەن بىرلەسىپ، جۇمىس اتقارۋعا شاقىرامىز. ويتكەنى بۇل - ۇلكەن جاۋاپكەرشىلىك، ءبىراز اقشا. ەڭ الدىمەن، وسى اقشا بالالاردىڭ ءتالىم- تاربيەسىنە، دەنە شىنىقتىرۋمەن اينالىس ماقساتىندا ءتيىمدى پايدالانىلۋى كەرەك دەپ ەسەپتەيمىن. سوندىقتان بىرلەسىپ، ءارقايسىڭىزدى جۇمىس جاساۋعا شاقىرامىن.

www.24.kz