شەكاراداعى اۋداندار تولىق وتاندىق راديوحابارلارمەن قامتىلادى
بۇل تۋرالى وڭىرلىك مەرزىمدى باسىلىمدار فورۋمىندا اقپارات جانە قوعامدىق دامۋ ءمينيسترى دارحان قىدىرالى ايتتى، دەپ حابارلايدى قازاقپارات ءتىلشىسى.
«اقپاراتتىق قاۋىپسىزدىك ماسەلەسى دە نازاردا بولۋى كەرەك. سوندىقتان ەلدىڭ شەكارالاس اۋداندارىندا وتاندىق راديوحابارلارمەن قامتۋدى كەڭەيتۋ جۇمىسى كۇشەيتىلەدى. شەكارالاس ايماقتاردى راديوحابار تاراتۋمەن تولىق قامتاماسىز ەتۋ جوسپارلانىپ وتىر. بۇعان قوسا، وڭىرلىك ب ا ق- تى قولداۋ ءۇشىن ولاردا جارىق كورگەن مازمۇندى ماقالالاردى رەسپۋبليكالىق باسىلىمداردا جاريالاۋ تاجىريبەسىن جالعاستىرعان ءجون. بۇل ارقىلى ۇلتتىق جۋرناليستيكاداعى شىعارماشىلىق بايلانىستار نىعايىپ، وڭىرلىك ماسەلەلەرگە تۇتاس ەلىمىزدىڭ نازارىن اۋدارا الامىز»، - دەدى دارحان قىدىرالى.
فورۋم بارىسىندا مينيستر توقتالعان ماسەلەنىڭ ءبىرى - جەرگىلىكتى ب ا ق- تا قىزمەت ەتىپ جۇرگەن جاستاردى ەلىمىزدىڭ بەلدى باسىلىمدارىنا جۇمىسقا تارتۋ. دارحان قىدىرالى بۋىن الماسۋ، ءداستۇر ساباقتاستىعى ساتىمەن جالعاسۋى ءتيىس ەكەنىن باسا ايتتى. مۇنىمەن قوسا، ول گازەت-جۋرنالداردىڭ تارالىمى تومەندەپ بارا جاتقانىن مالىمدەدى.
«بۇگىندە گازەت-جۋرنالداردىڭ تارالىمى تومەندەپ، وقىرماندار اقپاراتتى نەگىزىنەن ينتەرنەت-رەسۋرستاردان الاتىنى بەلگىلى. سونىڭ سالدارىنان كوپتەگەن باسىلىمدار ءوز جۇمىسىن توقتاتۋعا نەمەسە تيراج سانىن كۇرت ازايتۋعا ءماجبۇر بولدى. اسىرەسە پاندەميا كەزىندە ءداستۇرلى باسپالار كۇردەلى تەكتونيكالىق وزگەرىستەردى باستان كەشىردى. بۇل قيىندىقتار وڭىرلىك باسىلىمداردى دا اينالىپ وتكەن جوق. ءتيىستى تالاپتارعا ساي كەلمەگەندىكتەن، بولىنگەن قاراجاتتاردان قۇر قالعان رەداكسيالار از ەمەس. كەيبىر ب ا ق- تار ءتۇرلى سەبەپتەرمەن جەكەشەلەنىپ تە كەتتى. ماسەلەن، اۋدانداردا 159 گازەت جەكەگە وتكەن. ءبىراق ءبىز وڭىرلىك باسىلىمداردى جەكەمەنشىك نە مەملەكەتتىك دەپ بولمەي، بارلىعىنا دا قولداۋ كورسەتۋگە ءازىرمىز»، - دەپ ءمالىم ەتتى دارحان قىدىرالى.