ەلىمىزدە جارتى ميلليوننان اسا ادام ۇلتتىق سپورت تۇرلەرىمەن اينالىسادى

استانا. قازاقپارات - بۇگىندە وتاندىق سپورتشىلارىمىز حالىقارالىق بايراقتى باسەكەلەردە جارقىن جەڭىستەرىمەن، جوعارى جەتىستىكتەرىمەن جۇرتشىلىق قوشەمەتىنە بولەنىپ ءجۇر.

دەگەنمەن، مۇنداي كورسەتكىشتەرگە ءالى دە قارقىن، تىڭ سەرپىن بەرۋ قاجەت ەكەندىگى ءسوزسىز. ال بۇقارالىق سپورتتى دامىتۋ جانە جوعارى جەتىستىكتەر سپورتىن جەتىلدىرۋ باعىتىنداعى اۋقىمدى جۇمىس مادەنيەت جانە سپورت مينيسترلىگىنە جۇكتەلگەن. بۇگىن اتالعان ۆەدومستۆو كەڭەيتىلگەن القا وتىرىسىن وتكىزىپ، الداعى ۋاقىتتا اتقارار جۇمىسىن بەلگىلەدى.

داڭقتى سپورتشىلار، سپورت فەدەراتسياى باسشىلارى باس قوسقان جيىندا بايانداما جاساعان مادەنيەت جانە سپورت ءمينيسترى اسحات ورالوۆتىڭ اتاپ وتۋىنشە، دەنە شىنىقتىرۋ جانە سپورت سالاسىنداعى مەملەكەتتىك ساياساتتىڭ ستراتەگيالىق ماقساتتارى مەن مىندەتتەرى، سونداي-اق سالانى دامىتۋدىڭ وزەكتى ماسەلەلەرى مەن ولاردى ىسكە اسىرۋ تەتىكتەرى سالا دامىتۋدىڭ 2030-جىلعا دەيىنگى تۇجىرىمداماسىنىڭ جوباسىندا ايقىندالعان.

قۇجات جوباسىندا مەملەكەت باسشىسىنىڭ تاپسىرمالارى، «دەنى ساۋ ۇلت» ۇلتتىق جوباسىنىڭ بارلىق كورسەتكىشتەرى مەن ءىس-شارالارى ينتەگراتسيالانعان.

سوندىقتان ۆەدومستۆونىڭ الدىندا تۇجىرىمداما جوباسىنىڭ ازىرلەنۋىن اياقتاۋ ءارى قۇجاتتىڭ قابىلدانۋىن جىلدامداتۋ مىندەتى تۇر.

مۇنى ءىس-شاراعا قاتىسقان پرەمەر-ءمينيستردىڭ ورىنباسارى التاي كولگىنوۆ تە باسا ايتتى.

«سپورتتى دامىتۋعا ارنالعان جاڭا تۇجىرىمدامانى جەدەلدەتۋىمىز قاجەت. بۇل جاڭا تۇجىرىمدامادا بۇكىل كورسەتكىشتەر، الدىمىزدا تۇرعان ماقسات-مىندەتتەر كورسەتىلۋى ءتيىس. اسىرەسە، جاس وسپىرىمدەر، جاستاردى سپورتقا باۋلۋ، ونىڭ ىشىندە كاسىبي سپورتشىلارىمىزدى دامىتۋ ماسەلەلەرى قامتىلۋى قاجەت. 2023، 2024-جىلدارى، جالپى الداعى 7 جىلدىق مەرزىمدە قانداي ناتيجەگە قول جەتكىزۋىمىز كەرەكتىگى تۇجىرىمدامادا بەلگىلەنۋى كەرەك»، - دەدى ۇكىمەت باسشىسىنىڭ ورىنباسارى.

ايتا كەتەرلىگى، اتالعان قۇجاتتا ازاماتتاردى جاپپاي تۇردە سپورتپەن جانە دەنە شىنىقتىرۋمەن شۇعىلدانۋعا ىنتالاندىرۋ، سپورتتىق مارافوندار، بۇقارالىق سپورتتى دامىتۋ ءىس-شارالارىن ۇيىمداستىرۋدى جۇيەلى قولعا الۋ كوزدەلگەن.

اسحات ورالوۆتىڭ اتاپ وتۋىنشە، دەنە شىنىقتىرۋ جانە سپورت سالاسىندا قولدانىستاعى نورماتيۆتىك-قۇقىقتىق بازا زاماناۋي يننوۆاتسيالىق جانە ينتەگراتسيالىق پروتسەستەر تالاپتارىنا تولىعىمەن ساي كەلمەيدى، سالانىڭ شىنايى قاجەتتىلىگىن ەسكەرمەيدى.

سوندىقتان بۇل باعىتتا مينيسترلىك زاڭنامالىق اكتىلەرگە تۇزەتۋلەر ەنگىزۋ جۇمىسىن باستاپ وتىر. زاڭ جوباسى اياسىندا كاسىبي سپورتتى قارجىلاندىرۋ ماسەلەلەرىن رەتتەۋ، سپورت مەكتەپتەرى جاتتىقتىرۋشى- وقىتۋشىلارىنىڭ نورماتيۆتىك وقۋ جۇكتەمەسىن اپتاسىنا 24 ساعاتتان 18 ساعاتقا دەيىن تومەندەتۋ جوسپارلانعان.

«مەملەكەت باسشىسى اتاپ وتكەندەي، «ءبىزدىڭ بارلىق كۇش-جىگەرىمىز قازاقستاندىقتار ءومىرىنىڭ قاۋىپسىز ءارى بارىنشا ساپالى جاعدايىن قامتاماسىز ەتۋگە باعىتتالۋى ءتيىس». وسى تۇرعىدا ءبىز سپورتشىلاردى، باپكەرلەردى الەۋمەتتىك قورعاۋ، مۇمكىندىگى شەكتەۋلى سپورتشىلارعا جاعداي جاساۋ جانە وزگە دە ماسەلەلەردى قوزعايمىز. زاڭ جوباسىن جىلدىڭ سوڭىنا دەيىن پارلامەنتكە ەنگىزۋ قاجەت»، - دەدى مينيستر.

وسى ورايدا ۆيتسە-پرەمەر سپورت ماسەلەسى بويىنشا ازىرلەنەتىن زاڭ جوباسىندا بالالار سپورتىن دامىتۋ ماسەلەسىنە ەرەكشە نازار اۋدارىلۋى تيىستىگىن اتاپ ءوتتى.

«الدىمىزدا دەنە شىنىقتىرۋمەن اينالىساتىن بالالار سانىن 2 ەسەگە ارتتىرۋ مىندەتى تۇر. بۇل ءبىزدىڭ قولىمىزدان كەلەتىن مىندەت. ول ءۇشىن بىرلەسىپ جاعداي جاساۋعا ءتيىسپىز. مەملەكەتتىك سپورتتىق تاپسىرىستى تياناقتى ىسكە اسىرۋ ماڭىزدى. وسىندا ايتىلعان ۇسىنىستاردى جان-جاقتى پىسىقتاۋ قاجەت. بىرەۋلەر باسەكەلەستىككە جول بەرۋ كەرەكتىگىن ايتتى. ول دا دۇرىس. كەمشىلىكتەر بار. ولاردى دا شەشۋ قاجەت. مۇنىڭ ءبارىن جەرگىلىكتى اتقارۋشى ورگاندارمەن پىسىقتاڭىزدار. سودان كەيىن ءتيىستى شەشىم قابىلداۋ كەرەك»، - دەدى التاي كولگىنوۆ.

مادەنيەت جانە سپورت ءمينيسترىنىڭ اتاپ وتۋىنشە، بيىلدان باستاپ مەكتەپ-ينتەرناتتىڭ جاتتىقتىرۋشى-وقىتۋشىلارىنا ساناتتار ءۇشىن ولاردىڭ بىلىكتىلىگىنە بايلانىستى 6 مىڭنان 22 مىڭ تەڭگەگە دەيىن ۇستەمەاقى ەنگىزىلدى.

جەتەكشى ديەتولگتەرمەن جانە نۋتريتسيولوگتەرمەن بىرگە رەسپۋبليكالىق بارلىق مەكتەپ-ينتەرناتتار ءۇشىن سپورت تۇرلەرىنىڭ ەرەكشەلىكتەرى، جۇكتەمە، جۇمسالاتىن كيلوكالوري ەسكەرىلە وتىرىپ، جاس سپورتشىلارعا ءبىرىڭعاي اس ءمازىرى ازىرلەندى.

ءۇش كاسىپ بويىنشا سپورت سالاسىنداعى كاسىبي ستاندارت بەكىتىلدى جانە جىلدىڭ سوڭىنا دەيىن 8 كاسىپ بويىنشا ستاندارت ازىرلەنەدى.

سونىمەن قاتار جىلدىڭ سوڭىنا دەيىن سالا ماماندارى ءۇشىن حالىقارالىق تاجىريبە ەسكەرىلە وتىرىپ، بىلىكتىلىك تالاپتارى وزگەرتىلەدى.

«بۇعان قوسا، جاتتىقتىرۋشى-وقىتۋشىلارعا توپقا جەتەكشىلىك جاساعانى جانە سپورتشىنى جوعارى سپورتتىق ۇيىمدارعا بەرگەنى، سونداي-اق سپورتتىق اتاقتار ءۇشىن ۇستەمەاقىلاردىڭ جاڭا تۇرلەرىن ەنگىزۋدى جوسپارلاپ وتىرمىز. سالا قىزمەتكەرلەرىن الەۋمەتتىك قولداۋ ءىس-شارالارى بويىنشا ۇسىنىستاردى جىلدىڭ سوڭىنا دەيىن مۇددەلى مەملەكەتتىك ورگاندارمەن پىسىقتاۋدى تاپسىرامىن»، - دەدى اسحات ورالوۆ.

مينيستر كەلەسى مىندەت - سپورتتىق ينفراقۇرىلىمدى دامىتۋجانە ونىڭ قولجەتىمدىلىگىن ارتتىرۋ ەكەندىگىنە توقتالدى. ول ءۇشىن مىناداي ماسەلەلەردى شەشۋ جوسپارلانعان.

بىرىنشىدەن، ەلىمىزدەگى بارلىق سپورت ينفراقۇرىلىمىنا اۋقىمدى تۇگەندەۋ جۇرگىزىلەدى.

ەكىنشى، سپورت نىساندارىن ەسەپكە الۋ ادىستەمەسىنە وزگەرىستەر ەنگىزىلەدى.

ءۇشىنشى، سپورت ينفراقۇرىلىمىنىڭ ءبىرىڭعاي ءتىزىلىمى جاساقتالادى.

تورتىنشىدەن، اۋىلدىق جەرلەردە تەز سالىناتىن، شىعىن از مودۋلدىك نىساندار قۇرىلىسى قولعا الىنادى.

ەستە بولسا، وتكەن جىلى مەملەكەت باسشىسى قاسىم-جومارت توقايەۆ سپورت زالدارى تاپشىلىعىن جويۋ ماقساتىندا سپورت نىساندارىن سالۋ، جاڭعىرتۋ جانە جابدىقتاۋ تۋرالى تاپسىرما بەرگەن بولاتىن.

وسى تاپسىرما اياسىندا 2025-جىلعا دەيىن ەلىمىزدىڭ اۋماعىندا 113 جاڭا سپورتتىق كەشەن سالىنۋى ءتيىس. جالپى، حالىقتى سپورتتىق ينفراقۇرىلىممەن قامتاماسىز ەتۋ - سالانىڭ نەگىزگى ينديكاتورلارىنىڭ ءبىرى.

سوندىقتان وڭىرلەر پرەزيدەنت تاپسىرماسى اياسىندا ازىرلەنگەن جوسپاردى جۇزەگە اسىرۋ جۇمىستارىن قارقىندى جۇرگىزىپ، نىسانداردى دەر ۋاقىتىندا پايدالانۋعا بەرۋى قاجەت.

القا وتىرىسىندا ۇكىمەت باسشىسىنىڭ ورىنباسارى التاي كولگىنوۆ مينيسترلىك الدىنا ۇلتتىق سپورتتى دامىتۋ مىندەتىن دە قويدى.

«بۇگىنگى كۇنى ەلىمىزدىڭ 500 مىڭنان اسا ازاماتى ۇلتتىق سپورت تۇرلەرىمەن اينالىسادى. ول وتە جاقسى. ءبىراق، ونى ارى قاراي دامىتۋ كەرەك. ءداستۇرلى سپورتتى بالالار اراسىندا دارىپتەپ، ۇرپاعىمىزعا دۇرىس تاربيە بەرۋ مىندەتى الىمىزدا تۇر. وسى ماقساتتا ءبىلىم بەرۋ ۇيىمدارىندا دەنە تاربيەسى ساباقتارىندا ۇلتتىق سپورت تۇرلەرى بويىنشا مىندەتتى كومپونەنت قولدانىسقا ەنگىزىلدى. قازاق كۇرەسى مەملەكەتتىك سپورتتىق تاپسىرىس اياسىندا قارجىلاندىرىلاتىن سپورت سەكتسيالارىنىڭ قاتارىنا قوسىلدى. مەملەكەتتىك سپورتتىق قارجىلاندىرىلاتىن سپورت تۇرلەرىنىڭ قاتارىنا توعىزقۇمالاق پەن اسىق اتۋدى قوسۋ ۇسىنىستارى دا ءتۇسىپ جاتىر. مينيسترلىككە مۇنى دا قاراۋدى سۇرايمىز»، - دەدى التاي كولگىنوۆ.