تەرروريزم تۋرالى جالعان حابارلاما بەرەتىندەرگە جازا كۇشەيتىلمەك
بۇل تۋرالى قازاقپارات باس پروكۋراتۋرانىڭ باسپا ءسوز قىزمەتىنە سىلتەمە جاساپ حابارلايدى.
باس پروكۋراتۋرا قۇقىق قورعاۋ ورگاندارىمەن (ۇ ق ك، ۇ ق ك ا ت و، ق م ا جانە ءى ءى م) بىرلەسىپ، كورىنەۋ جالعان تەرروريزمگە قارسى ءىس-قيمىل جۇمىستارىن جالعاستىرىپ جاتىر.
ادەتتە، اتالعان فاكتىلەردى تەكسەرۋ كوپ ۋاقىت پەن رەسۋرستاردى قاجەت ەتەدى. وقيعا ورنىنا پوليتسيا، قۇتقارۋشىلار، كينولوگتەر، ءورت سوندىرۋشىلەر، جەدەل جاردەم بريگادالارى، جەدەل تەرگەۋ توپتارى بارادى. كاسىپورىنداردىڭ قالىپتى جۇمىس رەجيمى بۇزىلادى. بۇل كۇش پەن قۇرالداردىڭ ايتارلىقتاي اۋىتقۋىنا اكەلەدى، تەكسەرىلەتىن كوممەرتسيالىق كاسىپورىندار ميلليونداعان شىعىنعا ۇشىرايدى، تەررولىق شابۋىل تۋرالى جالعان حابارلامالار ادامداردى ەۆاكۋاتسيالاۋ كەزىندە دۇربەلەڭ مەن قۇرباندىققا اكەلۋى مۇمكىن.
قۇقىق قورعاۋ جانە ارنايى ورگاندار وسىنداي انونيمدى حابارلامالاردىڭ اۆتورلارىن انىقتاۋ بويىنشا شارالار قابىلدايدى. 2022-جىلى 25 ادام سوتتالدى. مىسالى، 2022-جىلعى شىلدەدە قوستاناي وبلىسىنىڭ تۇرعىنى ءوز كورشىسىنەن كەك الۋ ماقساتىندا ەلەكتروندىق پوشتاسىن بۇزىپ، ونىڭ اتىنان استانا جانە الماتى قالالارىنىڭ 13 نىسانىنداعى (ساۋدا ورتالىقتارى، اۋەجايلار، بانكتەر جانە ت. ب.) تەرروريزم اكتىسى تۋرالى كورىنەۋ جالعان حابارلاما جىبەرگەنى ءۇشىن 1 جىل 6 ايعا باس بوستاندىعىنان ايىرىلدى.
الماتى وبلىسىندا قۇرداستارىمەن باستەسىپ ەلەكتروندى پوشتا ارقىلى 3 مەكتەپتى مينالاۋ تۋرالى حابارلاما جىبەرگەن 13 جاسار بالا انىقتالىپ، پوليتسياعا جەتكىزىلدى. كامەلەتكە تولماعان بالانى تاربيەلەۋ جونىندەگى مىندەتىن ورىنداماعان ءۇشىن وقۋشىنىڭ اتا-اناسى جاۋاپكەرشىلىككە تارتىلدى.
ايتا كەتۋ كەرەك، قۇقىقتىق ءتارتىپتى قورعاۋ ورگاندارىندا قىلمىستىق جاۋاپكەرشىلىككە تارتۋ ءۇشىن وسىنداي قۇقىق بۇزۋشىلاردى جەدەل انىقتاۋ پراكتيكالىق تاجىربيەسى بار. تاجىريبە كورسەتكەندەي، قىلمىسكەرلەر تەك ەل ىشىندە عانا ەمەس، ودان تىس جەرلەردە دە ارەكەت ەتەدى.
جەدەل ءوزارا ءىس-قيمىل ماقساتىندا شەت مەملەكەتتەرمەن ينتەرنەت-كەڭىستىكتەگى انونيمدى حابارلامالاردىڭ اۆتورلارىنا قاتىستى دەرەكتەر الماسۋ بويىنشا قازاقستان باس پروكۋراتۋرانىڭ ۇيلەستىرۋمەن بۋداپەشت كونۆەنتسياسىنا («كومپيۋتەرلىك قىلمىستار تۋرالى») قوسىلماق.
سونداي-اق، باس پروكۋراتۋرا مۇددەلى مەملەكەتتىك ورگاندارمەن بىرلەسىپ كورىنەۋ جالعان تەرروريزم بويىنشا قىلمىستىق جاۋاپتىلىقتى كۇشەيتۋ جانە قۇقىق بۇزۋشىلىقتىڭ وسى ءتۇرىن «اۋىر» ساناتقا جاتقىزۋ (7 جىلعا دەيىن باس بوستاندىعىنان ايىرۋ مەرزىمى) تۋرالى ماسەلە پىسىقتالىپ جاتىر.