جاڭادان سايلانعان سەنات دەپۋتاتتارى الداعى جوسپارىن ايتتى
ورتالىق سايلاۋ كوميسسياسى وتىرىسىنان كەيىن ب ا ق وكىلدەرى سەنات باسشىسى رەتىندە ورنىن بوساتقان ماۋلەن اشىمبايەۆتان قايتا ءتوراعا بولىپ تاعايىندالۋعا قاتىستى ويىن سۇرادى.
«بۇل پرەزيدەنتتىڭ وكىلەتىندەگى ماسەلە. زاڭعا سايكەس سەنات سپيكەرىنىڭ كانديداتۋراسىن پرەزيدەنت ۇسىنادى، سودان كەيىن دەپۋتاتتار داۋىس بەرەدى. سوڭعى شەشىمدى مەملەكەت باسشىسى قابىلدايدى»، - دەپ قىسقا قايىردى بۇرىنعى سەنات ءتوراعاسى.
بۇگىن سەناتور اتانىپ، كۋالىك العان دەپۋتاتتاردىڭ ءبىرى جوعارعى سوتتىڭ بۇرىنعى ءتوراعاسى جاقىپ اسانوۆ.
«سەنات دەپۋتاتى بولعانىمدى كەشە عانا ءبىلدىم. ۇلكەن سەنىم ارتىلىپ وتىر. قۇقىق قورعاۋ جانە سوت جۇيەلەرىنە قاتىستى زاڭ جوبالارىن ازىرلەۋدە سەناتپەن بىرلەسىپ جۇمىس ىستەپ كەلدىك. اسىرەسە سەنات دەپۋتاتتارىمەن وتكەن جىلدىڭ تامىز ايىنان باستاپ تىعىز جۇمىس ىستەدىك. ءبىرقاتار كەلىسىلگەن شەشىمدەر قابىلداندى. ەندىگى ۋاقىتتا سوت جۇيەسى جانە قۇقىق قورعاۋ جۇيەسىندەگى تاجىريبەنى، ءبىلىم مەن يدەيالاردى قولداناتىن بولامىز»، - دەيدى جاڭا دەپۋتات ج. اسانوۆ تىلشىلەردىڭ ساۋالىنا جاۋاپ بەرە تۇرىپ.
ەسكە سالساق، 14- قاڭتاردا كەزەكتەن تىس سەنات دەپۋتاتتارى سايلاۋى ءوتتى. ساياسي ناۋقان ناتيجەسىندە ءار وڭىردەن ءبىر دەپۋتات سايلاندى. ەلوردادان سايلانعان بەلگىلى جۋرناليست بۇبىگۇل جەكسەنباي. بۇگىن جاڭا سەناتور كۋالىك الىپ، توسبەلگى تاقتى.
«سەنات دەپۋتاتى بولىپ استانا قالاسىنان سايلانىپ وتىرمىن. قولداۋ تانىتقاندارعا العىس ايتامىن. ونىڭ ىشىندە ارىپتەستەرىم، تىلشىلەر قاۋىمى دا بار. حالىق قالاۋلىسى اماناتىن ارقالاۋ ۇلكەن جاۋاپكەرشىلىك. بۇل قادامعا سانالى تۇردە باردىم. 30 جىلعا جۋىق سىزدەر سياقتى ميكروفون ۇستاپ ءجۇردىم. ەلدىڭ الەۋمەتتىك جاعدايى ماعان تاڭسىق ەمەس، حابارىم بار. حالىقتىڭ مۇڭ- مۇقتاجىن ءتۇرلى دەڭگەيدەگى بيلىك وكىلدەرىنە جەتكىزىپ جۇردىك. قازىر ماس- ميديا تۋرالى زاڭ جوباسى قوعام تالقىسىنان ءوتىپ جاتىر. كوپتەگەن ۇسىنىستار ايتىلىپ، وزگەرىستەر ەنگىزىلگەلى جاتىر. اتالعان زاڭ پارلامەنت قابىرعاسىنا كەلگەندە ءوز ۇلەسىم قوسىپ، كوزقاراسىمدى بىلدىرەمىن»، - دەدى ب. جەكسەنباي.
ونىڭ ايتۋىنشا، سەنات قىزمەتىندە ۇلكەن وزگەرىستەر بولىپ جاتىر. بۇرىن سەنات زاڭ شىعارىپ، قابىلداپ كەلسە، ەندى مەملەكەت باسشىسىنىڭ تاپسىرمالارىنا سايكەس وڭىرلەرمەن جۇمىستى كۇشەيتەدى.
«وزدەرىڭىز بىلەتىندەي ناۋرىزدا ءماجىلىس جانە جەرگىلىكتى ءماسليحاتتارى دەپۋتاتتارى سايلاۋى وتەدى. دەمەك وڭىرلەردەگى ءماسليحاتتاردىڭ پارمەنى ارتادى. حالىق ومىرىنە وڭ وزگەرىستەر اكەلەتىن زاڭ جوبالارىن بىرلەسىپ قاراستىراتىن بولامىز دەپ ويلايمىن»، - دەيدى جاڭا دەپۋتات.
كەشە مەملەكەت باسشىسىنىڭ جارلىعىمەن پارلامەنتتىڭ جوعارى پالاتاسىندا اسسامبلەيا اتىنان وكىلدىك ەتەتىن دەپۋتاتتار انىقتالدى. سونىڭ ءبىرى گەننادي شيپوۆسكيح. ول بۇعان دەيىن ءماجىلىس دەپۋتاتى بولعان.
«دەپۋتات رەتىندە بەكىتىلگەن رەگلامەنتپەن جۇمىس ىستەيتىن بولامىز. وڭىرلەردىڭ ماسەلەلەرىنە باسا نازار اۋدارىلادى. مەن بۇعان دەيىن پارلامەنت ءماجىلىسىنىڭ 6 جانە 7 شاقىرىلىمىنىڭ دەپۋتاتى بولدىم. ماجىلىستە جيىن- تەرگەن تاجىريبەمدى سەنات قابىرعاسىندا جالعاستىراتىن بولامىن. تاعايىندالعانىما قۋانىشتىمىن، سەبەبى ماجىلىستە باستاعان شارۋالاردى سەناتتا جالعاستىرۋ مۇمكىندىگى بار»، - دەيدى ول.
سونىمەن قاتار گ. شيپوۆسكيح قىزمەت اياسىنداعى ۇسىنىس، پىكىرلەردى تىڭداۋعا دايىن ەكەندىگىن جەتكىزدى.
ايتا كەتەيىك، بۇگىن ورتالىق سايلاۋ كوميسسياسى مەملەكەت باسشىسىنىڭ قاۋلىسىمەن تاعايىندالعان 10 سەناتوردى رەسمي تىركەدى.
ودان بولەك، 14- قاڭتاردا وتكەن كەزەكتەن تىس سەنات سايلاۋىندا باعى جانعان دەپۋتاتتار دا كۋالىك الىپ، توسبەلگى تاقتى.
اۆتور
داۋلەت ىزتىلەۋ