زاڭسىز شىعارىلعان اكتيۆتەردى مەملەكەتكە قايتارۋ تۋرالى زاڭ جوباسى قارالدى

استانا. قازاقپارات – ق ر پرەمەر- ءمينيسترى ءاليحان سمايىلوۆ ورتالىق مەملەكەتتىك ورگاندار، پرەزيدەنت اكىمشىلىگى، ۇلتتىق بانك جانە باس پروكۋراتۋرا باسشىلارىنىڭ قاتىسۋىمەن ەكونوميكالىق ساياسات جونىندەگى كەڭەستىڭ وتىرىسىن وتكىزدى، دەپ حابارلايدى primeminister.kz.

قاتىسۋشىلار پرەزيدەنت العا قويعان مىندەتتەرگە سايكەس ازىرلەنگەن ەلدەن زاڭسىز شىعارىلعان اكتيۆتەردى مەملەكەتكە قايتارۋ تۋرالى زاڭ جوباسىن قارادى. وندا اكتيۆتەردى زاڭسىز شىعارۋعا ىقپال ەتكەن شارتتاردى جويۋعا، ولاردى ەرىكتى تۇردە قايتارۋدى ىنتالاندىرۋعا نەمەسە ءماجبۇرلى تۇردە قايتارۋ باستاماسىن كوتەرۋگە جانە ت. ب. باعىتتالعان نورمالار قاراستىرىلعان.

ۋاكىلەتتى مەملەكەتتىك ورگانداردىڭ مالىمەتتەرىن تالداۋ ناتيجەلەرى بويىنشا اكتيۆتەر تۋرالى ارنايى دەكلاراتسيانى تاپسىراتىن تۇلعالاردىڭ شەكتەۋلى ءتىزىلىمىن قۇرۋ جوسپارلانۋدا. اكتيۆتەردىڭ يەسى ولاردىڭ شىعۋ تەگىن راستاي الماعان جاعدايدا، نەگىزسىز ساتىپ الىنعان دەپ تانىلادى جانە مەملەكەت كىرىسىنە اينالادى.

كەلىپ تۇسەتىن اكتيۆتەردى قازاقستان حالقىنىڭ ءال- اۋقاتىن ارتتىرۋعا باعىتتالعان جوبالاردى قارجىلاندىرۋ ءۇشىن پايدالانۋ كوزدەلگەن.

پرەمەر- مينيستر ادىلەت مينيسترلىگىنە ايتىلعان پىكىرلەر مەن ەسكەرتۋلەردى ەسكەرە وتىرىپ، زاڭ جوباسىن مۇقيات پىسىقتاۋدى جالعاستىرۋدى تاپسىردى.

سونىمەن قاتار وتىرىستا اۋىل شارۋاشىلىعىنداعى ينۆەستيتسيالىق جوبالاردى ىسكە اسىرۋ ماسەلەلەرى تالقىلاندى.

فوتو: primeminister.kz