قىزىل جەگى اۋرۋى جۇعا ما - دارىگەر جاۋابى

None
الماتى. قازاقپارات - كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ ريەۆماتولوگ دارىگەرى مارجان ابدۋللايەۆا جۇيەلى قىزىل جەگى اۋرۋىنىڭ بەلگىلەرى مەن ونىڭ الدىن الۋ جولدارى تۋرالى ايتتى، دەپ حابارلايدى قازاقپارات ءتىلشىسى.

دارىگەردىڭ سوزىنشە، جۇيەلى قىزىل جەگى - سوزىلمالى اۋتويممۋندى اۋرۋ، ول اعزاعا، اسىرەسە تەرىگە، بۋىندارعا، ءقانتۇزىلىم جۇيەسىنە، بۇيرەككە جانە ورتالىق جۇيكە جۇيەسىنە اسەر ەتۋى مۇمكىن.

ول جۇقپالى اۋرۋ ەمەس.

ايتۋىنشا، اتالعان دەرتكە شالدىققان ناۋقاستا دەنە قىزۋىنىڭ بىرتىندەپ نە تۇراقتى تۇردە كوتەرىلۋى، سالماق تاستاۋ جانە تابەتتىڭ جوعالۋى بايقالادى.

كوبىنەسە اۋرۋ تەرىگە جانە شىرىشتى قاباتتارعا اسەر ەتەدى. ءارتۇرلى تەرى بورتپەلەرى، فوتوسەنسيبيليزاتسيا (كۇن ساۋلەسىنىڭ اسەرىنەن بورتپە پايدا بولۋى)، مۇرىن نەمەسە اۋىز قۋىسىندا جارالار پايدا بولادى.

مۇرىن مەن شەكەگە «كوبەلەك» تۇرىندە بورتپەلەر شىعادى. كەيدە شاش كوپ تۇسە (الوپەتسيا) باستايدى. قولدار قىزىل، سودان كەيىن اق، سۋىققا شىققان كەزدە كوك بولادى.

اۋرۋ بەلگىلەرى - بۋىنداردىڭ ءىسىنۋى مەن قاتتىلىعى، بۇلشىقەت اۋرۋى، انەميا، كوگەرۋدىڭ پايدا بولۋى، باس اۋرۋى، قۇرىسۋلار جانە كەۋدەدە اۋىرسىنۋ بولادى.

بۇيرەكتىڭ اۋىر زاقىمدانۋىنىڭ ەڭ ءجيى كەزدەسەتىن بەلگىلەرى - قان قىسىمىنىڭ جوعارىلاۋى، اقۋىزدىڭ بولۋى، زاردەگى قان، سونداي- اق اياقتىڭ جانە قاباقتىڭ ءىسىنۋى.

كارديولوگيا جانە ىشكى اۋرۋلار عزي ريەۆماتولوگ دارىگەرى مارجان ابدۋللايەۆانىڭ ايتۋىنشا، ەمدەۋشى دارىگەر تاعايىنداعان ءدارى- دارمەك قابىلداۋ جەگى بەلگىلەرىن باقىلاۋعا كومەكتەسەدى. زەرتحانالىق زەرتتەۋلەر دياگنوز قويۋعا جانە اۋرۋدىڭ قانداي ىشكى ورگاندارعا اسەر ەتەتىنىن انىقتاۋعا كومەكتەسەدى.

«دەنىم ساۋ بولسىن دەگەن ءار ادام اۋرۋدىڭ الدىن الۋ ءۇشىن دارىگەرگە قارالۋى كەرەك. اۋرۋدى ەرتە انىقتاپ، ەرتە كۇرەسسە قىزىل جەگىنى ەمدەۋ ناتيجەسى جاقسارادى. ونى ستەرويدتى ەمەس قابىنۋعا قارسى پرەپاراتتاردى، گيدروكسيحلوروحيندى، كورتيكوستەرويدتاردى، تسيتوستاتيكتەردى، گەندىك- ينجەنەرلىك بيولوگيالىق پرەپاراتتاردى قولدانۋ ارقىلى ەمدەۋگە بولادى. ەگەر دياگنوز ەرتە قويىلسا جانە پاتسيەنت ءتيىستى ەم السا، وندا اۋرۋ ادەتتە كەرى كەتەدى جانە رەميسسياعا اۋىسۋى مۇمكىن. الايدا، جۇيەلى قىزىل جەگى بولجانبايتىن سوزىلمالى بولعان سوڭ ناۋقاستار مەديتسينالىق باقىلاۋدا بولىپ، ۇنەمى ءدارى- دارمەكتەر قابىلداۋى كەرەك»، - دەيدى مارجان ابدۋللايەۆا.

سونىمەن قاتار، دارىگەر اۋرۋدىڭ بەتى قايتا باستاعان كەزدەن تۇراقتى تۇردە جاتتىعۋلار جاساپ، دۇرىس تاماقتانۋعا كەڭەس بەردى.

«جاياۋ ءجۇرۋ، ۆەلوسيپەد تەبۋ، ءجۇزۋ جانە باسقا اەروبتى سپورت تۇرلەرى نەمەسە اشىق اۋادا ءجيى سەرۋەندەگەن ءجون. قىزىل جەگىمەن اۋىراتىن ناۋقاستار دۇرىس تاماقتانۋى كەرەك. اۋرۋ ءورشىپ كەتپەس ءۇشىن ناۋقاس كۇن ساۋلەسىنەن قورعايتىن جاقپا جاعىپ، ۆيرۋستىق ينفەكتسيالار، سترەسس، گورمونالدى جانە باسقا دا ءدارى- دارمەكتەردەن اۋلاق بولعانى ءجون»، - دەدى ريەۆماتولوگ.

سوڭعى جاڭالىقتار