ورمان شارۋاشىلىعى سالاسىنداعى جۇمىسشىلاردىڭ جالاقىسى ەكى ەسە وسەدى - ۇكىمەت
بۇل تۋرالى ۇكىمەت باسشىسى ءاليحان سمايىلوۆ ءمالىم ەتتى، دەپ حابارلايدى قازاقپارات ءتىلشىسى.
«قازىرگى ۋاقىتتا مەملەكەت باسشىسىنىڭ تاپسىرماسىن ىسكە اسىرۋ اياسىندا ورمان جانە تابيعاتتى قورعاۋ مەكەمەلەرىنىڭ ماتەريالدىق-تەحنيكالىق بازاسىن كەزەڭ-كەزەڭىمەن نىعايتۋ جونىندە شارالار قابىلدانىپ جاتىر. 2023-2025-جىلدارعا ورمان جانە تابيعاتتى قورعاۋ مەكەمەلەرىنىڭ ءورت ءسوندىرۋ جانە پاترۋلدىك اۆتوموبيلدەرمەن قامتاماسىز ەتىلۋىن 100 پايىزعا جەتكىزۋ، ءورتتى سوندىرۋگە ارنالعان ارنايى كيىممەن قامتاماسىز ەتۋ جوسپارلانعان. سونىمەن قاتار، 2023-2025-جىلدارى ورمان شارۋاشىلىعى سالاسىنداعى جۇمىسكەرلەردىڭ جالاقىسىن كەزەڭ-كەزەڭىمەن 2 ەسەگە ءوسىرۋ ماسەلەسى پىسىقتالىپ جاتىر»، - دەپ جازدى ءا. سمايىلوۆ سەنات دەپۋتاتىنىڭ ساۋالىنا جاۋاپ بەرە وتىرىپ.
ونىڭ ايتۋىنشا، مەملەكەت باسشىسىنىڭ ورمان قورى اۋماعىندا 2 ميلليارد تۇپتەن استام اعاش وتىرعىزۋ جانە ەلدى مەكەندەر مەن قالالاردا 15 ميلليون استام اعاش وتىرعىزۋ ارقىلى ەلدەگى ورمان القابىن 500 مىڭ گەكتارعا ۇلعايتۋ تۋرالى تاپسىرماسى ورىندالىپ جاتىر. وسى ورايدا 2021-2025-جىلدارعا ارنالعان ورمان ءوسىرۋ الاڭدارىن ۇلعايتۋ جونىندەگى كەشەندى جوسپارلار بەكىتىلدى.
«ورمان شارۋاشىلىعى سالاسىنداعى مامانداردى دايارلاۋ باعىتىندا 2022-2023 وقۋ جىلىندا مەملەكەتتىك ءبىلىم بەرۋ تاپسىرىسى نەگىزىندە «وسىمدىكتەر الەمى تۋرالى» ءبىلىم بەرۋ باعدارلاماسى توبى بويىنشا جالپى 530 گرانت جانە «ورمان شارۋاشىلىعى» ءبىلىم بەرۋ باعدارلاماسىنا 210 گرانتى ءبولىندى»، - دەدى ۇكىمەت باسشىسى.
سونىمەن قاتار، ورمان شارۋاشىلىعى سالاسىندا جوعارى وقۋ ورنىنان كەيىن مامانداردى دايارلاۋ ماسەلەسى بويىنشا وسى وقۋ جىلىنا «وسىمدىكتەر الەمى تۋرالى» جانە «ورمان شارۋاشىلىعى» ءبىلىم بەرۋ باعدارلامالارىنىڭ توپتارى بويىنشا ماگيسترلەردى دايارلاۋعا 270 گرانت جانە РһD دوكتورلارىن دايارلاۋعا 28 ورىن ەسكەرىلگەن.
اتاپ ايتقاندا، ورمان شارۋاشىلىعى كادرلارىن دايارلاۋعا ارنالعان گرانت سانى 19 پايىزعا ءوستى.
بۇدان بۇرىن حابارلانعانداي، سەناتور ايگۇل قاپباروۆا پرەمەر-مينيستر ءاليحان سمايىلوۆتىڭ اتىنا جولداعان دەپۋتاتتىق ساۋالىندا ورمان شارۋاشىلىعى سالاسىن ساقتاۋ جونىندە ءبىرقاتار ۇسىنىس ايتقان بولاتىن.