قازاق باسىلىمدارى ءبىر ورتالىقتان باسقارىلاتىن بولدى

استانا. قازاقپارات - اقپارات جانە قوعامدىق دامۋ ءمينيسترى دارحان قىدىرالى الماتىدا قايتا قۇرىلعان «قازاق گازەتتەرى» ج ش س ۇجىمىمەن كەزدەستى.

بۇل تۋرالى مينيستر ءوزىنىڭ Facebook پاراقشاسىندا جازدى.

دارحان قىدىرالىنىڭ ايتۋىنشا، «قازاق گازەتتەرى» مەن «ەگەمەن قازاقستان» ج ش س-نىڭ بىرىگۋ جۇمىستارى ءساتتى اياقتالدى.

«قازاق گازەتتەرى» دەپ اتالاتىن قۇرىلىم ءوز دامۋىنىڭ جاڭا كەزەڭىنە اياق باستى دەپ ايتا الامىز. جاڭا قۇرىلىم جاڭا عيماراتتا جۇمىسىن باستادى. ۇجىم قىزمەتكەرلەرىنىڭ جالاقىسى، قالاماقى جانە سىياقى ءوستى. الدا دا اتقارىلاتىن جۇمىس كوپ. ەندى «ەگەمەن قازاقستان»، «كازاحستانسكايا پراۆدا»، «انا ءتىلى»، «اقيقات»، «مىسل»، «تەڭگە مونيتور»، «ۇيعىر اۆازي»، «ۇركەر»، «اقجەلكەن»، «بالدىرعان»، «ۇلان»، «درۋجنىە رەبياتا» باسىلىمدارى ءبىر شاڭىراقتىڭ استىندا قىزمەت ىستەيدى. بۇل - ورتاق اقپاراتتىق قىزمەت، - دەپ جازدى مينيستر.

سونداي-اق «قازاق گازەتتەرىنە» كەلگەن جاڭا باسشىلار دا بەلگىلى بولدى.

ەكى ۇجىمنىڭ بىرىگۋىنە وراي «قازاق گازەتتەرىنىڭ» باس ديرەكتورى بولىپ اكادەميك ديحان قامزابەك ۇلى تاعايىندالدى. سونداي-اق بەلگىلى جۋرناليست دۋمان اناش «قازاق گازەتتەرى» باس ديرەكتوردىڭ ورىنباسارى - الماتى فيليالىنىڭ باسشىسى، ەرلان ءجۇنىس «انا ءتىلى» گازەتىنىڭ باس رەداكتورى جانە اسىل ساعىمبەكوۆ «مىسل» جۋرنالىنىڭ باس رەداكتورى بولىپ تاعايىندالدى، - دەپ جازدى د. قىدىرالى.