ديماش قۇدايبەرگەن تاعى ءبىر ەلدە جەكە كونسەرتىن وتكىزەدى

None
استانا. قازاقپارات - ديماش قۇدايبەرگەن الەم ەلدەرى بويىنشا «Stranger» اتتى تۋرنەسىن جالعاستىرۋدا. تۋرنە اياسىندا قازاقستاندىق ءانشى تۇركيادا جەكە كونسەرتىن وتكىزەدى، دەپ حابارلايدى قازاقپارات dimash.news Instagram-پاراقشاسىنا سىلتەمە جاساپ.

«DimashAli» شىعارماشىلىق ورتالىعى 2023 -جىلعى 6-مامىردا تۇركيانىڭ انتاليا قالاسىنداعى اكدەنيز ۋنيۆەرسيتەتىنىڭ كوپ فۋنكسيونالدى ستاديونىندا وتەتىن ديماش قۇدايبەرگەننىڭ جەكە كونسەرتى تۋرالى حابارلايدى»، - دەلىنگەن پاراقشادا.

بيلەتتەر ساتىلىمى https://www.dimashali.com سايتىندا استانا ۋاقىتىمەن 23-قاڭتار كۇنى، ساعات 12:00-دە باستالدى.

اكدەنيز ۋنيۆەرسيتەتىنىڭ كوپ فۋنكسيونالدى ستاديونى جەرورتا تەڭىزىنىڭ جاعالاۋىندا ورنالاسقان. سىيىمدىلىعى - 7100 ادام.

ايتا كەتەيىك، ديماش «Stranger» الەمدىك تۋرنەسىن الماتى قالاسىنان باستاعان بولاتىن.

تۇركياداعى كونسەرتىنە دەيىن د. قۇدايبەرگەن 29-ساۋىردە ارمەنياداعى فاناتتارىن قۋانتپاق. كونسەرت ءىرى كەشەندەردىڭ ءبىرى، 12 مىڭ كورەرمەنگە ارنالعان كارەن دەميرچيان اتىنداعى سپورت-كونسەرت كەشەنىندە وتەدى. بيلەتتەردى الدىن الا ساتۋ 31-قاڭتاردا اياقتالادى.

ال 24-ماۋسىمدا قازاقستاندىق ءانشى مالايزيادا جەكە كونسەرت بەرۋدى جوسپارلاپ وتىر.

سوڭعى جاڭالىقتار