استانانىڭ جاڭا كوشەلەرىنە سۇلتان بەيبارىس، سانجار اسفەندياروۆ، بەردىبەك سوقپاقبايەۆتىڭ ەسىمدەرى بەرىلەدى

استانا. قازاقپارات - ەلوردادا بىرنەشە قوعام قايراتكەرلەرى مەن جازۋشىلارعا كوشە بەرىلەدى. بۇل تۋرالى قالالىق تىلدەردى دامىتۋ جانە ارحيۆ ىستەرى باسقارماسىنىڭ باسشىسى ساكەن ەسىركەپ ايتتى، دەپ حابارلايدى قازاقپارات ءتىلشىسى.

«بۇگىن استانانىڭ كەيبىر كوشەلەرىنە اتاۋ بەرۋ جانە ولاردىڭ اتىن وزگەرتۋ ۇسىنىستارىن تالقىعا سالامىز. اتاپ ايتقاندا، ا-23 جوبالىق كوشەگە ەكىنشى دۇنيەجۇزىلىك سوعىس جاۋىنگەرى، مايدانگەر جازۋشى، بىلىكتى جۋرناليست اسكەر نابيەۆتىڭ اتىن بەرۋ، ا-24 جوبالىق كوشەگە - قازاقستاننىڭ مەملەكەتتىك سىيلىعىنىڭ لاۋرەاتى سىرباي ماۋلەنوۆتىڭ اتىن بەرۋ، ە-12 جوبالىق كوشەگە - قازاقتىڭ قاھارمان قىزى، كەڭەس وداعىنىڭ باتىرى مانشۇك مامەتوۆانىڭ ەسىمىن بەرۋ، ە-20 جوبالىق كوشەگە - ايگىلى اكادەميك، عالىم، ۇلتتىق عىلىم اكادەمياسىنىڭ اكادەميگى شاپىق شوكيننىڭ ەسىمىن بەرۋ، ە-753 جوبالىق كوشەگە - كورنەكتى مەملەكەت جانە قوعام قايراتكەرى، تاريحشى، دارىگەر، عالىم، پروفەسسور سانجار اسفەندياروۆتىڭ ەسىمىن بەرۋ، №187-جوبالىق كوشەگە - بالالار ادەبيەتىنىڭ كورنەكتى وكىلى، كلاسسيك جازۋشى بەردىبەك سوقپاقبايەۆتىڭ اتىن بەرۋ، №189 جوبالىق كوشەگە - قازاق دالاسىنان شىعىپ، مىسىر ەلىندە 17 جىل ماملۇكتەردى باسقارعان بەيبارىس سۇلتاننىڭ ەسىمىن بەرۋ»، - دەدى ساكەن ەسىركەپ قالالىق ءماسليحاتتىڭ كەزەكتەن تىس سەسسياسىندا.

سونىمەن بىرگە №23-16-كوشە مەن ماعجان جۇمابايەۆ داڭعىلىن بىرىكتىرىپ، ماعجان جۇمابايەۆ داڭعىلى دەپ قايتا اتاۋ كوزدەلىپ وتىر.

«وڭ جاعالاۋداعى ەسكى مانشۇك مامەتوۆا كوشەسىنە ىلە وزەنى بويىنداعى 17-18-عاسىرداعى ورتاعاسىرلىق قالانىڭ اتى «قارامەرگەن» دەگەن اتتى ۇسىنىپ وتىرمىز. بۇقار جىراۋ كوشەسىنە ياعني، بوتانيكالىق باقتان Mega Silkway ساۋدا-ويىن-ساۋىق ورتالىعىنا دەيىن جالعاسقان ساۋران كوشەسىنىڭ قىسقا بولىگىن گەيدار اليەۆتىڭ ەسىمىمەن اتاۋ جوسپارلانعان»، - دەدى سپكيەر.

ءماسليحات دەپۋتاتتارى بۇل ۇسىنىستى تولىق قولدادى.