ەلوردادا ايازدى كۇنى جولاقى تولەمەگەن ستۋدەنتتى اۆتوبۋستان ءتۇسىرۋ فاكتىسى تەكسەرىلۋدە

None
استانا. قازاقپارات - ەلوردالىق City Transportation Systems كومپانياسى ايازدى كۇنى ستۋدەنتتى اۆتوبۋستان ءتۇسىرىپ كەتۋ تۋرالى شاعىمعا جاۋاپ بەردى، دەپ حابارلايدى قازاقپارات ءتىلشىسى.

«بۇگىن مەنىڭ ۇلىم اۆتوبۋستان ءتۇسىرىپ كەتتى. ول ستۋدەنت جانە ساباقتان كەلە جاتقاندا تەلەفونىنىڭ قۋاتى ءبىتىپ، جولاقىسىن تولەي الماعان. قولما- قول اقشا دا بولماعان. باقىلاۋشى ادامگەرشىلىكپەن قاراماي، اۆتوبۋستان ءتۇسىرىپ كەتكەن. باسقا كۇندەرى، اۋا رايى جىلى بولعاندا تۇسىنۋگە بولادى. ءبىراق مۇنداي ايازدى كۇنى ەمەس»، - دەپ شاعىمداندى Facebook قولدانۋشىسى.

بۇل جاعدايعا CTS كومپانياسى تۇسىنىكتەمە بەردى. كولىكتىك باقىلاۋ دەپارتامەنتىنىڭ قىزمەتكەرلەرى جەلىگە مونيتورينگ كەزىندە مۇنداي جاعدايلاردا پروفيلاكتيكالىق اڭگىمەلەر جۇرگىزىلەتىنىن جانە ەشكىمدى جولدان تۇسىرمەيتىنىن ايتتى.

اتالعان شاعىمدى وبەكتيۆتى قاراۋ ءۇشىن، اۆتوبۋستاردان بەينەجازبانى الۋ ءۇشىن قىزمەتكەردىڭ اتى- ءجونىن، اۆتوبۋستىڭ مەملەكەتتىك نەمەسە گاراج ءنومىرىن، وقيعا بولعان كۇن مەن ۋاقىت، مارشرۋت ءنومىرىن ناقتىلاۋ قاجەت.

«ايازدى كۇنى بالالاردى ءتۇسىرىپ كەتۋگە بولمايدى دەگەن ارنايى تىيىم بار. سونىمەن قاتار، بالا كولىك كارتاسىن ۇمىتىپ كەتۋى مۇمكىن، بۇل جاعدايدا ونىمەن اڭگىمە جۇرگىزىلەدى جانە كولىكتەن تۇسىرىلمەيدى. ءبىراق قازىرگى جاعدايدا بالا ەمەس، ستۋدەنت جول اقىسىن تولەي الماعان. جولاقىسىن تولەمەگەنى ءۇشىن 2 ا ە ك ايىپپۇل سالىناتىنى بەلگىلى. نە بولعانىن انىقتاۋ ءۇشىن ونى تەكسەرگەن قىزمەتكەردىڭ فاميلياسىن، تولىق اقپاراتتى كورسەتۋ كەرەك، وسىلايشا ءبىز بەينەجازبانى الىپ، شىن مانىندە نە بولعانىن بىلە الامىز. مۇمكىن جولاۋشىنى تۇسىرمەگەن شىعار، ءوزى شىعىپ كەتكەن بولار»، - دەپ ءتۇسىندىردى City Transportation Systems باسپا ءسوز قىزمەتى اگەنتتىك ساۋالىنا.

كولىكتىك باقىلاۋ دەپارتامەنتىنىڭ قىزمەتكەرلەرى جولاۋشىلاردى تۇسىرمەيدى. ءبىراق جول اقىسىن تولەمەگەن ادامدى انىقتاسا، سايكەسىنشە ايىپپۇل سالا الادى.

كومپانيا ەلوردادا جولاۋشىلار مەن باگاجدى اۆتوموبيل كولىگىمەن تاسىمالداۋ ەرەجەلەرىنە سايكەس، جەلىدەگى بارلىق قىزمەتكەرلەرمەن فۋنكتسيونالدىق مىندەتتەرىن تيىسىنشە ورىنداۋ تۋرالى پروفيلاكتيكالىق اڭگىمەلەر جۇرگىزىلەتىنىن ايتتى.


سوڭعى جاڭالىقتار