جاڭا جىلدىڭ باسىندا ۇكىمەتتە ءبىرقاتار كادرلىق وزگەرىستەر بولادى - پرەزيدەنت

None
استانا. قازاقپارات – ق ر پرەزيدەنتى قاسىم-جومارت توقايەۆ پارلامەنت سەناتىنىڭ وتىرىسىندا ۇكىمەتتىڭ جۇمىسىن سىنعا الدى، دەپ حابارلايدى قازاقپارات.

«بارشاڭىزعا ءمالىم، ءوتىپ بارا جاتقان جىل وڭاي بولعان جوق، وتە كۇردەلى بولدى دەسەك ارتىق ەمەس. ەلىمىزدە بولعان قاسىرەتتى وقيعالار جونىندە وزدەرىڭىز بىلەسىزدەر. ءبىز ءبارىمىز ءبىر ەل، ءبىر ۇلت، ءبىر حالىق بولىپ، وتانىمىزدى بىرلەسىپ ساقتاپ قالدىق دەپ ەش كۇمانسىز ايتۋعا بولادى. الدىمىزدا تۇرعان نەگىزگى ماقسات - ەلىمىزدەگى تۇراقتىلىقتى، قاۋىپسىزدىكتى ساقتاپ قالۋ، قازاقستاننىڭ جارقىن بولاشاققا قاراي قارقىندى دامۋىنا جول اشىپ بەرۋ. ارينە، بۇل جولدىڭ وڭاي بولمايتىنى انىق. ءبىراق، دانا حالقىمىز بارلىق قيىندىقتى، توسقاۋىلدار مەن كەدەرگىلەردى جەڭىپ شىعاتىنىنا مەن كامىل سەنەمىن. ادامزات كوروناۆيرۋس ىندەتىنىڭ سالدارىن ءالى دە تولىق ەڭسەرە الماي وتىر. وعان قوسا، گەوساياسي احۋال ۋشىعا ءتۇستى. سونىڭ كەسىرىنەن حالىقارالىق داعدارىس كۇشەيدى. مۇنىڭ ءبارى الەم ەكونوميكاسىن تىعىرىققا تىرەدى. ءبىز وسى كۇردەلى جاعدايدا ەكونوميكانىڭ قۇلدىراۋىنا جول بەرگەن جوقپىز. وتكەن 11 ايدىڭ قورىتىندىسى بويىنشا ەكونوميكامىز 3 پايىزعا ءوستى. نەگىزگى كاپيتالعا سالىناتىن ينۆەستيسيا كولەمى 6,5 پايىزعا ارتتى. بۇل جامان كورسەتكىش ەمەس. ءبىراق، جايباراقات وتىرۋعا بولمايدى»، - دەدى مەملەكەت باسشىسى جيىندا.

سونداي-اق قاسىم-جومارت توقايەۆ ۇكىمەتتىڭ جۇمىسىن سىنعا الدى.

«مەن جاقىندا وتكەن ۇكىمەت وتىرىسىندا بۇل ماسەلە بويىنشا ناقتى ايتتىم. ەلىمىز ءۇشىن وتە ماڭىزدى ءبىرقاتار ماسەلە بويىنشا ۇكىمەت لايىقتى بەلسەندىلىك كورسەتىپ وتىرعان جوق، شەشىمدەرىن باياۋ قابىلداپ جاتىر. ۇكىمەت وسى ولقىلىقتاردى تۇزەتۋ ءۇشىن ارەكەتتەرىن قولدانۋدا، تاياۋ ارادا ونىڭ جۇمىسىنىڭ تيىمدىلىگى ارتادى دەپ ويلايمىن. پرەمەر-ءمينيستردىڭ ۇسىنىسى بويىنشا جاڭا جىلدىڭ باسىندا ۇكىمەتتە ءبىرقاتار كادرلىق وزگەرىستەر جاساماقشىمىن. جالپى، ۇكىمەتتىڭ الدىندا تۇرعان ماقساتتار - وتە اۋقىمدى جانە وزەكتى»، - دەدى پرەزيدەنت.

ەسكە سالساق، 12-جەلتوقساندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ۇكىمەتتىڭ مىندەتتەرىن ايتقان ەدى.

«ۇكىمەتتىڭ نەگىزگى مىندەتى - ەلىمىزدەگى ەكونوميكالىق ماسەلەلەردى شەشۋمەن اينالىسۋ. بۇل - ۇكىمەت مۇشەلەرىنىڭ، اكىمدەردىڭ، ۇلتتىق كومپانيا باسشىلارىنىڭ تىكەلەي جاۋاپكەرشىلىگى. سوندىقتان مەن پرەمەر-مينيستر ءاليحان اسحان ۇلى سمايىلوۆتان شىنايى جاۋاپ العىم كەلەدى. جالپى، جاڭا جىلعا ۇكىمەتتىڭ وسى قۇرامىمەن اياق باسۋعا بولا ما؟ پرەزيدەنتتىڭ سايلاۋالدى باعدارلاماسىن جۇزەگە اسىرۋ ۇكىمەتتىڭ قولىنان كەلە مە؟ ۇكىمەت ىشتەن جانە سىرتتان بولاتىن بارلىق ەكونوميكالىق قاۋىپ-قاتەرلەرگە قارسى تۇرا الا ما؟ مەنىڭشە، بۇل ماسەلەلەر مەملەكەت باسشىسىنىڭ پرەمەر- مينيسترمەن جانە پارلامەنت دەپۋتاتتارىمەن وتكىزەتىن كونسۋلتاتسيالارى كەزىندە مۇقيات تالقىلانۋى كەرەك»، - دەدى پرەزيدەنت.

سوڭعى جاڭالىقتار