قورعانىس مينيسترلىگى نەگە تۇرىك تەحنيكاسىنا باسىمدىق بەردى

استانا. قازاقپارات – ق ر قورعانىس ءمينيسترىنىڭ ورىنباسارى سۇلتان قامالەتدينوۆ اسكەري تەحنيكا وندىرەتىن وتاندىق كومپانيانىڭ داۋلى مالىمدەمەسىنە جاۋاپ بەردى جانە نەلىكتەن تۇركيالىق تەحنيكانى ساتىپ العانىن ءتۇسىندىردى، دەپ حابارلايدى قازاقپارات ءتىلشىسى.

«قوعامدا تۇرىك ءوندىرىسىنىڭ بروندى ماشينالارىن ساتىپ الۋ تالقىلانىپ جاتىر، ول قازاقستاندا وندىرىلەتىن تەحنيكانىڭ تىكەلەي انالوگى كورىنەدى. نەلىكتەن قورعانىس مينيسترلىگى شەتەلدىك جەتكىزۋشىگە باسىمدىق بەرىپ وتىر؟»، - دەپ سۇراق قويدى تىلشىلەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ق ر قورعانىس ءمينيسترىنىڭ ورىنباسارى سۇلتان قامالەتدينوۆ قورعانىس مينيسترلىگى تاپسىرىس بەرۋشى ەكەنىن، ياعني قارۋلى كۇشتەردىڭ بەلگىلى ءبىر قۇرىلىمدىق بولىمشەلەرى ءۇشىن تالاپ ەتىلەتىن تەحنيكالىق شارتتاردى جاريالايتىنىن ايتتى.

«Kazakhstan Paramount Engineering كومپانياسى جونىندە وتىنىشتەر بولدى. ءبىزدىڭ بىلۋىمىزشە، قىزمەتتىك تەكسەرۋ ءجۇرىپ قانا قويماي، ولار ءبىزدى سوتقا بەردى جانە سوتتا قورعانىس مينيسترلىگى جەڭىسكە جەتتى. نەلىكتەن تۇرىك كومپانياسى تاڭدالدى؟ ءبىز كەز كەلگەن اسكەري تەحنيكانىڭ ارنايى تاپسىرمالاردى ورىنداۋعا ارنالعانىن انىق ءبىلۋىمىز كەرەك. ارنايى وپەراتسيالار كۇشتەرىنىڭ بولىمشەلەرى ءۇشىن مۇنداعى «ارلان» ب د م بروندالعان ماشيناسى جارامسىز، ءبىراق ءبىز ولاردان باس تارتپايمىز، تالاپتارعا سايكەس كەلەتىن جەكەلەگەن بولىمشەلەر ءۇشىن ساتىپ الامىز. تۇرىك كومپانياسى شىعارعان بروندى دوڭعالاقتى ماشينالار تۋرالى ءتيىستى نۇسقاۋلىقتار بار. ولار بىرنەشە ەلدە قىزمەتكە قابىلداندى جانە قارۋلى قاقتىعىستار كەزىندە وزدەرىن كورسەتتى»، - دەدى سۇلتان قامالەتدينوۆ.

ءوز كەزەگىندە اسكەري- تەحنيكالىق ساياسات دەپارتامەنتىنىڭ وكىلى پولكوۆنيك بەگەلتايەۆ مينيسترلىكتىڭ 2015 -جىلدان باستاپ Kazakhstan Paramount Engineering كومپانياسىنان تەحنيكا ساتىپ الاتىنىن ايتتى.

«بۇگىنگى تاڭدا قارۋلى كۇشتەردە «ارلان» ب د م-نىڭ 138 بىرلىگى بار. جىل سوڭىنا دەيىن 10 تەحنيكا جەتكىزۋدى جوسپارلاپ وتىرمىز. تاڭداۋ تۋرالى شەشىمدى تالاپتارعا سايكەس القا قابىلدايدى. جۇمىس ناتيجەلەرى بويىنشا مينيسترلىك تەحنيكانىڭ بەلگىلى ءبىر تۇرلەرىنە جانە مەملەكەتتىك قورعانىس تاپسىرىسىنا قاراي ءوتىنىم جاسايدى. بۇل رەتتە، قورعانىس مينيسترلىگى ورىنداۋشىنى تاڭداۋمەن جانە شارتتار جاساسۋمەن اينالىسپايدى. بۇل يندۋستريا جانە ينفراقۇرىلىمدىق دامۋ مينيسترلىگىنىڭ ۋاكىلەتتى ورگانىنىڭ قۇزىرەتىنە كىرەدى. وسى جاعدايدى ءتۇسىندىرۋ بويىنشا زاۋىتتىڭ ءوتىنىشى پرەمەر- ءمينيستردىڭ كەڭسەسى ارقىلى كەلىپ ءتۇستى. بەلگىلەنگەن تارتىپپەن مينيسترلىك تولىق جاۋاپ بەرەدى»، - دەدى سپيكەر.