قازاقستاندا جول سالاسى ماماندارىنىڭ سيفرلى بانكى قۇرىلادى
باسپا ءسوز قىزمەتىنىڭ مالىمەتتەرىنە قاراعانا، ەلىمىزدىڭ جول سالاسى كوپتەگەن جىلدار بويى بىلىكتى مامانداردىڭ تاپشىلىعى قالىپتاسقان سالالاردىڭ ءبىرى. ناتيجەسىندە، جۇزەگە اسىرىلىپ جاتقان جول قۇرىلىسى جۇمىستارىمەن كوبىنەسە بەيىندى ءبىلىمى نەمەسە جوعارى ءبىلىمى تۋرالى ديپلومى جوق ادامدار اينالىسىپ جاتادى.
مامانداردىڭ ايتۋىنشا، اتالعان ماسەلەنىڭ تۋىنداۋىنا نەگىزگى بەس سەبەپ بار. اتاپ ايتقاندا، جول سالاسىنداعى عىلىمدى قارجىلاندىرۋدىڭ جەتىسپەۋشىلىگى، جوعارى وقۋ ورىندارىنىڭ تۇلەكتەرىن جەتكىلىكسىز كولەمدە دايارلاۋ، جۇمىس ىستەپ جۇرگەن مامانداردىڭ ءوز بىلىكتىلىگىن ارتتىرۋعا قىزىعۋشىلىق تانىتپاۋى، قولدانىستاعى كاسىپقويلار پۋلىنىڭ سانى مەن ساپاسى تۋرالى ناقتى تۇسىنىكتىڭ بولماۋى، سونداي-اق قاجەت قىزمەتكەرلەردى تابۋ بارىسىندا تۋىندايتىن باسقا دا قيىندىقتار.
وسى ماسەلەلەردى شەشۋ ءۇشىن كەزىندە «ساۋلەت جانە قۇرىلىس» باعىتىنا ەنگىزىلگەن «اۆتوجولدار مەن اۋەايلاقتار قۇرىلىسى» ماماندىعى بويىنشا ستۋدەنتتەردى دايارلاۋدىڭ جەكەلەگەن باعىتىن قايتا اشۋ ۇسىنىلىپ وتىر.
سونىمەن قاتار جوبالاردىڭ عىلىمي ساراپتاماسىن جۇزەگە اسىرۋ مەن جول سالاسى عىلىمىن دامىتۋعا جول سالۋ قۇنىنىڭ 0,5 پايىزىن ءبولۋ تۋرالى ەرەجەنى زاڭنامالىق تۇرعىدان بەكىتۋ دە ۇسىنىلعان.
ماسەلەنىڭ بالاما شەشىمى رەتىندە قازاقستان جول عىلىمي-زەرتتەۋ ينستيتۋتى جول سالاسى قىزمەتكەرلەرىن دايارلاۋ، قايتا دايارلاۋ جانە ولاردىڭ بىلىكتىلىگىن ارتتىرۋمەن اينالىساتىن وقۋ ورتالىعىنىڭ جۇمىسىن جانداندىردى. وندا تەك ستۋدەنتتەر عانا ەمەس، سونىمەن قاتار تاجىريبەلى ماماندار دا ءبىلىم الادى. سونداي-اق ەلىمىزدىڭ جوعارى وقۋ ورىندارىمەن ءبىرقاتار مەموراندۋمعا قول قويىلدى. وسىلايشا، جاقىن ارادا قازاقستاندىق ستۋدەنتتەر ناقتى زەرتحانالاردا جانە جولداردىڭ تاجىريبەلىك ۋچاسكەلەرىندە تاجىريبەدەن وتە الادى. بۇگىنگى تاڭدا جول عىلىمي-زەرتتەۋ ينستيتۋتى زاڭ جوباسىن ازىرلەۋ بويىنشا جۇمىس ىستەپ جاتىر، وعان سايكەس اۆتوجول ماماندارى ءوز بىلىكتىلىكتەرىن ارتتىرۋعا مىندەتتى بولادى.
بيىل قازجولعزي جول سالاسى ماماندارىنىڭ ءبىرىڭعاي بىلىكتىلىك بازاسىن، اتاپ ايتقاندا سالالىق ەڭبەك بيرجاسىنىڭ ءبىر ءتۇرىن ازىرلەۋمەن اينالىستى.
اقپاراتتىق جۇيەگە كاسىبي جولشىلاردى دايارلاۋمەن اينالىساتىن جوعارى وقۋ ورىندارىنىڭ ستۋدەنتتەرى مەن تۇلەكتەرى، سونداي-اق بۇگىندە جۇمىس ىستەپ جۇرگەن ينجەنەرلەر، شەبەرلەر، جوبالاۋشىلار جانە جول قۇرىلىسىنىڭ باسقا دا ماماندارى ەنگىزىلەتىن بولادى.
بۇل شەشىم ءوز كەزەگىندە سالالىق ەڭبەك نارىعىن تالداۋعا جانە بولجاۋعا مۇمكىندىك بەرەدى. ال مەردىگەر ۇيىمدار ونلاين رەجيمدە جولداردى جوبالاۋ، ولاردىڭ قۇرىلىسى جانە قايتا قۇرۋ ءۇشىن ديپلومى بار ءارى بىلىكتى مامانداردى تابا الادى.
مۇنداي تسيفرلى انىقتامالىقتى جاساۋ جول ماماندارى ءۇشىن وزدەرىنىڭ كاسىبي داعدىلارىن جۇمىستى قاتار الىپ ءجۇرىپ دامىتۋعا كومەكتەسەدى.
«بازادا مامانداردىڭ ەڭبەك ءوتىلى مەن ساناتى تۋرالى مالىمەتتەر جيناقتالعان. ولاردىڭ بىلىكتىلىكتەرى تۋرالى اقپارات تا قولجەتىمدى بولادى. بۇل ءوز كەزەگىندە كادر تاپشىلىعى ماسەلەسىن شەشۋگە جاردەمدەسىپ، سايكەسىنشە جول قۇرىلىسىنىڭ ساپاسىنا وڭ اسەر ەتەدى»، دەيدى «قازجولعزي» ا ق وقۋ ورتالىعىنىڭ ديرەكتورى گۇلجامال وماروۆا.
قازىرگى ۋاقىتتا ينستيتۋت اتالعان جۇيەنىڭ جوباسىن جاساپ، ءوزىنىڭ اۆتورلىق قۇقىعىن الدى. سيفرلى بازا 2023-جىلدان باستاپ تولىقتىرىلا باستايدى دەپ جوسپارلانىپ وتىر.