ءاليحان سمايىلوۆ ۇلتتىق ەكونوميكا مينيسترلىگىنىڭ القا ءماجىلىسىن وتكىزدى
وندا وسى جىلدىڭ قورىتىندىلارى قارالىپ، 2023-جىلعا ارنالعان جوسپارلار بەلگىلەندى، دەپ حابارلايدى ق ر ۇكىمەتىنىڭ باسپا ءسوز قىزمەتى.
ۆەدومستۆو باسشىسى الىبەك قۋانتىروۆ قاڭتار-قاراشا ايلارىندا ەكونوميكا ءوسىمى 2,7 پايىزدى قۇراعانىن اتاپ ءوتتى. سىرتقى ساۋدا اينالىمى 34 پايىزعا ءوسىپ، $111 ميللياردقا جەتتى.
بيىل جاڭا ينۆەستيتسيالىق تسيكلدى قالىپتاستىرۋعا، سونداي-اق جاڭا ترەندتەردى، ونىڭ ىشىندە ESG ستاندارتتارىن ەسكەرە وتىرىپ، ينۆەستيتسيالاردى تارتۋ ساياساتىن قايتا قاراۋعا باعىتتالعان 2026-جىلعا دەيىنگى ينۆەستيتسيالىق ساياسات تۇجىرىمداماسى قابىلداندى.
ءمينيستردىڭ ايتۋىنشا، وڭىرلەردى دامىتۋ باعىتىندا اۋقىمدى جۇمىس اتقارىلدى. اتاپ ايتقاندا، ەلدىڭ 2025-جىلعا دەيىنگى اۋماقتىق دامۋ جوسپارى بەكىتىلدى.
تاريفتىك ساياساتتى رەفورمالاۋ ءۇشىن «ءتاريفتى ينۆەستيتسياعا ايىرباستاۋ» جاڭا تۇجىرىمداماسى ۇسىنىلىپ وتىر. 2029-جىلعا قاراي رەسپۋبليكادا ينجەنەرلىك جەلىلەردىڭ توزۋىن 20 پايىزدىق پۋنكتكە دەيىن تومەندەتۋ كورسەتكىشىنە قول جەتكىزۋ كوزدەلگەن. ول ءۇشىن شامامەن 3,8 تريلليون تەڭگە ينۆەستيتسيا تارتا وتىرىپ، 134 مىڭ ك م استام جەلىگە جوندەۋ جۇرگىزۋ قاجەت بولادى. ماسەلەن، كەلەسى جىلى 13,2 مىڭ ك م جىلۋ جانە ەلەكترمەن جابدىقتاۋ جەلىلەرىن جوندەۋ ءۇشىن شامامەن 300 ميلليارد تەڭگە تارتۋ جانە تابيعي مونوپوليالار سالاسىنداعى قىزمەتكەرلەردىڭ جالاقىسىن 50 پايىزعا دەيىن ارتتىرۋ كوزدەلىپ وتىر.
سونىمەن قاتار القا ماجىلىسىندە كاسىپكەرلىكتى، قارجى سەكتورىن، وڭىرلەردى، مەملەكەتتىك باسقارۋدى جانە ت. ب. ودان ءارى دامىتۋ بويىنشا جوسپارلانعان شارالار قارالدى.
پرەمەر-مينيستر ۇلتتىق ەكونوميكا مينيسترلىگىنىڭ نەگىزگى ماقساتى - حالىقتىڭ تۇرمىس دەڭگەيى مەن ءال-اۋقاتىنىڭ ارتۋىن ناقتى قامتاماسىز ەتەتىن ءبىرتۇتاس جانە ءتيىمدى ەكونوميكالىق ساياسات قالىپتاستىرۋ ەكەنىن اتاپ ءوتتى.
ونىڭ ايتۋىنشا، اعىمداعى سىرتقى ەكونوميكالىق كونيۋنكتۋرا بەلگىسىزدىكتىڭ جوعارى دەڭگەيىمەن سيپاتتالادى. الەمدىك ەكونوميكادا ەنەرگيا رەسۋرستارى مەن ازىق-تۇلىك تاۋارلارى باعالارىنىڭ ءوسۋى بارلىق جەردە بايقالىپ وتىر.
«ۇكىمەت تۋىنداپ جاتقان تاۋەكەلدەردى جويۋ ءۇشىن بار كۇشىن سالادى. ءبىراق، وكىنىشكە وراي، الەمدىك ەكونوميكاداعى جاعداي ءالى دە تۇراقسىز كۇيدە قالىپ وتىر. سىرتقى فاكتورلار قازاقستان ەكونوميكاسىنىڭ ءوسۋ قارقىنىنا جانە تيىسىنشە ەكونوميكالىق بەلسەندىلىككە ءوز اسەرىن تيگىزۋدە. وسىعان بايلانىستى 2023-جىلى ۇلتتىق ەكونوميكا مينيسترلىگىنىڭ الدىندا ءبىرقاتار ماڭىزدى مىندەتتەر تۇر»، - دەدى ءاليحان سمايىلوۆ.
ول ءبىرىنشى كەزەكتە مەملەكەت باسشىسىنىڭ 1- قىركۇيەكتە قازاقستان حالقىنا جولداۋىندا، 12- جەلتوقساندا ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىنا، سونداي-اق پرەزيدەنتتىڭ سايلاۋالدى باعدارلاماسىنا باسا نازار اۋدارۋ قاجەت ەكەنىن اتاپ ءوتتى.
2023-جىلى كەمىندە 4- پايىز ەكونوميكالىق وسىمگە قول جەتكىزۋ ءۇشىن ىشكى نارىقتى وتاندىق تاۋارلارمەن تولتىرۋعا، اعىمداعى سىن-قاتەرلەردى ەسكەرە وتىرىپ، ينفلياتسيا دەڭگەيىن باقىلاۋ مەن تومەندەتۋ جونىندەگى شارالار كەشەنىن جانداندىرۋعا، ەلدىڭ ينۆەستيتسيالىق تارتىمدىلىعىن ارتتىرۋعا، كاسىپكەرلىكتى دامىتۋعا، مەملەكەتتىڭ ەكونوميكاداعى ۇلەسىن قىسقارتۋعا جانە ت. ب. نازار اۋدارۋ قاجەت.
«پرەزيدەنت تاپسىرمالارىن ەسكەرە وتىرىپ، سالالىق تۇجىرىمدامالار مەن مەملەكەتتىك ورگانداردىڭ دامۋ جوسپارلارىن وزەكتەندىرۋ قاجەت. ءبىز مەملەكەتتىك ورگاندارعا سالالىق قۇزىرەتتەر شەڭبەرىندە دەربەس شەشىمدەر قابىلداۋ ءۇشىن بارلىق مۇمكىندىكتەردى بەرۋگە ءتيىسپىز. سونداي-اق جەرگىلىكتى دەڭگەيدەگى ماسەلەلەردى شەشۋ ءۇشىن وڭىرلەردىڭ وكىلەتتىكتەرىن كەڭەيتۋىمىز كەرەك. بۇل جۇمىس ۇلتتىق ەكونوميكا مينيسترلىگىنىڭ ۇيلەستىرۋىمەن جۇرگىزىلۋى ءتيىس»، — دەدى ءاليحان سمايىلوۆ.