قازاقستاننىڭ «جاسىل» ينۆەستيتسيالارداعى ءرولى ارتىپ كەلەدى

استانا. قازاقپارات - قازاقستاننىڭ «جاسىل» ينۆەستيتسيالارداعى ءرولى ارتىپ كەلەدى.

بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«ESG (ەكولوگيا، الەۋمەتتىك ساياسات جانە كورپوراتيۆتىك باسقارۋ) كۇن ءتارتىبىن ەسكەرە وتىرىپ، الەمدىك كەڭىستىكتە «جاسىل» ينۆەستيتسيالاردىڭ ءرولى ارتىپ كەلەدى. ءبىر قىزىعى، بۇل باعىتتا قازاقستاننىڭ دا ءرولى ارتۋدا. ءبىرقاتار جوبانى ىسكە اسىرۋ ەلىمىزگە «جاسىل» سۋتەگىنىڭ الەمدىك توپ-10 وندىرۋشىلەرىنىڭ قاتارىنا كىرۋگە مۇمكىندىك بەرەدى. اتاپ ايتقاندا، وسى جىلدىڭ قازان ايىندا Svevind نەمىس- شۆەد كومپانياسى قازاقستان ۇكىمەتىمەن جوبالىق قۋاتى 20 گۆت «جاسىل» سۋتەك ءوندىرۋ زاۋىتىن سالۋ تۋرالى كەلىسىمگە قول قويدى. قۇنى 50 ميلليارد دوللار تۇراتىن بۇل جوبا جىلىنا 2 ميلليون تونناعا دەيىن «جاسىل» سۋتەگى وندىرۋگە مۇمكىندىك بەرەدى»، - دەدى ول مينيسترلىكتىڭ وسى جىلعى جۇمىسىن قورىتىندىلاۋعا ارنالعان باسپا ءسوز ءماسليحاتىندا.

ونىڭ اتاپ وتۋىنشە، مىسىردا وتكەن COP27 جاھاندىق كونفەرەنسياسىندا قازاقستان ۇكىمەتى مەن Fortessue اۋستراليالىق كومپانياسى اراسىندا ەلىمىزدە «جاسىل» سۋتەگى ءوندىرۋ جوبالارىن ىسكە اسىرۋ تۋرالى كەلىسىمگە قول جەتكىزىلدى.

مەملەكەت باسشىسىنىڭ پاريجگە ساپارى اياسىندا ق ر ەنەرگەتيكا ءمينيسترى بولات اقشولاقوۆ فرانسيا ۇكىمەتىمەن «جاھاندىق جىلىنۋعا قارسى كۇرەس سالاسىنداعى ىنتىماقتاستىقتى ىسكە اسىرۋ تۋرالى» ارنايى كەلىسىمگە قول قويدى.

«وسى قۇجاتتىڭ تارماقتارىنىڭ ءبىرى - جامبىل وبلىسىندا قۋاتى 300-600 مۆت س ا ع ەنەرگيا جيناقتاۋ جۇيەسى بار قۋاتى 1 گۆت جەل ەلەكتر ستانتسياسىن سالۋ. جوبانى Total Eren جانە «سامۇرىق-قازىنا» ا ق جۇزەگە اسىرادى»، - دەدى ايبەك سمادياروۆ.