ءتيىستى ورگاندار ماجىلىستە قاڭتار وقيعاسىنا قاتىستى ساۋالدارعا جاۋاپ بەرۋى قاجەت - ەدىل جاڭبىرشين

استانا. قازاقپارات - بۇگىن ءماجىلىستىڭ جالپى وتىرىسىندا «جاڭا قازاقستان» دەپۋتاتتىق توبىنىڭ مۇشەلەرى قاڭتار وقيعاسىنىڭ ءبىرىزدى ءمان-جايىن اشىق ايتىپ، ونىڭ ءادىل باعاسىن بەرۋ كەرەك ەكەنىن ەسكەرتتى، دەپ حابارلايدى قازاقپارات ءتىلشىسى.

«بۇكىل ەلدى ءدۇر سىلكىندىرگەن «قاسىرەتتى قاڭتار» وقيعاسىنا 1 جىل بولدى. سول كۇندەرى حالقىمىز بۇرىن-سوڭدى بولماعان قاۋىپ-قاتەرمەن بەتپە-بەت كەلدى. مەملەكەتىمىزدىڭ تۇتاستىعى مەن مىزعىماس ەگەمەندىگىنە زور قاۋىپ ءتوندى. قاڭتار كۇندەرى تاۋەلسىزدىكتىڭ قادىر-قاسيەتىن، تىنىشتىق پەن بەيبىتشىلىك قانشالىقتى ماڭىزدى ەكەنىن جان-جۇرەگىمىزبەن سەزىندىك. قاڭتاردىڭ باسى ماڭعىستاۋدا ءورىس العانى بەلگىلى. وقيعا سۇيىتىلعان گاز باعاسىن تومەندەتۋ كەرەك دەگەن ۇرانمەن باستالدى. باسىندا بەيبىت تۇردە باستالعان شەرۋدى ارانداتۋشى توپتار پايدالانىپ، ونىڭ سوڭى ءىرى قالالاردا تارتىپسىزدىك پەن قايعىلى وقيعالارعا ۇلاستى. توڭكەرىس جاساۋعا ۇمتىلعانداردىڭ باسىندا بەلگىلى ساياسي لاۋازىمداعى ادامداردىڭ بولعانى انىق. ولار ساتقىندىق جاساپ، مەملەكەت باسشىسىنا ەلدەگى احۋال تۋرالى جالعان اقپاراتتار بەردى. ىشتەن شىققان جاۋلار، مۇقيات ويلاستىرىلعان اۋقىمدى وپەراتسيادا، كاسىبي دايىندىقتان وتكەن باسكەسەر-سودىرلاردى ەش تارتىنباستان پايدالاندى. ءىرى شاھارىمىز اياۋلى الماتى مەن كەيبىر قالالارىمىزدا ۇرىستار بولدى. ەڭ سۇمدىعى - ىشكى جانە سىرتقى جاۋلارىمىز بىرىگە قىلمىستىق قيمىل جاساپ، بيلىككە قارسى قولدارىنان كەلگەنىن ىستەدى»، - دەدى دەپۋتات ەدىل جاڭبىرشين باس پروكۋرور بەرىك اسىلوۆتىڭ اتىنا جولداعان ساۋالدى جاريالاۋ كەزىندە.

وسى ورايدا ول بۇل قىلمىستار ەلدىك پەن مەملەكەتىمىزگە تونگەن اسا قاۋىپتى سىن-قاتەر بولعانىن ايتتى.

«جىل باسىندا حالىق تالابىن ەسكەرە كەلە، قاڭتار قاسىرەتىن اشىق تالقىلاۋ ءۇشىن «جاڭا قازاقستان» دەپۋتاتتىق توبى باس پروكۋرورعا دەپۋتاتتىق ساۋال جولداعان بولاتىن. ول ساۋالعا پارلامەنتتە ارنايى جاۋاپ بەرىلدى. شىندىعىن ايتقاندا، ءماجىلىس تورىندە مەملەكەتتىك توڭكەرىسكە يتەرمەلەگەن وقيعانى مۇنداي كەڭ اۋقىمدى تالقىلاۋ ەشقاشان بولماعان. قۇقىق قورعاۋ ورگاندارى تەرگەۋ قورىتىندىلارى تۋرالى ەسەپ بەرىپ، ءبارى اشىق ايتىلدى. سول كەزدە ءبىرىنشى رەت قايتىس بولعان 238 ادامنىڭ ءتىزىمى مەن 3 مىڭنان استام قارۋدىڭ ۇرلانعانى حاباردار ەتىلدى. قوعامدى مازالاعان سۇراقتاردى بۇكپەسىز قويدىق. بىرىنە جاۋاپ الساق، ەندى كەيبىرىنە تەرگەۋ امالدارىنان سوڭ ناقتى جاۋاپ ايتىلادى دەلىندى. ءيا، بۇگىندە حالىقتىڭ كوكەيىندە ءالى دە جاۋابى جوق سۇراقتار جەتكىلىكتى. سونىمەن، «مۇنى ۇيىمداستىرعان كىمدەر، ويتكەنى بارلىق وڭىرلەردە ءبىر مەزگىلدە تولقۋلار باستالدى جانە قاسكويلەردىڭ نەگىزگى ماقساتى نە بولدى؟»، «قاڭتار وقيعاسى قانداي زاقىمدار مەن شىعىندار كەلتىردى؟»، «لاۋازىمدىق مىندەتتەرىن اتقارۋ كەزىندە قايتىس بولعان جانە زارداپ شەككەن قىزمەتكەرلەردى الەۋمەتتىك جاعىنان قورعاۋ، كەزدەيسوق قازا بولعان ازاماتتارىمىزدىڭ جاقىندارىنا كومەك كورسەتۋ بويىنشا قانداي جۇمىستار جۇرگىزىلدى؟» دەگەن ساۋالدار ەل ىشىندە ايتىلىپ ءجۇر»، - دەدى دەپۋتات.

«بۇگىنگى كۇنى بولعان وقيعا بويىنشا تولىق تۇسىنىك قاجەت. ەلدى ىدىراتۋ ءۇشىن جاسالعان وپاسىزداردىڭ جۇيەلى قيمىلى، قىراعى دايىندىعى تۋرالى تەك قانا بولجامدار بار. اشىعىن ايتساق، قازىر قوعامدا ءتۇرلى قاۋەسەت تاراۋدا. بۇل احۋال جالعان تۇسىنىك قالىپتاستىرىپ، فەيك اقپاراتتاردىڭ تاراۋىنا زور ىقپالىن تيگىزىپ وتىر. سوندىقتان قۇقىق قورعاۋ ورگاندارىنىڭ تەرگەۋ امالدارىنىڭ قورىتىندىسىنا سۇيەنگەن، وقيعانىڭ ءبىرىزدى ءمان-جايى اشىق ايتىلىپ، ونىڭ ءادىل باعاسى بەرىلۋى كەرەك دەپ سانايمىز. كوتەرىلگەن ماسەلەنىڭ ماڭىزدىلىعىن ەسكەرە كەلە، ءتيىستى كۇشتىك قۇرىلىمدار مەن مەملەكەتتىك ورگاندار، جىلدىڭ باسىندا ءماجىلىستىڭ العاشقى جالپى وتىرىسىنا كەلىپ، جوعارىدا ايتىلعان جانە باسقا دا ساۋالدارعا بۇكپەسىز اشىق جاۋاپ بەرۋى قاجەت. بۇل - حالىقتىڭ تالابى»، - دەدى ە. جاڭبىرشين.