قازاقستان ر ف ەلشىسى بوروداۆكيننىڭ داۋلى سۇحباتىنا قاتىستى تۇسىنىكتەمە الدى
بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
بۇگىن سىرتقى ىستەر مينيسترلىگى ءوتىپ بارا جاتقان جىلدى قورىتىندىلاپ، ب ا ق وكىلدەرىنە باسپا ءسوز ءماسليحاتىن وتكىزگەن بولاتىن. ءىس-شارا بارىسىندا تىلشىلەر ايبەك سمادياروۆتان: «رەسەيدىڭ قازاقستانداعى ەلشىسى الەكسەي بوروداۆكين «ەلىمىزدە ۇلتشىلدىقتىڭ كورىنىستەرى بار. كەرەك بولسا، رەسەي كومەكتەسە الادى» دەپ ايتتى. سىرتقى ىستەر مينيسترلىگىنىڭ ەلشىسىنىڭ وسى پىكىرىنە قاتىستى ۇستانىمى قانداي؟»، دەپ سۇراعان ەدى.
«بۇل ماسەلەگە قاتىستى رەسەي ەلشىسى الەكسەي بوروداۆكينمەن كەزدەسۋ وتكىزىلدى. سونداي-اق ءماجىلىس ءتوراعاسى ەرلان قوشانوۆ رەسەي ەلشىسىنىڭ سوزىنە تۇسىنىك بەردى. سىزدەر ونى بىلەسىزدەر. رەسەيدىڭ سىرتقى ىستەر ءمينيسترى سەرگەي لاۆروۆ قازاقستاندىق تەلەارنالارعا وسى ماسەلە بويىنشا تۇسىنىك بەرگەن. بۇگىندە ماسەلە جابىق دەپ سانايمىز، تۇسىنىكتەمەلەر قابىلداندى»، - دەپ جاۋاپ بەردى ول.
سونىمەن قاتار مينيسترلىكتىڭ رەسمي وكىلى قازاقستان مەن رەسەي اراسىنداعى قارىم-قاتىناستى پرەزيدەنتتەر انىقتايتىندىعىن باسا ايتتى.
«مەملەكەت باسشىسى قاسىم-جومارت توقايەۆتىڭ رەسەيگە سوڭعى ساپارى كەزىندە قوس ەلدىڭ پرەزيدەنتتەرى ماسكەۋدە وتكەن كەلىسسوزدەردىڭ قورىتىندىسىندا ديپلوماتيالىق قارىم-قاتىناستىڭ ورناعانىنا 30 جىل تولۋىنا وراي دەكلاراتسياعا قول قويدى. پرەزيدەنتىمىز اتاپ وتكەندەي، وسى ۋاقىت ىشىندە ەكى مەملەكەت دوستىق پەن تاتۋ كورشىلىكتىڭ بەرىك بايلانىسىنا نەگىزدەلگەن ءوزارا ءتيىمدى ارىپتەستىك قۇرا الدى. قازاقستان مەن رەسەي اراسىندا سەنىمدى، سىندارلى ديالوگ ورنادى. ىنتىماقتاستىقتىڭ جوعارى دەڭگەيىنە قول جەتكىزىلدى»، - دەدى ايبەك سمادياروۆ.
بۇعان دەيىن رەسەيدىڭ قازاقستانداعى ەلشىسى الەكسەي بوروداۆكيننىڭ بەرگەن سۇحباتىنا قاتىستى پىكىر بىلدىرگەن ءماجىلىس ءتوراعاسى ەرلان قوشانوۆ «ەلشىنىڭ سۇحباتىنىڭ كەي تۇستارى ونىڭ مارتەبەسىنە ساي كەلمەيدى ءارى پايدا اكەلمەيدى دەپ ويلايمىن. بوروداۆكين مىرزا وتە تاجىريبەلى ديپلومات، ول ۇگىت-ناسيحاتشىلار مەن ساياساتتانۋشىلاردىڭ جەتەگىندە كەتپەۋى كەرەك»، - دەگەن بولاتىن.