دەپۋتات جەتىم بالالاردى باسپانامەن قامتۋدىڭ كەشەندى جوسپارىن ازىرلەۋدى سۇرادى

استانا. قازاقپارات - بۇگىن ءماجىلىستىڭ جالپى وتىرىسىندا دەپۋتات گاۋھار نۇعمانوۆا جەتىم بالالاردى تۇرعىن ۇيمەن قامتاماسىز ەتۋدىڭ كەشەندى جوسپارىن ازىرلەۋدى سۇرادى، دەپ حابارلايدى قازاقپارات ءتىلشىسى.

ونىڭ ايتۋىنشا، قازىرگى كەزدە كوپتەگەن بالالار ۇيلەرىنىڭ تۇلەكتەرى باسپاناسىز ءجۇر. 18 جاستان اسقان وسى ساناتتاعىلاردى جۇمىسقا ورنالاستىرۋ، ولاردى باسپانامەن قامتۋ ماسەلەسى قاراۋسىز قالىپ وتىر.

«قاراۋسىز قالۋ سالدارىنان ولاردىڭ زاڭ بۇزۋى نەمەسە بىرەۋدىڭ تەرىس اسەرىنە ۇشىراۋىنىڭ قاۋپى ارتادى. بۇگىندە دەپۋتاتتار مەن جەرگىلىكتى اتقارۋشى ورگاندارعا جەتىم بالالاردان كوپتەگەن حاتتار مەن وتىنىشتەر كەلىپ ءتۇسىپ جاتىر. بالالاردى قورعاۋ ءۇشىن قاجەتتى زاڭدار قابىلدانعانىمەن، ءىس جۇزىندە بالالار ءۇيىنىڭ تۇلەكتەرى باسپاناسىز قالىپ وتىر»، - دەدى دەپۋتات پرەمەر-ءمينيستردىڭ ورىنباسارى التاي كولگىنوۆتىڭ اتىنا جولداعان ساۋالىندا.

وسى ورايدا ول وبلىستار بويىنشا كەيىنگى 5 جىل ىشىندەگى بالالار ۇيلەرى تۇلەكتەرىنىڭ سانى جونىندە، جالپى ورتا، كاسىپتىك ورتا ءبىلىم جانە جوعارى ءبىلىم العاندار، سونداي-اق 2017-جىلدان بەرى باسپانالى بولعاندار تۋرالى اقپارات بەرۋدى سۇرادى.

«18 جاستان اسقان جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ ءبىرىڭعاي دەرەكتەر بازاسىن قۇرۋ، جەتىم بالالاردى تۇرعىن ۇيمەن قامتاماسىز ەتۋدىڭ كەشەندى جوسپارىن ازىرلەۋ ماسەلەسىن قاراستىرۋدى سۇرايمىز»، - دەدى دەپۋتات.

بۇدان بۇرىن حابارلانعانداي، 2022-جىلدىڭ 9 ايىندا جەتىم جانە اتا-اناسىنىڭ قامقورلىعىنسىز قالعان 534 بالا تۇرعىن ۇيمەن قامتاماسىز ەتىلدى.

سونىمەن قاتار، تەكسەرۋ كەزىندە جەتىم بالالاردى باسپانا كەزەگىنە قويۋ مەرزىمى ساقتالماعانى انىقتالدى.