استانانى ودان ءارى جايلى ەتۋ ءۇشىن جۇمىلا ەڭبەك ەتەمىز - جەڭىس قاسىمبەك
«قۇرمەتتى استانالىقتار!
سىزدەرمەن جۇمىس ىستەۋ - مەن ءۇشىن ۇلكەن مارتەبە ءارى ۇلكەن جاۋاپكەرشىلىك. ەلوردامىزدى ارى قاراي بىرلەسە دامىتاتىن بولامىز. استانا - قاشاندا وزىنە ەرىكسىز باۋراپ الاتىن، تارتىمدى قالا بولىپ كەلەدى. سول سياقتى استانانىڭ وزىنە ءتان سۇلۋلىعى مەن وزىندىك ەرەكشە ەنەرگياسى بار. قالامىزدى ودان ءارى جايلى دا قولايلى ەتۋ ءۇشىن جۇدىرىقتاي جۇمىلىپ ەڭبەك ەتەمىز»، - دەپ جازدى ەلوردا باسشىسى.
ونىڭ ايتۋىنشا، قازىرگى ۋاقىتتا دۇنيەجۇزىندەگى مەگاپوليستەردىڭ الدىندا جاڭا جاھاندىق سىن- قاتەرلەر مەن مىندەتتەر تۇر. استانا دا سولاردىڭ قاتارىندا. ەكونوميكالىق كورسەتكىشتەر، كاسىپكەرلىكتى دامىتۋ، ينفراقۇرىلىم، قولجەتىمدى الەۋمەتتىك قىزمەتتەر - ءوز جۇمىسىمىزدا قالا ءومىرى ءۇشىن ماڭىزى زور بارلىق سالانى قامتيمىز.
قالا تۇرعىندارىنىڭ جايلى ءومىر ءسۇرۋى ءۇشىن قولجەتىمدى الەۋمەتتىك تۇرعىن ۇيلەر، مەكتەپتەر، بالاباقشالار، مەديتسينالىق نىساندار جانە ت. ب. سالۋدى ءارى قاراي دا جالعاستىرامىز. قالا تۇرعىندارىنىڭ سانى، قۇرىلىس كولەمى جىل سايىن ءوسىپ كەلە جاتقانىن ەسكەرىپ، جىلۋ، سۋ جانە ەلەكترمەن جابدىقتاۋ نىساندارىنىڭ قۋاتىن ۇلعايتۋ بويىنشا جۇمىس ىستەيتىن بولامىز.
«الەۋمەتتىك جەلى - ءتيىمدى بايلانىس قۇرالى. ءبىز ءۇشىن سىزدەردىڭ پىكىرلەرىڭىز ماڭىزدى. ەلوردامىزدى ارى قاراي دامىتۋ بويىنشا سىزدەردەن ۇسىنىستار مەن يدەيالار كۇتەمىز»، - دەپ جازدى جەڭىس قاسىمبەك.
قازاقپارات وسىعان دەيىن ەلىمىزدىڭ باس قالاسىنا جاڭا اكىم تاعايىندالعانىن جازعان بولاتىن.
سونداي-اق جەڭىس قاسىمبەك قاراعاندى وبلىسىن باسقارعان جىلدار ءوزى ءۇشىن ءومىر مەكتەبى بولعانىن ايتتى.