جوعارى ەۋرازيالىق ەكونوميكالىق كەڭەس وتىرىسىنىڭ قورىتىندىسى بويىنشا قانداي قۇجاتتار قابىلداندى

بىشكەك. قازاقپارات - بىشكەكتەگى «الا-ارچا» مەملەكەتتىك رەزيدەنتسياسىندا جوعارى ەۋرازيالىق ەكونوميكالىق كەڭەستىڭ قورىتىندى وتىرىسى اياقتالدى، دەپ حابارلايدى قازاقپارات ءتىلشىسى.

سامميتكە بەلارۋس، قازاقستان، قىرعىزستان رەسپۋبليكالارى مەن رەسەي فەدەراتسياسىنىڭ پرەزيدەنتتەرى، سونداي-اق ارمەنيا مەن وزبەكستاننىڭ ۇكىمەت باسشىلارى قاتىستى.

قىرعىزستان پرەزيدەنتى سادىر جاپاروۆ كەزدەسۋ قورىتىندىسى بويىنشا ءبىرقاتار ماڭىزدى شەشىمدەرگە قول قويىلعانىن ايتتى. ونىڭ ايتۋىنشا، ونەركاسىپتىك كووپەراتسيانى قارجىلاندىرۋدىڭ نەگىزى قالانىپ، وداقتىڭ ءتيىستى اكتىلەرىن ازىرلەۋ تاپسىرىلدى. ەۋرازيالىق ەكونوميكالىق وداقتىڭ 2023-جىلعا ارنالعان حالىقارالىق قىزمەتىنىڭ نەگىزگى باعىتتارى بەكىتىلىپ، بىرىككەن اراب امىرلىكتەرىمەن ساۋدا كەلىسىمىن جاساۋ بويىنشا كەلىسسوزدەردى باستاۋ تۋرالى شەشىم قابىلداندى.

سادىر جاپاروۆ ەلەكتروندى قىزمەت كورسەتۋ سالاسىندا سالىقتىق اكىمشىلەندىرۋدى جەڭىلدەتۋ جانە بيزنەستى جەڭىلدەتۋ بويىنشا جۇمىستار اتقارىلعانىن اتاپ ءوتتى. سونىمەن قاتار، ەلەكتروندىق نىساندا قىزمەت كورسەتۋ كەزىندە جاناما سالىقتاردى الۋ ءتارتىبىن ايقىنداۋ بويىنشا ەۋرازيالىق ەكونوميكالىق وداق تۋرالى كەلىسىمگە وزگەرىستەر ەنگىزۋ تۋرالى حاتتاماعا قول قويىلدى.

«وداق اياسىندا وداقتىڭ ىشكى نارىعىنداعى كەدەرگىلەردى جويۋعا ەرەكشە كوڭىل بولىنەدى. بۇگىن ءبىز بۇل ماسەلەنى جان-جاقتى تالقىلاپ، وسى باعىتتاعى جۇمىستى جانداندىرۋعا كەلىستىك. كاسىپوداق قىزمەتىن رەتتەيتىن ءبىرقاتار قۇجاتتار بەكىتىلدى. قابىلدانعان شەشىمدەر ەۋرازيالىق ينتەگراتسيانى نىعايتۋعا ەلەۋلى ۇلەس قوساتىنىنا سەنىمدىمىن. وداق ورگاندارىنداعى ءتوراعالىق كەلەسى جىلى رەسەي فەدەراتسياسىنا وتەدى. مەن رەسەيلىك تاراپقا وسى جاۋاپتى ميسسيادا ۇلكەن تابىس تىلەيمىن»، - دەدى قىرعىزستان رەسپۋبليكاسىنىڭ باسشىسى.

«ە ا ە و قولدانىسىنداعى نورماتيۆتىك قۇقىقتىق اكتىلەرىنە 139 تۇزەتۋدەن تۇراتىن ۇلكەن ەكىنشى حاتتاما قابىلداندى. بيىل العاش رەت ماڭىزدى ءىس-شارالار وتكىزىلدى، ونىڭ ىشىندە ءبىرىنشى ەۋرازيالىق ەكونوميكالىق فورۋم، ت م د جانە ە ا ە و ەلدەرىنىڭ العاشقى جاستار فورۋمى بار. جالپى سوماسى 270 ميلليارد ا ق ش دوللارىن قۇرايتىن 158 جوبا، 25 سالا ىرىكتەلدى. ەندى ءبىزدىڭ بيزنەسكە ينتەگراتسيالىق جوبالاردىڭ تىزبەسىنە قوسىلۋعا جانە نەگىزگى اقشالاي مولشەرلەمە كولەمىندە نەسيەلەر بويىنشا پايىزدىق مولشەرلەمەنى سۋبسيديالاۋدا كورسەتىلەتىن ءتيىستى قولداۋ الۋعا مۇمكىندىك بەرىلدى. بۇل ەكونوميكانىڭ ناقتى سەكتورىنا ەلەۋلى قولداۋ، ءبىز ەۋرازيالىق ەكونوميكالىق وداققا قاجەتتى جاڭا جوبالار قاتارىن ارتتىرامىز»، - دەپ تۇيىندەدى ميحايل مياسنيكوۆيچ.

بۇعان دەيىن قىرعىزستان استاناسىندا جوعارى ەۋرازيالىق ەكونوميكالىق كەڭەستىڭ قورىتىندى وتىرىسى وتكەنى حابارلاعان بولاتىنبىز. شاراعا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ تا قاتىستى.