تۇركىستاندا «التىن دومبىرا» رەسپۋبليكالىق ايتىسى باستالدى
«كيەلى تۇركىستان توپىراعىندا الامان ايتىستىڭ شىمىلدىعىن اشىپ وتىرمىز. «Amanat» پارتياسى رۋحانيات پەن مادەنيەتكە جان-جاقتى قامقورلىق جاساپ كەلەدى. سونىڭ ءبىر ايعاعى - ۇلتىمىزدىڭ بويتۇمارىنا اينالعان وسى ايتىس. ەل پرەزيدەنتى قاسىم-جومارت توقايەۆتىڭ باستاماسىمەن ەلىمىز جاڭا داۋىرگە، ادىلەتتى قازاقستانعا قادام باستى. قوعام وزگەرىپ جاتىر. وسى وڭ وزگەرىستەردى بولاشاققا اقىندارىمىز جەتكىزەدى دەپ ويلايمىن»، - دەدى پارلامەنت ءماجىلىسىنىڭ ءتوراعاسى ەرلان قوشانوۆ ايتىستىڭ اشىلۋ سالتاناتىندا.
مادەنيەت جانە سپورت مينيسترلىگى ۇيىمداستىرعان ايتىستا ەلىمىزدىڭ ەڭ ۇزدىك 18 اقىنى باس قوستى.
«التىن دومبىرانىڭ» تۇركى جۇرتىنىڭ رۋحاني تورىندە ءوتۋى - ءبىز ءۇشىن زور مارتەبە ءارى زاڭدىلىق. وزدەرىڭىزگە بەلگىلى، وسىدان 4 جىلدان استام ۋاقىت بۇرىن ءوزىنىڭ تاريحي تۇعىرىنا قايتا قونعان تۇركىستان قالاسى جاڭارۋ مەن جاڭعىرۋدىڭ بۇرىن-سوڭدى بولماعان جاڭا بەلەسىنە كوتەرىلدى. ءبىز ءارقاشان دا مادەني-رۋحاني ءىس-شارالاردى قابىلداۋعا دايىنبىز، - دەدى تۇركىستان وبلىسىنىڭ اكىمى دارحان ساتىبالدى.
بيىلعى جىلدىڭ باستى دوداسىنا ەلىمىزدىڭ ءار وڭىرىندە جىل بويى وتكەن ايتىستاردا جەڭىمپاز اتانعان تانىمال اقىندار جينالعان. ايتىستى قازاقستاننىڭ ەڭبەك سىڭىرگەن قايراتكەرى، پارلامەنت ءماجىلىسىنىڭ دەپۋتاتى امانجول التايەۆ جۇرگىزىپ وتىر.
ايتا كەتەيىك، رەسپۋبليكالىق «التىن دومبىرا» اقىندار ايتىسى 2012-جىلدان باستاپ ۇيىمداستىرىلىپ كەلەدى. بىلتىر بۇل دودادا تۇركىستاندىق بەكارىس شويبەكوۆ جەڭىمپاز اتانعان بولاتىن. تۇركىستان تورىندەگى ايتىس 2 كۇنگە جالعاسادى.