20:57, 09 - جەلتوقسان 2022 | GMT +6
الماتى اكىمدىگى ورنالاسقان عيمارات قالالىق ءماسليحاتقا بەرىلەدى
الماتى. قازاقپارات - الماتى قالاسىنىڭ اكىمدىگى ورنالاسقان قازىرگى عيمارات كەلەر جىلى قالالىق ءماسليحاتقا بەرىلەدى.
بۇل تۋرالى قالالىق ءماسليحاتتىڭ كەزەكتەن تىس سەسسياسىندا الماتى اكىمى ەربولات دوسايەۆ مالىمدەدى، دەپ حابارلايدى قازاقپارات ءتىلشىسى.
ەربولات دوسايەۆتىڭ ايتۋىنشا، الماتى اكىمدىگى ورنالاسقان قازىرگى عيماراتقا كۇردەلى جوندەۋ جۇمىستارى جۇرگىزىلمەك.
«كەلەر جىلى ابىلاي حان مەن ايتەكە ءبي كوشەلەرىنىڭ قيىلىسىندا الماتى قالاسىنىڭ اكىمدىگى ۋاقىتشا ورنالاسقان عيماراتقا كۇردەلى جوندەۋ جۇرگىزىلۋى كوزدەلىپ وتىر. وسىعان وراي، كوكتەمدە رەكونسترۋكتسيادان سوڭ، تۇراقتى تۇردە ورنالاسۋ ءۇشىن نىساندى الماتى قالاسىنىڭ ءماسليحاتىنا بەرۋ تۋرالى شەشىم قابىلدادىم»، - دەدى ەربولات دوسايەۆ.
ەسكە سالايىق، بۇعان دەيىن ەربولات دوسايەۆ الماتى اكىمدىگى عيماراتىن قالپىنا كەلتىرۋ جۇمىستارى 2023-جىلى «ناۋرىز» مەرەكەسىنە دەيىن اياقتالۋى ءتيىس ەكەنىن ايتقان بولاتىن.