مەملەكەتتىك قىزمەتشىلەردىڭ كاسىبي دەڭگەيىن دامىتۋعا ارنالعان قۇجات ازىرلەنىپ جاتىر
بۇل تۋرالى مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ايتتى، دەپ حابارلايدى قازاقپارات ءتىلشىسى.
«مەملەكەتتىك مىندەتتەردى قوعامنىڭ تالاپ- تىلەكتەرىنە ساي جۇزەگە اسىرۋ ءۇشىن نەگىزگى قۇندىلىقتار مەن باسىمدىق بەرىلەتىن قاعيداتتاردى قايتا قاراۋ - وزەكتى. مەملەكەتتىك قىزمەتتەگى ادام رەسۋرسىن ىلگەرىلەتۋ مەملەكەتتىك قىزمەتشىلەردىڭ كاسىبي- تۇلعالىق بولمىسىن جەتىلدىرۋمەن دە تىعىز بايلانىستى»، - دەدى دارحان جازىقبايەۆ ەلوردادا ءوتىپ جاتقان «مەملەكەتتىك قىزمەتتەگى HR: پەرسونالدى ستراتەگيالىق باسقارۋعا كوشۋ» فورۋمىندا.
وسى ورايدا ول اگەنتتىك مەملەكەتتىك قىزمەتشىلەردىڭ كاسىبي جانە تۇلعالىق بولمىسى جايلى، سونداي- اق سانانى جاڭعىرتۋعا باعىتتالعان قۇجات دايارلاپ، ونى تانىستىرۋدى جوسپارلاپ وتىرعانىن ايتتى. بۇل رەتتە، مەملەكەتتىك قىزمەتشىلەردىڭ كاسىبي- تۇلعالىق بولمىسىن جەتىلدىرۋگە قاتىستى قاعيداتتار مەن ۇستانىمدار جۇيەلەنىپ جاتىر.
ونىڭ پايىمىنشا، بۇل قۇجات مەملەكەتتىك قىزمەتشىلەردە ادىستەمەلىك قۇرال رەتىندە بولۋى ءتيىس. وندا قوعامعا ۇلگى كورسەتۋ، ۇلتتىق مۇددەنى ويلاپ، مەملەكەتشىل بولۋ، ادىلدىكتىڭ بارشاعا ورتاق يگىلىك بولۋى، پىكىر الۋاندىلىعىن قولداۋ، انتقا ادالدىق سىندى نەگىزگى قاعيداتتار بەلگىلەنۋى جوسپارلانعان.
«بۇل قۇجاتتى ءبىز الداعى ۋاقىتتا قوعاممەن تالقىلاۋعا سالاتىن بولامىز. مەملەكەتتىك باسقارۋدى جەتىلدىرۋ جۇيەلى تۇردە وزگەرۋدى، قايتا قۇرۋدى قاجەت ەتەدى. ادامداردىڭ وي- ساناسىن جاڭعىرتۋ ادام رەسۋرستارىنىڭ ساپاسىنا اسەر ەتەدى. ۇسىنىلاتىن قۇجات مەملەكەتتىك قىزمەتشىلەردىڭ سانالى، رۋحاني- ادامگەرشىلىك تۇرعىدان وزگەرۋىن ىنتالاندىرۋعا باعىتتالعان جانە ولاردىڭ مەملەكەتتىك باسقارۋ جۇيەسىندەگى قىزمەتىن ساپالى تۇردە جۇرگىزۋگە ارنالعان. ەڭ باستىسى - ەل الدىنداعى جاۋاپكەرشىلىكتى سەزىنۋ»، - دارحان جازىقبايەۆ.
بۇدان بۇرىن حابارلانعانداي، مەملەكەتتىك قىزمەتكە ورنالاسۋدا كونكۋرستىق ءراسىمدى وتكىزۋ فورماتى قايتا قارالدى.